Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A pee i to ratou faaroo

 PENE AHURU MA IVA

E papa maitai oia, e taata faaroo atoa

E papa maitai oia, e taata faaroo atoa

1, 2. (a) Eaha te tiai mai ra ia Iosepha e to ’na utuafare? (b) Eaha te parau peapea ta Iosepha i faaite i ta ’na vahine?

TUU a‘era Iosepha i te taihaa hopea i nia i te asini. A feruri na ia ’na e hi‘o haere ra e ati a‘e ia ’na, a horomiri noa ’i i te asini. Te poiri noa ra i te oire iti o Betelehema. Papu roa, te mana‘ona‘o ra oia. Mea atea hoi te vahi ta ratou e haere, i Aiphiti roa: fenua ê, reo ê, peu tumu ê. E nahea hoi ratou i ǒ?

2 E ere mea ohie i te faaiteraa i te parau peapea ia Maria ta ’na vahine here. Ua faaara ’tu iho â râ oia e ua faatae mai te hoê melahi na roto i te moemoeâ i te poroi a te Atua: te hinaaro ra te arii Heroda e haapohe i ta raua tamaiti iti! Eiaha ïa e faataere, ia faarue mai ratou ia Betelehema. (A taio i te Mataio 2:13, 14.) Peapea roa ihora Maria. No te aha hoi te taata e hinaaro ai e haapohe i ta ’na tamarii, aita hoi ta ’na e hara? Aita raua Iosepha i taa no te aha. Ua tiaturi râ raua ia Iehova. Faaineine ihora ïa ratou i te horo i Aiphiti.

3. A faataa na i te faarueraa mai Iosepha e to ’na utuafare ia Betelehema. (A hi‘o atoa i te hoho‘a.)

3 I to Iosepha, Maria e Iesu reva-omoe-raa no te haere i te pae apatoa, te taoto noa ra to Betelehema. Aita hoi ratou i ite i ta Heroda opuaraa. A haamata ’i te ra‘i i te marama i te pae hitia o te râ, te uiui noa ra Iosepha. E nafea hoi o ’na, te hoê tamuta riirii, e paruru ai i to ’na utuafare i tei puai roa ’‘e ia ’na? E haere noa anei ia ’na ia aupuru i to ’na utuafare? E noaa anei ia ’na ia amo maite i te hopoia rahi ta Iehova i horoa ’tu: e haapao e e haapii i tera tamaiti otahi? E farerei oia i te mau haafifiraa teimaha. E hi‘o mai râ tatou mea nafea to ’na faarururaa i te reira, e nafea atoa te mau metua tane, tatou pauroa atoa, e pee ai i to Iosepha faaroo.

Ua paruru Iosepha i to ’na utuafare

4, 5. (a) No te aha to Iosepha oraraa i taui roa ’i? (b) Mea nafea te hoê melahi i faaitoito ai ia Iosepha ia amo i te hoê hopoia rahi?

4 Hau atu i te hoê matahiti na mua ’tu, i Nazareta to ’na oire,  ua taui roa to Iosepha oraraa i muri a‘e i to raua Maria te tamahine a Heli momo‘araahia. Ua ite o ’na e e potii haapao maitai Maria e mea here na ’na ia Iehova. I to ’na râ iteraa e ua hapû Maria, opua ihora oia e faataa huna noa ia raua, aita hoi oia i hinaaro e faahaama ia Maria. * Na roto râ i te moemoeâ, faataa ihora te hoê melahi ia Iosepha e maoti te varua mo‘a o Iehova i hapû ai Maria, e “e faaora” te tamaiti ta Maria e fanau mai “i to ’na [mau] taata i ta ratou hara.” Na ô atura oia ia Iosepha: “Eiaha e mǎta‘u i to vahine ra ia Maria ia aratai mai i te utuafare.”—Mat. 1:18-21.

5 Na reira ’tura Iosepha taata parau-tia e te auraro, e farii atura i te hopoia rahi roa ’‘e: e rave e e aupuru i te hoê tamaiti e ere na ’na, mea here-roa-hia râ e te Atua. I muri a‘e, mai tei faauehia e te emepera, haere atura Iosepha e ta ’na vahine hapû i Betelehema e tapao i to raua i‘oa. I reira te fanauraahia mai taua tamarii ra.

