Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 51

Te raatira e te tamahine iti

Te raatira e te tamahine iti

I te fenua no Arama, i vai na te hoê tamahine iti Iseraela. Ua atea roa oia i to ’na fare. Na te nuu Arama i haru ia ’na mai to ’na utuafare. I teie nei, te tavini nei oia i te vahine a Naamana. E raatira hoi o Naamana no te nuu Arama. Ua haamori teie tamahine iti ia Iehova, noa ’tu aita te nunaa Arama i na reira.

Ua roohia Naamana i te hoê ma‘i iri hairiiri e ua mauiui noa oia. Ua hinaaro iho â te tamahine iti e tauturu ia ’na. Ua parau oia i te vahine a Naamana: ‘Te vai ra te hoê taata o te nehenehe e tauturu i ta oe tane. I Iseraela, te vai ra te hoê peropheta a Iehova, o Elisaia to ’na i‘oa. E nehenehe oia e faaora i ta oe tane.’

Ua parau te vahine a Naamana i ta ’na tane eaha ta te tamahine iti i faaite mai. Ua hinaaro iho â o Naamana e ora mai. Ua haere ïa oia i ǒ Elisaia i Iseraela. Ua mana‘o o Naamana e farii Elisaia ia ’na mai te feia tuiroo e fariihia. Aita râ o Elisaia i haere e farerei ia ’na. Ua tono oia i ta ’na tavini no te farii ia Naamana e no te faatae atu i te hoê poroi: ‘A haere e  hopu e hitu taime i roto i te anavai Ioridana. E e ora mai oe.’

Ua inoino roa Naamana. Ua parau oia: ‘Mana‘o atu vau e e faaora mai te peropheta ia ’u ma te tuô i to ’na Atua e ma te rave i te mau ohipa faahiahia mau. Ua parau noa râ oia ia haere i tera anavai i Iseraela. Mea maitai a‘e hoi te mau anavai i Arama. No te aha eita vau e haere noa i ǒ?’ Ua riri o Naamana e ua faarue oia i te fare o Elisaia.

Ua tauturu râ te mau tavini a Naamana ia ’na ia feruri maitai. Ua parau ratou ia ’na: ‘Eita anei oe e rave i te mau ohipa atoa no te ora mai? Mea ohie roa ia rave i ta te peropheta i parau ia oe. A rave noa paha ïa i te reira.’ Ua faaroo Naamana ia ratou. Ua haere oia i te anavai Ioridana e ua hopu atu e hitu taime. I muri a‘e i te hituraa o te taime, ua tia mai Naamana i rapae i te pape e ua ore roa to ’na ma‘i. Ua mauruuru roa oia e ua ho‘i oia i ǒ Elisaia no te haamauruuru ia ’na. Ua parau Naamana: ‘Ua ite au i teie nei e o Iehova te Atua mau.’ No oe, eaha te huru o te tamahine iti no Iseraela a ite ai e ua ore roa to Naamana ma‘i?

“Ua faatupu oe i te arueraa na roto i te vaha o te mau tamarii rii e te mau aiû.”—Mataio 21:16