Deuteronomi 16:1-22
16 “A haamanaˈo i te avaˈe no Abiba,* e a faatupu i te Pasa no Iehova to Atua,+ i te avaˈe hoi no Abiba i aratai ai Iehova to Atua ia oe i rapae i Aiphiti i te po.+
2 E pûpû oe i te tusia Pasa ia Iehova to Atua,+ no roto mai i te nǎnǎ mamoe e puaaniho e te nǎnǎ puaatoro,+ i te vahi ta Iehova e maiti no te haamau i to ˈna iˈoa.+
3 Eiaha oe e amu i te tahi mea hopue e te tusia.+ E amu oe e hitu mahana i te pane hopue ore, te pane o te ahoaho, no te mea ua haere oe i rapae i te fenua o Aiphiti ma te ru.+ E na reira oe i te roaraa o to oe oraraa ia haamanaˈo oe i te mahana i haere ai oe i rapae i te fenua o Aiphiti.+
4 Eiaha te faraoa ôihia tei hopue ia itehia i ǒ oe i to tuhaa fenua taatoa e hitu mahana,+ eiaha atoa te iˈo ta oe e pûpû ei tusia i te ahiahi i te mahana matamua ia toe i taua po taatoa ra e poipoi noa ˈtu.+
5 Eita ta oe e nehenehe e pûpû i te tusia Pasa i te mau oire atoa ta Iehova to Atua e horoa nei no oe.
6 Ia ravehia râ te reira i te vahi ta Iehova to oe Atua e maiti no te haamau i to ˈna iˈoa. Ia pûpû oe i te tusia Pasa i te ahiahi i te toparaa iho â te mahana,+ i te taime faataahia i haere ai oe i rapae i Aiphiti.
7 E tunu e e amu oe i te reira+ i te vahi ta Iehova to Atua e maiti,+ e i te poipoi e nehenehe oe e hoˈi i to mau fare ie.
8 E amu oe i te pane hopue ore e ono mahana, e i te hitu o te mahana, e tupu te tahi tairururaa taa ê no Iehova to Atua. Eiaha oe e rave i te tahi ohipa.+
9 “E taio oe e hitu hebedoma. E haamata oe i te taio i na hitu hebedoma mai te taime matamua e ooti ai oe i te huero maa i roto i te faaapu i te tipi fefe.+
10 I muri iho, e faatupu oe i te Oroa hebedoma no Iehova to Atua+ e te tusia horoa noa a to rima, horoahia ia au i te rahiraa haamaitairaa a Iehova to Atua ia oe.+
11 E ia oaoa oe i mua ia Iehova to Atua, oe e to tamaiti, to tamahine, to tavini tane, to tavini vahine, te ati Levi i roto i to mau oire,* te taata ê, te tamarii aita e metua tane,* e te vahine ivi, e noho ra i rotopu ia outou, i te vahi ta Iehova to outou Atua e maiti no te haamau i to ˈna iˈoa.+
12 A haamanaˈo e i riro na oe ei tîtî i Aiphiti,+ e a haapao e a faaohipa i teie mau faaueraa.
13 “E faatupu oe i te Oroa patiaraa tiahapa*+ e hitu mahana ia haaputu oe i tei noaa mai i ta oe vahi tairiiriraa huero maa* e ta oe apoo taataahiraa olive e te vine.
14 A oaoa i te roaraa o ta oe oroa,+ oe e to tamaiti, to tamahine, to tavini tane, to tavini vahine, te ati Levi, te taata ê, te tamarii aita e metua tane, e te vahine ivi e noho ra i roto i to mau oire.
15 E hitu mahana e faatupu ai oe i te oroa+ no Iehova to Atua i te vahi ta Iehova e maiti, e haamaitai hoi Iehova to Atua pauroa ta oe e ooti e pauroa te ohipa ta oe e rave,+ e e oaoa oe.+
16 “E toru taime i te matahiti, e tia pauroa te tane i rotopu ia outou i mua ia Iehova to Atua i te vahi ta ˈna e maiti: i te Oroa pane hopue ore,+ te Oroa hebedoma,+ e te Oroa patiaraa tiahapa,*+ e eiaha hoê o ratou ia tia i mua ia Iehova aita e faufaa i roto i te rima.
17 Ia hopoi mai te taata tataitahi i te ô ia au i te haamaitairaa ta Iehova to Atua i horoa na oe.+
18 “E faatoroa oe i te haava+ e te feia toroa no te opu tataitahi i roto i te mau oire* atoa ta Iehova to Atua e horoa nei no oe, e e haava ratou i te nunaa ma te haavaraa parau-tia.
19 Eiaha oe e faahuru ê i te parau-tia,+ e maitiiti i te taata,+ aore ra e farii ia petahia. E matapo roa hoi te taata feruriraa paari i te peta+ e e taviri te reira i te parau a te taata parau-tia.
20 O te parau-tia, te parau-tia anaˈe, ta oe e tapi,+ a nehenehe atu ai oe e ora noa e e fatu i te fenua ta Iehova to Atua e horoa nei no oe.
21 “Eiaha oe e tanu i te tumu raau ei raau haamoriraa*+ i pihai iho i te fata a Iehova to Atua ta oe e hamani no oe.
22 “Eiaha atoa oe e faatia i te tahi pou haamoriraa no oe,+ mea hae na Iehova to Atua i te reira.
Nota i raro i te api
^ Hiˈo i te tuhaa hau B15.
^ Heb: “uputa.”
^ Aore ra “otare.”
^ Aore ra “tamaru no tau mahana noa.”
^ Aore ra “tamaru no tau mahana noa.”
^ Heb: “to mau uputa.”
