Onlad karga

Onlad saray karga

 KAPITULO 129

Imbaga nen Pilato: “Nia so Too!”

Imbaga nen Pilato: “Nia so Too!”

MATEO 27:15-17, 20-30 MARCOS 15:6-19 LUCAS 23:18-25 JUAN 18:39–19:5

  • SINALI NEN PILATO YA IBULOS SI JESUS

  • LABAY YA PAIBULOS NA SARAY JUDIO SI BARABAS

  • SI JESUS ET INELEK-ELEKAN TAN MINALTRATO

Imbaga nen Pilato ed saray totoon malabay a mamatey ed si Jesus: “Anggapoy aromog kon basiyan na saray iyaakusa yod sikato. Diad tua, anggapo met so aromog nen Herodes.” (Lucas 23:14, 15) Natan, lapud labay nen Pilato ya ibulos si Jesus, sinali toy arum nin paraan, a kuan tod saray totoo: “Unong ed kustombre yo et kaukolan a mangibulos ak na sakey a too parad sikayo no Paskua. Kanian labay yon ibulos ko so Ari na saray Judio?”​—Juan 18:39.

Amta nen Pilato a walay sakey a priso a manngaran na Barabas, a kabkabat a matakew, rebelde ed gobierno, tan managpatey. Kanian tinepet nen Pilato: “Siopay labay yon ibulos ko, si Barabas odino si Jesus a tatawagey Kristo?” Lapud asugsogan na saray manunan saserdote, kinerew na saray totoo ya say ibulos et si Barabas aliwan si Jesus. Tinepet lamet nen Pilato: “Siopad sikaran dua so labay yon ibulos ko?” Inyeyag da: “Si Barabas”!​—Mateo 27:17, 21.

Adismayay Pilato, kanian tinepet to: “Anto sirin so gawaen kod si Jesus a tatawagey Kristo?” Inyeyag na totoo: “Ipasak ed poste!” (Mateo 27:22) Anggapoy baing dan kinerew so ipatey na sakey a toon andiay kasalanan. Akikasi si Pilato: “Akin, antoy mauges a ginawa na sayan too? Anggapon balot so aromog kod sikato a makanepegan na patey; sikatoy dusaen ko sirin tan ibulos ko la.”​—Lucas 23:22.

Anggaman aminpigan akikasi si Pilato, inyeyag na amin a totoo: “Ipasak ed poste!” (Mateo 27:23) Inimpluensyaan na saray lider na relihyon iray totoo, kanian agla ra nakontrol, a labay dan walay onagus a dala! Tan aliwa itan a dala na sakey a kriminal odino managpatey, noagta dala na sakey a toon andiay kasalanan ya inawat ed Jerusalem bilang Ari limay agew ni labat so apalabas. No wadman iray disipulo nen Jesus, nansiansia ran mareen tan ag-ira nampalikas.

Anengneng nen Pilato ya anggapoy nagawaan to. Lalon inmingal iray totoo, kanian nampaalay danum tan inurasan to ray lima to ed arapan da. Imbaga tod sikara: “Anggapoy eebatan kod dala na sayan too. Sikayo lay makauley.” Anggan ontan so ginawa to, agnin siansia tinmunda iray totoo. Inkuan da: “Ebatan mi tan saray anak mi so dala to.”​—Mateo 27:24, 25.

Mas labay na gobernador a paliketen ira nen say gawaen no antoy amta ton duga. Kanian imbulos nen Pilato si Barabas ta satan so kerew da. Impalakseban toy Jesus tan impasiplatan to.

Kayari na sayan maruksan impansiplat, inawit na saray sundalo si Jesus diad palasyo na gobernador. Diman et nantitipon iray sundalo tan lalo  da nin minaltrato. Nanlaga ray koronan sabisabit tan inyan dad ulo to. Impabemben da met ed kawanan a lima nen Jesus so sakey a tanubong tan sinulongan day ambalbalangan balabal, a singa saray isusulong na arari. Ininsulto ra, a kuan da: “Maabig ya agew ed sika, Ari na saray Judio!” (Mateo 27:28, 29) Aliwan satan labat, nilutlutdaan day Jesus tan tinatampal da. Inala dad sikato may anawet a tanubong tan impekpek dad ulo to, kanian lalon pinmanek ed ulo to iray sabisabit na makapabaing a ‘korona’ to.

Say impangipatnag nen Jesus na nikaduman biskeg tan dignidad diad sarayan amin et pandinayewan nen Pilato kanian sinali to lamet a paliisan so responsabilidad, a kuan to: “Nengneng yo! Sikatoy ipaway kod sikayo pian naamtaan yon anggapoy aromog kon kasalanan to.” Kasin inisip nen Pilato a no ipaway toy Jesus natan ya asugatan tan mandala et napareen to ray totoo? Legan ya akaalagey si Jesus ed arap na totoon anggapoy puso, imbaga nen Pilato: “Nia so too!”​—Juan 19:4, 5.

Anggaman abogbog tan asugatan si Jesus, makapadinayew so impanengneng ton dignidad tan inkakalmado, ya anggan si Pilato et binidbir to itan, ta napatnagan ed saray salita to so respeto tan panangasi.