Onlad karga

Onlad saray karga

 KAPITULO 113

Leksion ed Pagmaliw ya Makuli​—Saray Talento

Leksion ed Pagmaliw ya Makuli​—Saray Talento

MATEO 25:14-30

  • IMBAGA NEN JESUS SO ILUSTRASYON NIPAAKAR ED SARAY TALENTO

Legan ya kaiba to ni ray apatiran apostol diad Palandey na Saray Olibo, angibaga lamet na ilustrasyon si Jesus. Pigaran agew lay apalabas, nen walad Jerico, imbaga toy ilustrasyon nipaakar ed saray mina pian ipanengneng ya say Panarian et nagawa nid arapen. Say ilustrasyon ya ibabaga to natan et dakel so piparaan tod saman ya ilustrasyon. Kaiba itan ed ebat tod tepet no antoy tanda na kiwawala to tan say kaunoran a parte na sistema na mundo. Idadanet na satan ya saray disipulo et nepeg ya makuli ed inmatalek ed sikara.

Inggapo nen Jesus: “Singa itan sakey a too ya onlad arum a bansa, ya impatawag to iray ariripen to tan inmatalek tod sikara so kaykayarian to.” (Mateo 25:14) Lapud inkompara la nen Jesus so sarili to ed toon linmad arawi ya dalin “pian awaten toy pakauley,” mainomay ya natalosan na saray apostol ya si Jesus so irerepresenta na “too.”​—Lucas 19:12.

Antis ya inmalis imay too, inmatalek tod saray aripen to iray kaykayarian to. Legan na talora tan kapalduan taon na ministeryo nen Jesus, say angisentroan to et say pangipulong ed maong a balita na Panarian na Dios, tan impasal to iray disipulo to ed sayan kimey. Natan et onalis la, matalek ya gawaen day imbangat tod sikara.​—Mateo 10:7; Lucas 10:1, 8, 9; ikompara so Juan 4:38; 14:12.

Diad ilustrasyon, panon ya inapag na too iray kaykayarian to? Inkuan nen Jesus: “Inikdan toy limaran talento imay sakey, duara ed samay komadua, tan sakey ed samay komatlo, kada sakey unong ed abilidad to, insan sikatoy linmad arum a bansa.” (Mateo 25:15) Antoy gawaen na saray aripen ed inmatalek ed sikara? Kasin makuli dan usaren itan pian makalmo so katawan da? Inkuan nen Jesus ed saray apostol:

“Tampol a linma imay angawat na limaran talento tan innegosyo to iratan tan anubo na limara ni. Ontan met, samay angawat na duara so anubo na duara ni. Balet samay aripen ya angawat na saksakey et inkotkot tod dalin imay kuarta na katawan to.” (Mateo 25:16-18) Antoy nagawa no ompawil so katawan?

Intuloy nen Jesus: “Kayari na abayag a panaon, sinmabi so katawan na saraman ya ariripen tan akikuentaan ed sikara.” (Mateo 25:19) Samay inmuna ya duara et ginawa day anggaay nayarian da, “kada sakey unong ed abilidad to.” Kada aripen et makuli tan inyanap da iray inmatalek ed sikara. Samay akaawat na limaran talento et adoble to itan, ontan met ed samay akaawat na duaran talento. (Nensaman, say sakey a komikimey et kaukolan toy mantrabaho na 19 taon pian makalmo na sakey a talento.) Parehoy komendasyon na katawan ed sikara: “Maabig so agawaan mo, maong tan matoor ya aripen!  Matoor kad daiset a bengatla. Turoen ta kan mangasikaso ed dakel a bengatla. Miliket kad katawan mo.”​—Mateo 25:21.

Balet duma ed samay aripen ya akaawat na sakey a talento. Inkuan to: “Katawan, amtak ya estrikto kan too, a manaani kad agmo tinaneman tan mantitipon kad agmo tinaepan. Kanian tinmakot ak tan inkotkot kod dalin so talentom. Nia la imay kayarian mo.” (Mateo 25:24, 25) Agto anggan imbangko so kuarta pian anggan panon et makatubo komon so katawan to. Say ginawa to et aliwan panliketan na katawan to.

Kanian duga labat ya sikatoy tinawag na katawan to ya ‘mauges tan mangiras ya aripen.’ Say walad sikato et inala tan inter ed aripen ya maliket ya mankimey. Imbaga na katawan so prinsipyo to: “Balang sakey a walaan et naikdan ni na dakel, tan sikatoy nawalaay amayamay. Balet samay andian, anggan say walad sikato et alaen ni.”​—Mateo 25:26-29.

Dakel so pannonotan na saray disipulo anggan diad saya labat ya ilustrasyon. Natalosan dan say inmatalek nen Jesus ed sikara ya pribilehyon manggaway disipulo et importantin maong. Tan iilaloan ton mankuli ra ed sayan pribilehyo. Ag-inisip nen Jesus ya amin et kaukolan ya pareparehoy nagawaan dad panagpulong a kimey ya ingganggan tod sikara. Singa impaliwawa, nepeg a gawaen na kada sakey so anggaay nayarian to “unong ed abilidad to.” Kanian seguradon agnaliketan si Jesus no say sakey et “mangiras” tan agto gawaen so anggaay nayarian to pian iyanap iray kaykayarian na Katawan to.

Balet seguradon maliket iray apostol ed sayan panamaseguro: “Balang sakey a walaan et naikdan ni na dakel”!