Onlad karga

Onlad saray karga

 KAPITULO 120

Manbubunga Bilang Sanga tan Kakaaro nen Jesus

Manbubunga Bilang Sanga tan Kakaaro nen Jesus

JUAN 15:1-27

  • SAY TUAN SENGEG NA UBAS TAN SARAY SANGA

  • NO PANON A MANSIANSIA ED PANANGARO NEN JESUS

Mantotongtong si Jesus tan saray matoor ya apostol to tan papasesegen to ra. Nayarin pegley-labi lad saman. Imbaga nen Jesus so sakey a mapuersan ilustrasyon:

“Siak so tuan sengeg na ubas tan say Amak so tomatanem.” (Juan 15:1) Say ilustrasyon to et miparad samay imbaga pigaran siglo lay apalabas nipaakar ed nasyon na Israel, a tinawag ya sengeg na ubas nen Jehova. (Jeremias 2:21; Oseas 10:1, 2) Balet ipulisay la nen Jehova itan a nasyon. (Mateo 23:37, 38) Kanian walay balon bengatla ya impaamta nen Jesus ed sikara. Sikato so sengeg na ubas ya intanem nen Ama to manlapu nen sikatoy nilanaan To na masanton espiritu nen 29 C.E. Balet impanengneng nen Jesus ya aliwan sikato labat so isisimbolo na sengeg na ubas sanen inkuan to:

“Eekalen [na Amak ed] siak so kada sanga ya agmanbubunga, tan lilinisan toy balang sakey a manbubunga, pian manbunga itan na mas dakel. . . . No panon a say sanga et agmakapanbungan bukor no agmansiansia ed sengeg na ubas, agkayo met makapanbunga no agkayo mansiansian akikasakey ed siak. Siak so sengeg na ubas; sikayo ray sanga.”​—Juan 15:2-5.

Insipan nen Jesus ed saray matoor a disipulo to ya sano akaalis la et mangibaki na sakey a mananulong, say masanton espiritu. Kayari limamplo tan sakey ya agew, sanen naawat na saray apostol tan arum ni itan ya espiritu, nagmaliw iran sanga na sengeg na ubas. Tan amin a “sanga” et mansiansian nikasakey ed si Jesus. Diad anton gagala?

Imbaga to: “Siopaman a mansiansiad impikasakey tod siak, tan akikasakey ak met ed sikato, sikatoy manbungay dakdakel; ta anggapon balot so nagawaan yo no nisian kayod siak.” Sarayan “sanga”​—saray matoor a papatumbok to​—et manbunga na dakdakel, ya aligen da ray kualidad nen Jesus, makuli dan itongtong so nipaakar ed Panarian na Dios, tan manggawa ray dakel a babangatan. Panon to no say sakey et agmansiansiad impikasakey tod si Jesus tan agmanbunga? Inkuan nen Jesus: “Siopaman ya agmansiansiad impikasakey tod siak et ibantak.” Balet inkuan to met: “No mansiansia kayod impikasakey yod siak tan mansiansiad sikayo iray salitak, kerew yoy antokaman a labay yo tan niiter itan ed sikayo.”​—Juan 15:5-7.

Natan pinawil nen Jesus imay amidua ton binitla​—say pangunor ed saray ganggan to. (Juan 14:15, 21) Deneskribe to so manunan paraan pian napaneknekan na saray disipulo a gagawaen da itan: “No unoren yo iray ganggan ko, mansiansia kayod arok, no panon ya inunor ko iray ganggan na Ama tan nansiansia ak ed aro to.” Balet wala ni kaukolan dan gawaen likud ed pangarod si Jehova a Dios tan ed Anak to. Inkuan nen Jesus: “Iganggan ta kayo a manaaroan kayo a singa ed impangarok ed sikayo. Anggapo lay walaan na mas baleg a panangaro nen saya, a say sakey et iter toy bilay to parad kakaaro to. Kakaaro ta kayo no gagawaen yoy igaganggan kod sikayo.”​—Juan 15:10-14.

Pigay oras labat la et ipanengneng nen Jesus so panangaro to diad pangiter toy bilay to parad amin a mangipapatnag na pananisia ed sikato. Say alimbawa to et nepeg a mamakiwas ed saray papatumbok to a nawalaan met na ontan a masakripisyon aro ed sakey tan sakey. Sayan aro so mangipabidbir ed sikara, unong ed samay akauna lan imbaga nen Jesus: “Diad saya et naamtaan na amin a sikayo iray disipulok​—no manaaroan kayo.”​—Juan 13:35.

Nepeg ya imanoen na saray apostol a tinawag ira nen Jesus a ‘kakaaro.’ Imbaga to no akin: “Tinawag ta kayon kakaarok, lapud impaamtak lad sikayo so amin a nadngel kod Amak.” Talagan baleg a pribilehyo itan​—a magmaliw iran kakaaro nen Jesus tan naamtaan da no antoy imbaga na Ama ed sikato! Balet, pian mansiansia iyan relasyon, kaukolan day ‘mantultuloy a manbunga.’  No gawaen da itan, imbaga nen Jesus, “antokaman a kerewen yod Ama diad ngaran ko et iter tod sikayo.”​—Juan 15:15, 16.

Say panaaroan na sarayan “sanga,” saray disipulo to, et ontulong ed sikaran nasungdoan no antoy onsabi. Impasakbay tod sikara a busolen ira na mundo, balet oniay makaligliwan imbaga to: “No busolen kayo na mundo, amta yon binusol to ak la antis to kayon busolen. No kabiangan kayoy mundo, say mundo et manliket ed sikayo lapud kayarian to kayo. Natan ta agkayo kabiangay mundo, . . . busolen kayo na mundo.”​—Juan 15:18, 19.

Impaliwawa ni nen Jesus no akin ya busolen ira na mundo: “Gawaen da irayan amin sumpad sikayo lapud ngaran ko, ta agda kabat imay angibaki ed siak.” Imbaga nen Jesus a saray milagro to et singa manguukom ed saramay mamubusol ed sikato: “No agda anengneng iray milagron ginawak ya agni agawaan na anggan siopa, anggapo komoy kasalanan da; balet natan et anengneng da ak tan binusol da ak pati say Amak.” Diad tua, say panamusol da et anumpal ed propesiya.​—Juan 15:21, 24, 25; Salmo 35:19; 69:4.

Insipan lamet nen Jesus ya ibaki to so mananulong, say masanton espiritu. Satan a makapanyarin puersa et naawat na amin a papatumbok to tan ontulong ed sikaran manbunga, a “mantasi” ira.​—Juan 15:27.