Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 12

Na Iakoba i fana‘o i te tufaa

Na Iakoba i fana‘o i te tufaa

E 40 matahiti to Isaaka a faaipoipo ai oia ia Rebeka. Ua here roa oia ia ’na. I muri iho, ua fanau Rebeka e piti tamaiti, e maehaa ïa.

O Esau te tamaiti matahiapo e o Iakoba to ’na teina. Mea au roa na Esau ia haere na rapae e e taata a‘ua‘u animara aravihi oia. Area o Iakoba, mea au roa na ’na ia ohipa i te fare.

I taua tau ra, ia pohe te metua tane, e horoahia te rahiraa o te fenua e o te moni i te tamaiti matahiapo. E parauhia te reira e tufaa. No to Isaaka utuafare, i roto i tera tufaa, te vai atoa ra te mau mea atoa ta Iehova i fafau ia Aberahama. Aita o Esau i haapao a‘e i taua mau parau fafau. Ua ite râ o Iakoba e mea faufaa roa te reira.

I te hoê mahana a‘ua‘uraa animara, ua ho‘i mai Esau i te fare e ua rohirohi roa oia. Ua hau‘a oia i te maa au mau ta Iakoba i tunu. Ua parau Esau: ‘Pohe poia roa vau! Horoa mai na tera maa uteute!’ Na ô atura Iakoba: ‘Na reira! Na mua roa râ, a fafau mai e e horoa oe ia ’u i ta oe tufaa.’ Pahono atura Esau: ‘E ere tera tufaa i te mea faufaa! Na oe ïa te reira. Hinaaro noa vau e tamaa.’ A feruri na: e faaotiraa î i te paari anei ta Esau i rave? Aita roa ’tu. Ua vaiiho Esau i te hoê ohipa faufaa roa no te tahi noa maa uteute.

Inaha ua ruau roa Isaaka, e taime tano ïa no ’na no te haamaitai i ta ’na tamaiti paari a‘e. Tera râ, ua tauturu Rebeka ia Iakoba, te tamaiti apî a‘e, ia fana‘o i tera haamaitairaa.  I to Esau iteraa i te reira, ua riri roa ’tura oia e ua opua ’tura oia i te haapohe i to ’na taeae. Ua hinaaro Isaaka e Rebeka e paruru ia Iakoba. No reira raua i parau ai ia ’na: ‘A haere e ora i ô Labana, te taeae o ta oe mama, tae roa ’tu i te taime e pee ai i to Esau riri.’ Ua faaroo Iakoba i te a‘oraa a to ’na na metua e ua horo ê oia no to ’na ora.

“Eaha hoi te apî ia noaa i te hoê taata te ao taatoa, a ere ai râ oia i to ’na ora? Eaha hoi ta te hoê taata e horoa no to ’na ora?”—Mareko 8:36, 37