6-8. (a) No te aha i taui faahou ai te oraraa o Iosepha e to ’na utuafare iti? (b) Mea nafea tatou i ite ai e na Satani i faaohipa i te “fetia”? (A hi‘o atoa i te nota i raro i te api.)

6 Aita Iosepha e to ’na utuafare i ho‘i mai i Nazareta, ua faaea ’tu râ i Betelehema fatata 10 kilometera ia Ierusalema. Noa ’tu e mea veve ratou, ua faaitoito iho â Iosepha i te aupuru e i te paruru ia Maria raua Iesu. Itea oioi maira ia ratou te tahi nohoraa iti. Taui taue faahou atura to ratou oraraa. I taua taime ra, e ere Iesu i te pêpe faahou, e tamarii rii râ, peneia‘e hau i te hoê matahiti.

7 Tae maira te tahi mau taata hi‘o fetia no Hitia o te râ mai. Na Babulonia roa mai paha ratou. I pee na ratou i te hoê “fetia” tei aratai ia ratou i te fare o Iosepha raua Maria. Te imi ra ratou i te hoê tamarii o te riro mai ei arii no te ati Iuda. Mea faatura roa taua mau taata ra.

8 Aita paha ratou i ite e e nehenehe Iesu e pohe no ratou noa ’‘e. Aita hoi te “fetia” i aratai ia ratou i Betelehema na mua, i Ierusalema râ. * I reira, faatia ’tura ratou i te arii ino ra o Heroda e te imi ra ratou i te hoê tamarii o te riro mai ei arii no te ati Iuda. Pohehae roa a‘era te arii.

9-11. (a) Eaha ta Iehova i rave no Iosepha e to ’na utuafare? (b) Eaha te parau mau no nia i te tere i Aiphiti?

9 Aua‘e râ te vai ra mea puai roa ’‘e ia Heroda raua Satani. O vai ïa? I to te feia hi‘o fetia tomoraa i roto i te fare e iteraa ia Iesu e to ’na mama, horoa ’tura ratou i te ô ma te ore e ani i te tahi faaho‘iraa.  Eita e ore e ua huru ê rii paha Iosepha raua Maria i te horoaraahia mai “te auro, e te tapau libano e te mura,” mea moni roa hoi teie mau mea! Ua mana‘o te feia hi‘o fetia e ho‘i e faaite i te arii Heroda teihea taua tamarii ra. Na roto râ i te moemoeâ, ua faaue Iehova ia ratou ia haere i to ratou fenua na te tahi atu e‘a.—A taio i te Mataio 2:1-12.

10 I te revaraa ’tu iho â te feia hi‘o fetia, faaara maira te hoê melahi ia Iosepha: “A tia a rave i te tamaiti iti e tana metua vahine, a maue i Aiphiti, ei reira parahi ai e ia parau atu vau ia oe ra: e imi hoi Heroda i te tamaiti iti na e taparahi.” (Mat. 2:13) Mai ta tatou i tapao i te omuaraa o teie pene, na reira ’tura Iosepha aita i faataere. Ia ora hoi tera tamarii, te mea faufaa roa ’‘e ïa. Aua‘e te mau ô a te feia hi‘o fetia, e pee ïa ia Iosepha ia aufau i to ratou tere e to ratou faaearaa i Aiphiti.

Ua haapae iho â Iosepha ia ’na no te paruru i ta ’na tamarii

11 I muri a‘e, ua hamani vetahi i te mau aai no nia i tera tere i Aiphiti: ua haapoto semeio Iesu i to ratou tere, ua faariro o ’na i te mau taata eiâ ei taata maitai, e ua faaue atoa o ’na i te hoê tamara ia pi‘o mai i raro ia nehenehe to ’na mama e pofai i te maa i nia iho. * Te parau mau, e tere atea teie e te fifi i te hoê fenua ê.

