Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 3

Aita Adamu raua Eva i faaroo i te Atua

Aita Adamu raua Eva i faaroo i te Atua

I te hoê mahana, ua paraparau te tahi ophi ia Eva. O Eva ana‘e ïa i taua taime ra. Ua na ô te ophi: ‘Mea papu anei e eita te Atua e vaiiho ia orua ia amu i te hotu o te mau tumu raau atoa?’ Ua pahono atu Eva: ‘E nehenehe mâua e amu i te hotu o te mau tumu raau atoa, eiaha râ i to te hoê tumu raau. Ia amu mâua, e pohe ïa mâua.’ Ua na ô râ te ophi: ‘Eita orua e pohe. Ia amu orua i to tera tumu raau, e riro orua mai te Atua ra te huru.’ E parau mau anei te reira? E ere. E parau haavare te reira. Ua tiaturi râ Eva i tera parau. Rahi atu â Eva i te hi‘o i te hotu opanihia, rahi atu â ïa to ’na hinaaro e amu i te reira. Ua amu Eva i te hotu e ua horoa atoa oia i te tahi na Adamu. Ua ite hoi Adamu e ia ore raua e faaroo i te Atua, e pohe raua. Ua amu râ Adamu i te hotu.

I muri iho i taua mahana ra, ua paraparau Iehova ia Adamu raua Eva. Ua ani oia no te aha raua i ore ai i faaroo ia ’na. Ua pari Eva i te ophi e ua pari Adamu ia Eva. Ua tiahi Iehova ia Adamu raua Eva i rapae i te ô no te mea aita raua i faaroo ia ’na. No te haapapu e eita raua e tomo faahou i roto i te ô, ua tuu Iehova i te mau melahi e te hoê ’o’e ura no te tiai i te vahi tomoraa.

Ua faaite Iehova e e faautua oia i tei haavare ia Eva. E ere na te ophi i paraparau ia Eva. Aita hoi Iehova i poiete i te ophi ia nehenehe e paraparau. E melahi ino tei haaparaparau i te ophi. Ua na reira oia no te haavare ia Eva. O Satani te Diabolo te i‘oa o tera melahi. I a muri a‘e, e haapohe Iehova ia Satani. Eita ïa oia e haavare faahou i te mau taata e e turai ia ratou ia rave i te mau ohipa ino.

“E taparahi taata [te Diabolo] i to ’na haamataraa, e aita oia i mau papu i roto i te parau mau, no te mea aita te parau mau i roto ia ’na.”—Ioane 8:44, nota