Ua tapeahia te aposetolo Ioane i te motu o Patamo. I ǒ Iesu i faaite ai ia ˈna 16 orama aore ra tupuraa no nia i te a muri aˈe. Ua faaite teie mau orama e nafea to Iehova iˈoa e haamoˈahia ˈi, e nafea ta ˈNa Faatereraa arii e tae mai ai e e nafea to ˈNa hinaaro e tupu ai i te fenua nei mai i te raˈi atoa na.

I roto i te hoê orama, te ite ra o Ioane ia Iehova i nia i to ˈNa terono hanahana i te raˈi. Ua haaatihia oia e 24 matahiapo. E ahu uouo to ratou e e korona auro i nia i to ratou upoo. Mai te terono, e itehia te mau anaparaa uira e e faaroohia te harururaa patiri. Te tipapa ra na matahiapo e 24 i mua ia Iehova e te haamori ra ratou ia ˈna. I roto i te tahi atu orama, te ite ra o Ioane i te hoê nahoa rahi no roto mai i te mau nunaa, opu e reo atoa. Te haamori ra teie nahoa ia Iehova. Na te Arenio, oia hoi o Iesu, e aupuru ra e e aratai ra ia ratou i te mau pape pihaa o te ora. I muri iho, i roto i te tahi atu orama, te haamata ra o Iesu i te faatere ei Arii i te raˈi e te apiti ra na matahiapo e 24 ia ˈna. I roto i to muri iho orama, te ite ra o Ioane ia Iesu e aro ra i te teni, o Satani ïa, e i ta ˈna mau demoni. Te huri ra o Iesu ia ratou mai te raˈi mai i nia i te fenua.

 I muri iho, te ite ra o Ioane i te hoê tupuraa nehenehe mau. Te vai ra te Arenio e te mau 144 000 tei maitihia e te tia ra ratou i nia i te Mouˈa Ziona. Te ite atoa ra oia i te hoê melahi e rere ra na te fenua ma te faaite i te mau taata ia mǎtaˈu i te Atua e ia faahanahana ia ˈNa.

I to muri iho orama, te tupu ra te tamaˈi o Aramagedo. I roto i tera tamaˈi, te haamou ra o Iesu e ta ˈna nuu i te faanahonahoraa ino mau a Satani. I roto i te orama hopea, te ite ra o Ioane i te hau tia roa i te raˈi e i te fenua. Ua haamou-roa-hia o Satani e to ˈna huaai. No te feia atoa i nia i te raˈi e i te fenua nei, mea moˈa to Iehova iˈoa e te haamori ra ratou ia ˈna anaˈe.