Ua haapae Iosepha ia ’na no to ’na utuafare

12. Eaha ta te mau metua o te rave nei i ta ratou mau tamarii i roto i teie nei ao atâta, e haapii mai ia Iosepha?

12 Mea rahi te haapiiraa ta te mau metua e huti mai i te hi‘oraa o Iosepha. Ua vaiiho oia ma te aau tae i ta ’na ohipa e ua haapae ia ’na no te paruru i to ’na utuafare. Papu roa ïa e no ’na, e ô faufaa roa to ’na utuafare no ǒ mai ia Iehova ra. I teie mahana, te rave nei te mau metua i ta ratou mau tamarii i roto i te hoê ao atâta mau, o te arato ra i te feia apî ia rave i te mea ino, a roohia ’tu ai ratou i te mauiui rahi, e a ino atu ai to ratou oraraa. Ia haapopouhia ïa te mau mama e te mau papa o te rohi nei i te paruru, mai ia Iosepha, i ta ratou mau tamarii!

Ua aupuru Iosepha i to ’na utuafare

13, 14. No te aha Iosepha e to ’na utuafare i ho‘i ai i Nazareta?

13 Aita Iosepha e to ’na utuafare i faaea maoro i Aiphiti. I muri rii a‘e, ua faaara te melahi ia Iosepha e ua pohe Heroda. Ho‘i maira Iosepha e to ’na utuafare i ǒ ratou, a tupu atu ai te hoê parau tohu tahito e e tii Iehova i ta ’na tamaiti i Aiphiti. (Mat. 2:15)  Teie noa râ, ihea Iosepha e to ’na utuafare e faaea ’i?

14 I to Iosepha iteraa e na Arehelau i mono ia Heroda, mǎta‘u ihora oia. Mea ino roa atoa tera arii, e haapohe atoa o ’na i te taata. Aratai ihora Iehova ia Iosepha ia faaho‘i i to ’na utuafare i te pae apatoerau i Nazareta i Galilea. Ia atea ê roa ratou ia Ierusalema e te mau opuaraa ino atoa na reira. I Nazareta ïa to ratou faaearaa.—A taio i te Mataio 2:19-23.

15, 16. Eaha ta Iosepha ohipa, e eaha paha te mau tauihaa ta ’na i faaohipa?

15 E oraraa haihai noa to ratou, mea ohipa roa râ. Te parau ra te Bibilia e e tamuta Iosepha. (Mat. 13:55) I tera tau, mea rahi te ohipa a te tamuta, mai te tâpûraa i te mau tumu raau, te tieraa mai i tera mau raau i te fare, a vaiiho noa ’tu ai ia mǎrô no te hamani i te fare, te poti, te e‘aturu nainai, te tavere, te huira, te zugo, e te mau huru tauihaa atoa no te faaapu. E ohipa rohirohi roa teie. E pinepine, e rave te tamuta i ta ’na ohipa i te pae uputa o to ’na fare, aore ra i roto i te hoê piha tamuta i pihai iho noa mai.

16 Ua rau te tauihaa ta Iosepha i faaohipa, na to ’na papa paha vetahi i horoa mai, mai te tapau faitoraa paha, te taura no te reni, te to‘i, te ‘e‘e, te hamara, te tohi, te hou, te tapiri e rave rau, e peneia‘e maa naero noa ’tu e mea moni roa.

17, 18. (a) Eaha ta Iesu i haapii mai i to ’na papa faaamu? (b) No te aha i titauhia ’i ia rohi atu â Iosepha?

17 A feruri na i te tamarii ra o Iesu e mataitai ra i to ’na papa faaamu e ohipa ra. Te hi‘o ra o ’na ma te mata araara pauroa ta Iosepha e rave ra. Ua faahiahia paha o ’na i te puai o to ’na tino pautuutu, e te aravihi o to ’na rima e to ’na mata oraora. Peneia‘e ua faaite na mua Iosepha i ta ’na tamaiti iti e nafea ia rave i te tahi mau ohipa ohie, mai te haamaninaraa i te raau i te iri tara‘ihia o te i‘a. Ua faataa atoa paha o ’na ia Iesu i te taa-ê-raa i rotopu i te huru raau ta ’na e faaohipa, mai te sukamino e te tumu olive.

