Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 74

Ua riro o Iesu ei Mesia

Ua riro o Iesu ei Mesia

I poro noa na o Ioane: ‘E mana rahi a‘e to te taata e haere mai i muri a‘e ia ’u.’ I te 30raa o to Iesu matahiti, ua haere oia mai Galilea mai i te anavai Ioridana, i reira o Ioane i bapetizo ai i te mau taata. Ua hinaaro o Iesu ia bapetizo Ioane ia ’na. Ua parau râ o Ioane: ‘E ere i te mea tano ia bapetizo vau ia oe. Na oe e bapetizo ia ’u.’ Ua pahono Iesu ia Ioane: ‘Te hinaaro nei o Iehova ia bapetizo oe ia ’u.’ Ua haere atura raua i roto i te anavai Ioridana e ua bapetizo atura Ioane ia Iesu ma te tuu i te tino taatoa o Iesu i roto i te pape.

Ua haere maira o Iesu i nia mai raro mai i te pape e ua pure oia. I taua taime ra, ua matara mai te mau ra‘i e ua pou mai te varua o te Atua i nia ia Iesu mai te uupa ra te huru. I muri iho, ua parau Iehova mai te ra‘i mai: “O ta ’u Tamaiti oe, tei herehia. Ua mauruuru roa vau ia oe.”

I te taime i pou mai ai te varua o Iehova i nia ia Iesu, ua riro oia ei Mesia. I teie nei, e haamata Iesu i te ohipa ta Iehova i ani ia ’na ia rave i nia i te fenua nei.

I muri noa ’‘e i to ’na bapetizoraa, ua haere o Iesu i roto i te medebara e ua vai oia i ǒ e 40 mahana i te maoro. I to ’na ho‘iraa mai, ua haere oia e farerei ia Ioane. I to Iesu haereraa ia Ioane ra, ua parau Ioane: ‘Teie te Arenio a te Atua. Maoti oia e faaorehia ’i te hara a teie ao.’ Ma te parau i te reira, ua faaite Ioane i te mau taata e o Iesu te Mesia. Ua ite anei oe eaha tei tupu i nia ia Iesu i roto i te medebara? Ta tâua ïa e ite i muri iho.

“Faaroohia maira te hoê reo mai te ra‘i mai i te na ôraa: ‘O ta ’u Tamaiti oe, tei herehia. Ua mauruuru roa vau ia oe.’”—Mareko 1:11