Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 28

Ua paraparau te asini a Balaama

Ua paraparau te asini a Balaama

Ua tere te nunaa Iseraela i roto i te medebara fatata 40 matahiti i te maoro. Ua haru ratou e rave rahi oire. I teie nei, te puhapa nei ratou i te mau fenua papu no Moabi i te pae Hitia o te râ o te anavai Ioridana. Teie ïa te taime no te nunaa Iseraela no te ô i te Fenua tǎpǔhia. Ua riaria Balaka, te arii o Moabi, no te mea e haru to Iseraela i to ’na fenua. Titau atura oia i te hoê taata, o Balaama to ’na i‘oa, ia haere mai i Moabi. Ua hinaaro Balaka ia faahiti Balaama i te ino i nia i to Iseraela.

Ua parau râ Iehova ia Balaama: ‘Eiaha oe e faahiti i te ino i nia i to Iseraela.’ Ua patoi ïa Balaama i te haere i Moabi. Ua titau faahou te arii Balaka ia ’na e ua haapapu atu e e horoa oia ia ’na pauroa ta ’na e hinaaro. Ua patoi faahou â Balaama i te haere atu. I muri iho, ua parau te Atua: ‘A haere atu, a parau noa râ i ta ’u e parau ia oe.’

Haere atura Balaama i Moabi na nia i ta ’na asini. Ua opua oia i te faahiti i te ino i nia i to Iseraela, noa ’tu e ua parau Iehova ia ’na ia ore e na reira. E toru taime, ua fa mai te melahi a Iehova i nia i te purumu. Aita Balaama i nehenehe e ite i te melahi, ua nehenehe râ ta ’na asini. Na mua roa, ua haere te asini i roto i te hoê faaapu, eiaha faahou i nia i te purumu. I muri iho, ua piri te asini i te hoê patu ofai e ua mau te avae o Balaama i ropu i te patu e te asini. I te pae hopea, ua taoto roa te asini i nia i te purumu. I na taime e toru, ua tairi Balaama i ta ’na asini ma te faaohipa i te hoê raau.

I muri iho, ua paraparau te asini maoti to Iehova puai. Ua ani te asini ia Balaama: ‘No te aha oe e tairi noa ’i ia ’u?’ Pahono atura Balaama: ‘No to oe huru, e au vau i te maau. Ahiri e ‘o‘e ta ’u, e haapohe au ia oe.’ Parau atura te asini: ‘Ua faaohipa oe ia ’u a tau matahiti i teie nei. Ua rave ino a‘ena anei au ia oe?’

I muri iho, ua faaoti Iehova ia ite Balaama i te melahi. Ua parau te melahi: ‘Ua faaara Iehova ia oe ia ore e faahiti i te ino i nia i to Iseraela.’ Ua parau Balaama: ‘Ua hape au. E ho‘i au i te fare.’ Ua na ô râ te melahi: ‘A haere i Moabi, a parau noa râ i ta Iehova e parau atu ia oe.’

 Ua huti anei Balaama i te haapiiraa? Aita. I muri iho, ua tamata Balaama i te faahiti i te ino i nia ia Iseraela e toru taime. Maoti râ to Iehova puai, ua faahiti noa Balaama i te mau haamaitairaa i nia ia Iseraela i te taime taitahi. I te pae hopea, ua haru te nunaa Iseraela ia Moabi e ua haapohehia Balaama. Ahiri Balaama i faaroo ia Iehova!

“A ara e eiaha e nounou i ta vetahi ê tao‘a, no te mea noa ’tu e mea rahi te tao‘a a te hoê taata, eita oia e ora i te reira.”—Luka 12:15