Ua haapii Iosepha i ta ’na tamaiti i te ohipa tamuta

18 Ua haapii atoa mai Iesu e tera rima puai o te tâpû i te mau tumu raau, o te ‘e‘e i te raau a patǐtǐ atu ai, e rima mǎrû atoa ïa o  te horomiri ia ’na, to ’na mama e to ’na mau taeae e tuahine no te tamahanahana ia ratou. Oia mau, ua rahi mai te utuafare o Iosepha raua Maria, e ono a‘e tamarii ta raua hau atu ia Iesu. (Mat. 13:55, 56) Ua titauhia ïa ia rohi atu â Iosepha no te aupuru e no te faatamaa ia ratou pauroa.

Ua taa ia Iosepha e o te tautururaa i to ’na utuafare ia piri roa ia Iehova te mea faufaa roa ’‘e

19. Eaha ta Iosepha i rave ia piri roa to ’na utuafare ia Iehova?

19 Teie râ, ua taa ia Iosepha e o te tautururaa i to ’na utuafare ia piri roa ia Iehova te mea faufaa roa ’‘e. No reira ïa oia i faataa ’i i te taime no te haapii i ta ’na mau tamarii no nia ia Iehova e ta ’na mau ture. Ua afai tamau raua Maria ia ratou i te sunago o to ratou oire iti, i reira te ture a Mose e taio-haapuai-hia ’i e e faataahia ’i. Peneia‘e mea rahi ta Iesu uiraa i ui a ho‘i ai ratou i te fare, e ua tutava iho â Iosepha i te pahono atu. Ua afai atoa Iosepha i to ’na utuafare i te mau oroa faaroo e tupu pauroa te matahiti i Ierusalema 120 kilometera te atea ia Nazareta. No te Pasa, e titauhia e piti hebedoma no te haere i Ierusalema, no te oroa e no te ho‘i mai.

Ua afai tamau Iosepha i to ’na utuafare i te hiero i Ierusalema

20. Eaha ta te mau upoo utuafare Kerisetiano e rave ra mai ia Iosepha?

20 Te pee nei te mau upoo utuafare Kerisetiano i to Iosepha hi‘oraa. Noa ’tu e te rohi ra ratou no te faatamaa i to ratou utuafare, te haapii ra ratou i ta ratou mau tamarii no nia ia Iehova. Tera ta ratou fa matamua roa. Te faaitoito nei ratou i te faatupu i ta ratou haamoriraa utuafare e i te afai i ta ratou mau tamarii i te mau putuputuraa a te amuiraa e te mau tairururaa. Ua ite ratou, mai ia Iosepha, e tera te mea maitai roa ’‘e ta ratou e nehenehe e rave no ta ratou mau tamarii.

Ahoaho roa

21. (a) A faataa na i te tere o te mau ratere i Ierusalema no te Pasa. (b) I teihea taime to Iosepha raua Maria taaraa e aita o Iesu?

21 Mai tei matauhia, haere a‘era Iosepha e to ’na utuafare i Ierusalema no te Pasa. E taime oaoa mau i taua tau uaaraa tiare haumǎrû ra. Mea amui te mau utuafare rahi ia haere. A pauma ’i ratou i nia i te mau aivi e tae atu ai i Ierusalema, mea rahi tei himene i te mau salamo ta ratou i matau maitai. (Sal. 120-134) Mea taata roa i Ierusalema, ua hanere tausani paha. I te otiraa te oroa, ho‘i pauroa a‘era te ratere i ǒ ratou, tae noa ’tu Iosepha raua Maria, mea ohipa roa paha. Mana‘o a‘era raua e tei te tahi atu mau ratere, e fetii paha, o Iesu 12 matahiti i tera taime. I muri a‘e râ i to  ratou haere-noa-raa hoê mahana taatoa, taa a‘era ia raua e aita o Iesu.—Luka 2:41-44.

22, 23. (a) Eaha ta Iosepha raua Maria i rave i to raua taaraa e aita o Iesu? (b) Eaha ta Maria i parau i to raua Iosepha iteraa ia Iesu?

