Eaha to roto?

Mau faaho'iraa ê

Tapura tumu parau

Ite no Iehova

Tahiti

Iesu te e‘a, te parau mau, te ora

 PENE 9

Paariraa mai i Nazareta

Paariraa mai i Nazareta

MATAIO 13:55, 56 MAREKO 6:3

  • RAHIRAA MAI TE UTUAFARE O IOSEPHA RAUA MARIA

  • HAAPIIRAA IESU I TE HOÊ TOROA

Ua paari mai Iesu i Nazareta, te hoê oire iti. Tei te pae apatoerau taua oire ra, i te hoê tuhaa fenua mou‘a parauhia Galilea, i te pae tooa o te râ o te roto rahi parauhia miti o Galilea.

E piti paha matahiti to Iesu i to ’na afairaahia e Iosepha raua Maria i reira mai Aiphiti mai. E au ra e i taua taime ra, o ’na ana‘e ta raua tamarii. I muri a‘e râ, fanauhia maira to Iesu mau taeae ra o Iakobo, Iosepha, Simona e Iuda. E tamahine atoa ta Iosepha raua Maria, te mau tuahine ïa o Iesu. E ono a‘e ïa taeae e tuahine to Iesu no muri mai ia ’na, hoê â metua vahine to ratou.

Parau mau, e fetii ê atu to Iesu. Ua matau ê na tatou ia Elisabeta e ta ’na tamaiti o Ioane. I te pae apatoa roa i Iudea raua e faaea ’i. I pihai iho mai i Galilea, te vai ra o Salome, o Zebedaio ta ’na tane faaipoipo. E au ra e e tuahine o ’na no Maria te metua vahine o Iesu. Mai te peu tera iho â, e taeae fetii ïa no Iesu ta raua na tamaiti o Iakobo raua Ioane. Aita tatou i ite e hoê â anei to ratou paariraa mai. I muri a‘e râ, e hoa piri roa ratou e e aposetolo raua na Iesu.

Ua rohi Iosepha no te faatamaa i to ’na utuafare e rahi mai ra. E tamuta oia. Ua faaamu Iosepha ia Iesu mai ta ’na iho tamaiti. No reira Iesu i piihia ’i “te tamaiti a te tamuta.” (Mataio 13:55) Ua haapii Iosepha ia Iesu i te toroa tamuta atoa, e ua ite roa Iesu i te rave i taua ohipa ra. Inaha,  ua faahiti te taata ia Iesu i muri a‘e mai “te tamuta.”—Mareko 6:3.

I roto i te oraraa o Iosepha e to ’na utuafare, o te haamoriraa ia Iehova te mea faufaa roa ’‘e. Ua pee maite raua Maria i te ture a te Atua ia Mose, ma te haapii i ta raua mau tamarii i te mau ohipa pae varua ia parahi ratou i roto i te fare, ia haere na te e‘a, ia taoto e ia tia mai. (Deuteronomi 6:6-9) E sunago tei Nazareta. Papu roa e ua afai tamau Iosepha i to ’na utuafare i reira no te haamoriraa. I muri a‘e, i haere na Iesu i te sunago “mai ta ’na i matau i te mahana Sabati.” (Luka 4:16) I oaoa roa atoa na te utuafare i to ratou mau tere tamau i te hiero o Iehova i Ierusalema.