Imbaga la nen Jesus ed saray ondedengel ed sikato diad Perea a “dakel so unaan a magmaliw ya unor, tan unor a magmaliw ya unaan.” (Mateo 19:30) Indanet to iya ed panamegley na ilustrasyon nipaakar ed saray komikimey ed kaubasan:

“Say Panarian na tawen et singa sakey a toon akankayarian na kaubasan, ya angabkabuasan a pinmaway pian mangupa na saray mankimey ed kaubasan to. Kayari ton akapipakna ya upaan iray komikimey na sakey a denario ed sakey agew, imbaki to rad kaubasan to. Sanen sikatoy pinmaway met ed komatlon oras, anengneng toy arum ya andian na trabaho a manalalagey labat diad tindaan; tan inkuan tod sikara, ‘La kayo met ed kaubasan, tan upaan ta kayoy duga.’ Kanian linma ra. Sikatoy pinmaway lamet ed komanem tan ed komasiam ya oras tan ontan lamet so ginawa to. Diad kaunoran, nen koma-11 ya oras, sikatoy pinmaway tan anengneng to ni arum a manalalagey labat, tan inkuan tod sikara, ‘Akin a sanagew kayo lan akaalagey dia ya andian na trabaho?’ Inyebat da, ‘Ta anggapoy mangupa ed sikami.’ Inkuan tod sikara, ‘La kayo met sirin ed kaubasan.’”​—Mateo 20:1-7.

Nayarin si Jehova a Dios so iisipen na saray onderengel ed si Jesus sanen nadngel day nipaakar ed “Panarian na tawen” tan “akankayarian na kaubasan.” Diad Kasulatan, atukoy si Jehova bilang akankayarian na kaubasan, a saya so mangirerepresenta ed nasyon na Israel. (Salmo 80:8, 9; Isaias 5:3, 4) Saramay kabiangan ed Ganggan a sipanan et nikompara ed saray komikimey ed kaubasan. Balet, ag-iyiilustra nen Jesus so apalabas. Dedeskribien to so kipapasen a nagagawa ed panaon to.

Panisiaan na saray relihyoson lider, a singa saray Fariseo ya agano nin anubok ed si Jesus nipaakar ed diborsyo, a mansasagpot ira ed panlilingkor dad Dios. Singa ira saramay sanagew a komikimey a maniilalon mangawat na kompleton sueldo, salanti, sakey a denario ed sakey agew.

Ipapasen na saray saserdote tan arum ed sayan grupo a daiset so nagagawaan na saray ordinaryon Judio ed panlilingkor dad Dios, a singa ra saray aliwan sanagew a mankikimey diad kaubasan na Dios. Diad ilustrasyon nen Jesus, sarayan lalaki iramay nantrabaho ed “komatlon oras” (alas-9 na kabuasan) odino diad bandad ngarem​—diad komanem, komasiam, tan koma-11 ya oras (alas-5 na ngarem).

Saray lalaki tan bibii ya ontutumbok ed si Jesus et impasen a “nisamban totoo.” (Juan 7:49) Diad intero lawarin bilay da et managsigay odino trabahador ira. Insan nen 29 C.E., imbaki na “akankayarian na kaubasan” si Jesus pian tawagen irayan pakaskasin totoo a mankimey parad Dios bilang saray disipulo na Kristo. Sikara may “unor” a tinukoy nen Jesus, saray nankimey ed kaubasan ed koma-11 ya oras.

Diad sampot na ilustrasyon to, deneskribe nen Jesus so agawa kayari na sanagew a kimey: “Kasabi labi, inkuan na akankayarian na kaubasan ed manag-asikaso to, ‘Tawag mo ray komikimey tan iter mod sikara so upa ra, manlapud saramay unor ya anggad saramay unaan.’ Kasabi na saramay nankimey ed koma-11 ya oras, angawat ira na sansakey a denario. Kanian sanen sinmabi iramay akaunan nankimey, abaloan dan mas baleg so awaten da, balet sansakey met a denario so inyupa ed sikara. Kapangawat dad satan et nanreklamo rad samay akankayarian na kaubasan tan inkuan da, ‘Sakey oras labat a nankimey irayay unor a lalaki, balet ta imparam ira ed sikami ran nankimey a sanagew diad mansasnit a petang!’ Balet inebatan to so sakey ed sikara, ‘Kaaro, anggapoy ginawak a mauges ed sika. Agta say nampaknaan ta et sakey a denario? Alam so betang mo tan la ka la. Labay kon miparad upam so iter ko ed sarayan unor. Anggapo tay kanepegan kon gawaen so labay ko ed saray kayarian ko? Odino makakaibeg ka lapud angipanengneng ak na kamaongan?’ Diad onian paraan et magmaliw ya unaan iray unor, tan magmaliw ya unor iray unaan.”​—Mateo 20:8-16.

 Nayarin nanisip iray disipulo no antoy kabaliksan na sampot a parte na ilustrasyon nen Jesus. Panon a magmaliw ya “unor” iray relihyoson lider ya ipapasen day inkasikara ya “unaan”? Tan panon a magmaliw ya “unaan” iray disipulo nen Jesus?

Saray disipulo nen Jesus, ya ipapasen na saray Fariseo tan arum a totoo bilang “unor,” et magmaliw ya “unaan,” pian mangawat na kompleton upa. Diad ipatey nen Jesus, agla awaten na Dios so literal a nasyon na Israel, balet sikatoy mamili na sakey a balon nasyon, “say Israel na Dios.” (Galacia 6:16; Mateo 23:38) Tinukoy ira nen Juan Bautista sanen imbaga to so nipaakar ed bautismo ed panamegley na masanton espiritu. Saray “unor” so unonan mangawat ed satan a klase na bautismo tan naikdan ira na pribilehyon magmaliw a tasi nen Jesus “diad sankaarawian a pasen na dalin.” (Gawa 1:5, 8; Mateo 3:11) No natalosan na saray disipulo so baleg a pananguman a tutukoyen nen Jesus, natebek da ya arapen day pirmin pambusol na saray relihyoson lider, a magmaliw ya “unor.”