Eaha to roto?

Mau faaho'iraa ê

Tapura tumu parau

Ite no Iehova

Tahiti

Ta ’u e haapii no roto mai i te Bibilia

 HAAPIIRAA 45

Te hoê faatereraa tatuhaahia

Te hoê faatereraa tatuhaahia

A haamori ai Solomona ia Iehova, ua vai hau noa to Iseraela. Ua faaipoipo râ o Solomona i e rave rahi vahine no te mau fenua ê e ua haamori tera mau vahine i te mau idolo. Ua taui mǎrû mai Solomona i to ’na huru e ua haamata atoa oia i te haamori i te mau idolo. Ua riri roa o Iehova. Ua parau oia ia Solomona: ‘E tatarahia Iseraela i to oe utuafare e e tatuhaahia te reira na roto e piti tuhaa. E horoa ’tu vau i te tuhaa rahi a‘e i te hoê o ta oe mau tavini e e faatere to oe utuafare i nia i te tuhaa iti a‘e.’

Ua haapapu atu â Iehova i to ’na faaotiraa ma te tahi atu ravea. I tere na hoê o ta Solomona mau tavini, o Ieroboama to ’na i‘oa, a farerei ai oia i te peropheta, o Ahia. Ua tumutu Ahia i to ’na iho ahu na roto e 12 tuhaa e ua parau oia ia Ieroboama: ‘E tatara Iehova i te faatereraa i Iseraela i to Solomona utuafare e e tatuhaa oia i te reira na roto e piti tuhaa. A rave na tuhaa e ahuru no te mea o oe te faatere i nia i na ahuru opu.’ Ua ite te arii Solomona i te reira e ua hinaaro oia e haapohe ia Ieroboama! Ua horo ê atu Ieroboama no te haere i Aiphiti. I muri iho, ua pohe o Solomona e ua riro ta ’na tamaiti, o Rehoboama to ’na i‘oa, ei arii. No Ieroboama, e ere i te mea atâta faahou ia ho‘i i Iseraela.

 Ua parau te mau matahiapo o Iseraela ia Rehoboama: ‘Ia ohipa maitai oe i nia i te nunaa, e vai taiva ore te nunaa ia oe.’ Ua parau râ te mau hoa apî a‘e o Rehoboama: ‘E titauhia ia vai etaeta oe i nia i te nunaa! Ia ohipa rahi atu â ratou!’ Ua pee Rehoboama i te a‘oraa o to ’na mau hoa apî a‘e. Ua rave ino oia i te nunaa e ua orure hau mai te nunaa. Ua faariro ratou ia Ieroboama ei arii i nia i na opu ahuru. O na opu ahuru te faatereraa o Iseraela. Ua riro te tahi atu na opu e piti ei faatereraa o Iuda e ua vai taiva ore tera nunaa ia Rehoboama. Ua tatuhaahia ïa na opu 12 i teie nei.

Aita Ieroboama i hinaaro ia haere to ’na nunaa e haamori i te Atua i Ierusalema, i reira hoi te faatereraa a Rehoboama. Ua ite anei oe no te aha? Ua riaria Ieroboama ia faarue te nunaa ia ’na e ia turu ratou ia Rehoboama. Ua hamani ïa oia e piti kafa auro e ua parau oia i te nunaa: ‘Mea atea roa Ierusalema. E nehenehe outou e haamori i te Atua i ǒ nei.’ Ua haamata te nunaa i te haamori i na kafa auro e piti e ua mo‘e faahou â ia ratou ia Iehova.

“Eiaha outou ia amui-au-ore-hia i te feia aita e tiaturi ra ia Iesu. E tuati anei te parau-tia i te ohipa ino? . . . E apiti anei te taata e tiaturi ra ia Iesu i te taata e ore e tiaturi ra?”—Korinetia 2, 6:14, 15