I te hoê po, ua moemoeâ te arii Nebukanesa i te hoê moemoeâ maere mau. Ua haapeapea noa te reira ia ˈna e aita oia i nehenehe e taoto faahou. Ua ani oia ia haere mai ta ˈna mau taata tahutahu e ua parau atu: ‘A faataa mai ia ˈu eaha te auraa o ta ˈu i moemoeâ.’ Ua pahono atura ratou: ‘E te arii e, a faaite mai na eaha ta oe i moemoeâ.’ Ua parau râ Nebukanesa ia ratou: ‘Eita! Na outou e faaite mai eaha ta ˈu i moemoeâ aore ra e haapohe vau ia outou.’ Ua parau faahou ratou ia ˈna: ‘A faaite mai na eaha ta oe i moemoeâ e i muri iho, e faataa matou i te auraa.’ Ua na ô te arii: ‘Te tamata nei outou i te haavare ia ˈu. A faaite mai eaha ta ˈu i moemoeâ!’ Ua parau ratou i te arii: ‘Eita hoê noa ˈˈe taata i nia i te fenua nei te nehenehe e na reira. Eita roa ˈtu e nehenehe e rave i ta oe e ani ra.’

Ua riri roa Nebukanesa e ua ani oia ia haapohehia te mau taata î i te paari atoa o te fenua. Tei roto atoa o Daniela, Sadaraka, Meseka e o Abedenego. Ua ani Daniela i te arii ia horoa ia ˈna maa taime. I muri iho, ua pure Daniela e to ˈna mau hoa ia Iehova e ua ani ratou i ta ˈna tauturu. Eaha ta Iehova i rave?

I roto i te hoê orama, ua faaite Iehova ia Daniela eaha ta Nebukanesa i moemoeâ. Ua faataa atoa Iehova ia Daniela i te auraa o te reira. Te mahana i muri aˈe, ua na ô Daniela i te tavini a te arii: ‘Eiaha e haapohe i te mau taata î i te paari. E nehenehe au e faataa i te auraa o te moemoeâ a te arii.’ Ua afai te tavini ia Daniela i mua ia Nebukanesa. Ua parau Daniela i te arii: ‘Ua faaite te Atua ia oe eaha te tupu no a muri aˈe. Teie ta oe i moemoeâ: Ua ite oe i te hoê tii rahi. E auro to ˈna upoo, e ario to ˈna ouma e rima, e veo to ˈna opu e to ˈna na huha, e auri to ˈna avae i nia e e auri anoihia i te araea to ˈna avae i raro. I muri iho, ua iritihia te hoê ofai mai  nia mai i te mouˈa e ua tairi i te avae o te tii. Ua huˈahuˈa roa te tii e ua pee te reira i te mataˈi. Ua riro te ofai ei mouˈa rahi tei tapoˈi i te fenua taatoa.’

I muri iho, ua parau atu Daniela: ‘Teie te auraa o ta oe i moemoeâ: Te upoo auro, o ta oe faatereraa arii ïa. Te ario, o te faatereraa arii ïa e tia mai i muri mai ia oe. I muri iho, e tia mai te hoê faatereraa arii mai te veo e o te faatere i te fenua taatoa. E te maha o te faatereraa arii, e riro ïa mai te auri i te paari. Te faatereraa arii hopea, mea amahamaha ïa, mea puai te tahi o ta ˈna mau tuhaa mai te auri e mea paruparu te tahi atu mau tuhaa mai te araea. Te ofai o te riro ei mouˈa, o te Faatereraa arii a te Atua ïa. E faahuˈahuˈa te reira i teie mau faatereraa arii atoa e e vai noa e a muri noa ˈtu.’

Ua tipapa ihora Nebukanesa i mua ia Daniela. Ua na ô oia: ‘Ua faaite to oe Atua ia oe eaha ta ˈu i moemoeâ. Aita hoê aˈe atua mai ia ˈna.’ Aita Nebukanesa i haapohe ia Daniela. Ua tuu te arii ia ˈna ei raatira tiaau i nia i te mau tane paari e ei faatere i te tuhaa fenua taatoa o Babulonia. Ua ite anei oe e nafea Iehova i pahono ai i te pure a Daniela?