22 Ho‘i maira Iosepha raua Maria e te ahoaho pauroa i Ierusalema, e paimi haere atura ia Iesu. A feruri na ïa i to raua huru a haere ai raua na roto i te mau aroâ, a pii noa ’i i ta raua tamaroa. Mea huru ê rii paha, aita hoi i rahi faahou te taata. Teihea roa hoi Iesu? I te toru o te mahana, ua mana‘o paha Iosepha e ua patore o ’na i roto i ta ’na hopoia mo‘a ta Iehova i horoa na ’na. Haere atura raua e paimi ia ’na i te hiero. Ite ihora raua ia ’na i roto i te hoê piha rahi. Te parahi ra o ’na i rotopu e rave rahi taata ite i  te ture a Mose. Topa a‘enei te hau o Iosepha raua Maria!—Luka 2:45, 46.

23 Te faaroo noa ra e te uiui ra Iesu i taua mau taata ite ra, tei maere roa i to ’na maramarama e ta ’na mau pahonoraa. Maria râ raua Iosepha, ua hitimaue ïa. Ia au i te faatiaraa, aita Iosepha i parau noa ’‘e i te tahi mea. Ua faaite roa râ ta Maria i parau i to raua toopiti huru aau: “E tau tamaiti, eaha oe i na reira mai ai ia mâua? inaha i imi noa na mâua o to metua tane ia oe ma te oto,” aore ra ma te ahoaho.—Luka 2:47, 48.

24. Eaha ta te Bibilia e faataa mai ra no nia i te hopoia metua?

24 Te faataa poto mai ra ïa te Bibilia, ma te tano râ, i te hopoia metua. Noa ’tu e e tamarii tia roa, ua ahoaho roa Iosepha  raua Maria. Eaha ’tu â ïa no te mau papa e te mau mama e ora nei i roto i teie nei ao atâta! E tamahanahanahia râ ratou e teie parau mau: te taa mai ra ia Iehova to ratou mau fifi.

25, 26. (a) Mea nafea to Iesu pahonoraa i to ’na na metua? (b) Eaha te huru o Iosepha i ta Iesu pahonoraa?

25 Ua faaea ’tu Iesu i te hiero, te vahi hoê roa i te ao nei e piri roa ’i oia i to ’na Metua i te ra‘i ra o Iehova, e apo atoa mai ai ma te aau tae i ta ’na e haapii mai no nia ia Iehova. Ma te faatura, pahono ihora oia i to ’na na metua: “Eaha orua i imi ai ia ’u? Aita orua i ite e ei roto vau i te fare o to ’u Metua?”—Luka 2:49, Traduction du monde nouveau.

26 Eita e ore e ua feruri â Iosepha i ta Iesu pahonoraa. Ua haapeu roa atoa paha o ’na. I rohi na hoi oia i te haapii i ta ’na tamaiti faaamu ia here ia Iehova. Ua raea taua fa ra, inaha i tera taime e tamaroa â Iesu, ua tupu ê na taua here ra i roto i to ’na aau a faahiti ai oia i te parau ra “metua.”

27. Mai te peu e e papa oe, eaha ta oe hopoia e no te aha ia haamana‘o oe i to Iosepha hi‘oraa?

27 Mai te peu e e papa oe, a here e a paruru i ta oe mau tamarii. E tauturu ïa oe ia ratou ia hi‘o ia Iehova mai to ratou Metua i te ra‘i, o te here ra e e paruru ra ia ratou. Mai te peu atoa e te rave ra oe i te tamarii e ere na oe, na to oe râ hoa faaipoipo aore ra mea faaamuhia, a haamana‘o i to Iosepha hi‘oraa. Mea taa ê tera e tera tamarii, mea faufaa roa râ ratou pauroa. Ia na reira oe i te hi‘o ia ratou e tia ’i, a tauturu atu ai ia piri atu â i to ratou Metua i te ra‘i ra o Iehova.—A taio i te Ephesia 6:4.

