Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 48

Ua faatiahia mai te tamaiti a te hoê vahine ivi i te ora

Ua faatiahia mai te tamaiti a te hoê vahine ivi i te ora

I te tau pa‘urâ, ua parau Iehova ia Elia: ‘A haere i Zarephate. I ǒ, na te hoê vahine ivi e horoa i te maa na oe.’ I te mau uputa o te oire, ua ite Elia i te hoê vahine ivi veve o te haaputuputu ra i te raau. Ua ani oia ia ’na i te hoê hapaina pape. A haere ai tera vahine e tii i te pape, ua parau atu Elia ia ’na: ‘A afai atoa mai na i te tahi faraoa.’ Ua pahono râ te vahine ivi: ‘Aita roa ’tu ta ’u e faraoa. Te vai noa râ maa hinu e faraoa ota no te hamani i te hoê maa iti na ta ’u tamaiti e na ’u.’ Ua parau atura Elia ia ’na: ‘Ua fafau Iehova e ia hamani mai oe maa faraoa na ’u, eita ta oe faraoa ota e ta oe hinu e pau tae roa ’tu i te taime e ûa faahou mai.’

Ua haere atura te vahine ivi i to ’na fare e ua hamani oia i te faraoa na te peropheta a Iehova. Mai ta Iehova i fafau, aita te maa a te vahine ivi e a ta ’na tamaiti i pau i te roaraa o te tau pa‘urâ. Ua î noa ta ’na mau farii i te faraoa ota e te hinu.

I muri iho, ua tupu te hoê ohipa peapea mau. Ua ma‘ihia te tamaroa a te vahine ivi e ua pohe oia. Ua taparu oia i te  tauturu a Elia. Tei te rima o te vahine ivi te tamaroa. Ua rave atura Elia i te tamaroa e ua amo oia ia ’na i te hoê piha i te tahua o te fare. Ua tuu Elia i te tamaroa i nia i te hoê ro‘i e ua pure oia: ‘E Iehova e, a faatia mai na i tera tamaroa i te ora.’ Ua ite anei oe no te aha e mea maere mau tera aniraa ia Iehova? No te mea, a tahi ra e faatiahia mai te hoê taata i te ora. E ere atoa te vahine ivi e ta ’na tamaiti i te Iseraela.

Ua faatiahia mai râ te tamaroa i te ora e ua haamata oia i te huti i te aho! Ua parau Elia i te vahine ivi: ‘A hi‘o na! Ua ora mai ta oe tamaiti.’ Ua oaoa roa te vahine e ua parau oia ia Elia: ‘Papu maitai e taata oe no te Atua. Ua ite au i te reira no te mea e parau noa oe i ta Iehova e faaite ia oe.’

“A hi‘o na i te oreba. Eita teie mau manu e ueue i te huero, e ooti e aita ta ratou e fare vairaa maa. Teie râ, te faaamu ra te Atua ia ratou. E ere anei mea faufaa a‘e outou i tera mau manu?”—Luka 12:24

No te ite atu â

TE PARE TIAIRAA—HAAPIIRAA

Ua haamaitaihia te vahine ivi no Zarephate no to ’na faaroo

Tia-faahou-raa o te tamaiti a te vahine ivi. Hoê teie o te mau tupuraa tei haapuai mau i to ’na faaroo. Eaha te mau haapiiraa e huti mai?