Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A haapii i to tamarii

 HAAPIIRAA 10

E tamaiti auraro noa Iesu

E tamaiti auraro noa Iesu

Mea ohie anei ia faaroo i to oe na metua?— I te tahi taime, e ere iho â i te mea ohie. Ua ite anei oe e ua faaroo, aore ra auraro, Iesu ia Iehova e i to ’na na metua?— E nehenehe to ’na hi‘oraa e tauturu atu ia faaroo i to oe na metua noa ’tu e e ere i te mea ohie. E hi‘o ana‘e e nafea.

Hou a haere mai ai i te fenua nei, i ora na Iesu i to ’na Metua ra o Iehova i te ra‘i. E metua atoa râ to ’na i te fenua nei o Iosepha e Maria to raua i‘oa. Ua ite anei oe mea nafea raua i riro mai ai ei metua no ’na?—

Ua rave Iehova i te ora o Iesu e ua tuu i te reira i roto ia Maria ia fanauhia e ia ora Iesu i te fenua nei. E semeio tera! Mai te tahi atu mau aiû i roto i te opu o to ratou mama, ua rahi atoa mai Iesu i roto i te opu o Maria. Fatata e iva ava‘e i muri a‘e, fanauhia mai nei oia. Mea na reira ïa Maria e ta ’na tane Iosepha i riro mai ai ei metua no Iesu i te fenua nei.

E 12 matahiti to Iesu i rave ai oia i te tahi mea tei haapapu i to ’na here rahi i to ’na Metua ra o Iehova. Ua tupu te reira a tere ai o ’na e to ’na utuafare i Ierusalema no te oroa Pasa. I nia i te purumu no te ho‘i i te fare, ite a‘era Maria e Iosepha e aita Iesu ia ratou ra. Ua ite anei oe teihea o ’na?—

No te aha Iesu i haere ai i te hiero?

Ua ho‘i oioi atura Iosepha e Maria i Ierusalema no te imi ia Iesu. Ua peapea roa raua, aita hoi oia i itehia mai. E toru mahana i muri a‘e, hitimahuta ’tura raua i te iteraa ia ’na i te hiero! I to oe mana‘o, no te aha o ’na i haere ai i reira?— No te mea i tera vahi o ’na e nehenehe ai e haapii no nia i to ’na Metua ra o Iehova. Ua here oia ia Iehova e ua hinaaro e ite e nafea oia e auhia ’i e te Atua. Ei tamarii aore ra ei taata paari, ua auraro noa Iesu ia Iehova. Ua na reira atoa noa ’tu e e mea fifi e e titauhia ia mauiui o ’na. Ua faaroo atoa anei Iesu ia Iosepha e Maria?— Te parau ra te Bibilia e e.

Eaha te haapii mai i te hi‘oraa o Iesu?— Noa ’tu e mea fifi, e titauhia ia faaroo i to oe na metua. E na reira anei oe?—

A TAIO I ROTO I TA OE BIBILIA