Ua amo maite Iosepha i ta ’na hopoia

28, 29. (a) Eaha ta te Luka 2:51, 52 e faaite mai ra no nia ia Iosepha? (b) Mea nafea to Iosepha tautururaa i ta ’na tamaiti ia rahi mai to ’na paari?

28 Maa parau rii noa ta te Bibilia e faahiti i muri iho no Iosepha.  Mea rahi râ te haapiiraa e huti mai. Te parau ra te Bibilia e ‘faaroo noa ’tura Iesu ia raua,’ oia hoi to ’na na metua. Oia atoa “tupu atura Iesu i te rahi e te paari, e te herehia mai e te Atua e te taata atoa.” (A taio i te Luka 2:51, 52.) Eaha ïa ta teie mau irava e faaite mai ra no nia ia Iosepha? A tahi, ua tamau noa oia i te aratai i to ’na utuafare, i te mea e ua faatura e ua auraro noa ta ’na tamaiti tia roa i to ’na tiaraa upoo.

29 A piti, ua rahi mai to Iesu paari. Papu roa e i apiti rahi na Iosepha i taua ohipa ra. I tera tau, mea rahi tei mana‘o e o te feia tao‘a rahi e te mana ana‘e te nehenehe e riro mai ei taata paari, eiaha râ te mau rimaî, mai te mau tamuta, te feia faaapu, te feia faaamu animara e te feia tupai auri. I muri a‘e râ, ua faahapa roa Iesu i taua mana‘o ra. Papu roa e i to ’na tamarii-rii-raa, i faaroo pinepine na oia i to ’na papa faaamu, tamuta veve hoi, ia haapii maite ia ’na eaha te mea maitai e eaha te mea ino no Iehova!

30. Eaha te hi‘oraa ta Iosepha i vaiiho mai no te mau upoo utuafare?

30 A toru, ua apiti atoa Iosepha i te tupuraa i te rahi o Iesu. A aupuru maitai noa ’i Iosepha i ta ’na tamaroa iti, ua rahi mai Iesu ei tane pautuutu maitai. Ua haapii atoa Iosepha ia ’na ia rave i te ohipa. Inaha, aita noa Iesu i piihia “te tamaiti a te tamuta,” “te tamuta” atoa râ. (Mar. 6:3) Ua haapii maitai iho â ïa Iosepha i ta ’na tamaiti. E pee te hoê upoo utuafare î i te paari ia Iosepha. E aupuru maitai e e haapii oia i ta ’na mau tamarii, ia ite hoi ratou i te rave i te ohipa ei imiraa na ratou.

31. (a) Ia au i te faatiaraa Bibilia, eaha te nehenehe e mana‘o no nia i te poheraa o Iosepha? (A hi‘o atoa i te tumu parau “ Inafea to Iosepha poheraa?”) (b) Eaha te hi‘oraa ta Iosepha i vaiiho mai?

31 I muri a‘e i to Iesu bapetizoraahia i te 30raa o to ’na matahiti, aita te Bibilia i faahiti faahou ia Iosepha. E au ra ïa e e vahine ivi Maria i to Iesu haamataraa i ta ’na taviniraa. (A hi‘o i te tumu parau “ Inafea to Iosepha poheraa?”) Ua vaiiho mai râ Iosepha i te hi‘oraa maitai roa o te hoê papa tei paruru e tei aupuru i to ’na utuafare, e tei amo maite i ta ’na hopoia e tae noa ’tu i te hopea. Ia pee ïa te mau papa atoa, te mau upoo utuafare atoa, e pauroa te Kerisetiano i te faaroo o Iosepha.

^ par. 4 I tera tau, hoê â faufaaraa to te momo‘araa e to te faaipoiporaa, e ere i te ohipa hauti.

^ par. 8 E ere tera “fetia” i te hoê fetia mau. E ere atoa na te Atua i faatae mai i te reira. Papu roa, ua faaohipa Satani i tera ravea maere no ta ’na opuaraa ino e haapohe ia Iesu.

^ par. 11 Te haapapu ra te Bibilia e ua faatupu Iesu i ta ’na semeio matamua, te “tapao matamua,” i muri a‘e i to ’na bapetizoraa.—Ioa. 2:1-11.