Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 100

Paulo raua Timoteo

Paulo raua Timoteo

E taeae apî o Timoteo i roto i te amuiraa i Lusetera. E taata Heleni to ’na metua tane e e ati Iuda to ’na metua vahine. Ua haapii atu to ’na metua vahine, o Eunike to ’na i‘oa, e to ’na mama ruau, o Loidi to ’na i‘oa, ia Timoteo no nia ia Iehova mai to ’na tamariiraa.

A haere ai o Paulo i Lusetera i te pitiraa o to ’na tere pororaa, ua ite oia e mea here roa na Timoteo i to ’na mau taeae e ua hinaaro iho â oia e tauturu ia ratou. Ua titau atura o Paulo ia Timoteo ia apiti ia ’na i roto i to ’na tere. A mairi ai te tau, ua faaineine o Paulo ia Timoteo ia riro oia ei taata poro e ei taata haapii aravihi i te parau apî oaoa.

Ua aratai te varua mo‘a ia Paulo raua Timoteo i te mau vahi atoa i haere na raua. I te hoê po, maoti te hoê orama, ua parau te hoê taata ia Paulo ia haere i Makedonia e ia tauturu ia ratou. Ua haere atura o Paulo, Timoteo, Sila e o Luka i ǒ no te poro e no te haamau i te mau amuiraa.

I Tesalonia, te oire no Makedonia, e rave rahi tane e vahine tei riro mai ei Kerisetiano. Ua pohehae râ vetahi o te ati Iuda ia Paulo e to ’na mau hoa. Ua haaputuputu ratou i te hoê nahoa e ua tuu ratou i te mau taeae i mua i te mau tia faatere o te oire, ma te tuô: ‘E mau enemi no te hau Roma teie mau taata!’ E tupuraa atâta roa te reira no Paulo raua Timoteo. Ua horo ê atura raua i Berea i tera po.

Ua hinaaro rahi te feia i Berea e haapii mai no nia i te parau apî oaoa. Ua riro atura te mau taata Heleni e te ati Iuda ei pǐpǐ. Ua haere râ vetahi ati Iuda no Tesalonia i ǒ e ua faahuehue ratou. Ua faarue atura o Paulo i te oire no te haere i Ateno. Ua faaea o Timoteo raua Sila i Berea no te faaitoito i te mau taeae. I te taime tano, ua faaue o Paulo ia Timoteo ia ho‘i i Tesalonia no te tauturu i te mau taeae tei faaruru i te hoê hamani-ino-raa puai mau. I muri iho, ua tono o Paulo ia Timoteo no te tere i e rave rahi atu â amuiraa no te faaitoito ia ratou.

 Ua parau o Paulo ia Timoteo: ‘E hamani-ino-hia te feia atoa e hinaaro ra e tavini ia Iehova.’ Ua hamani-ino-hia o Timoteo e ua tapeahia oia no to ’na faaroo. Ua oaoa oia no te mea ua nehenehe oia e haapapu i to ’na taiva-ore-raa ia Iehova.

Ua parau o Paulo i to Philipi: ‘Te tono atu nei au ia Timoteo ia outou ra. E haapii atu oia ia outou eaha te auraa ia ora ei tavini na Iehova e e faaineine oia ia outou no te pororaa.’ Ua ite Paulo e e nehenehe oia e tiaturi ia Timoteo. Ua ohipa amui raua ei hoa e ei tavini e rave rahi matahiti i te maoro.

“Aita ’tu hoi ta ’u e taata mai ia ’na ra te huru o te haapeapea mau ra no outou. Te imi nei hoi te taata atoa i to ratou iho maitai, eiaha râ i to Iesu Mesia ra.”—Philipi 2:20, 21

No te ite atu â

A HAAPII I TO TAMARII

Ua hinaaro Timoteo e tauturu i te taata

E nafea oe e ite ai i te oaoa e te mauruuru mai ia Timoteo?