Onlad karga

Onlad saray karga

 KAPITULO 118

Sangsangan no Siopay Manunaan

Sangsangan no Siopay Manunaan

MATEO 26:31-35 MARCOS 14:27-31 LUCAS 22:24-38 JUAN 13:31-38

  • NANSIMBAWA SI JESUS NIPAAKAR ED POSISYON

  • NIPROPESIYA SO PANGIBURI NEN PEDRO

  • SAY ARO SO PAKABIDBIRAN NA SARAY PATUMBOK NEN JESUS

Diad sampot ya labi ya kaiba nen Jesus iray apostol to, imbangat to ra na balibalin leksion ed pagmaliw a mapaabeba diad impanguras tod saray sali da. Akin ya duga labat itan? Lapud impanengneng dan kakapuyan. Matakot ira ed Dios, balet pampapagaan da nin siansia no siopad sikaray manunaan. (Marcos 9:33, 34; 10:35-37) Pinmaway lamet itan ya kakapuyan da ed sayan labi.

Saray apostol et ‘nansasangsangan no siopad sikara so manunaan.’ (Lucas 22:24) Seguradon naermenan si Jesus ya nanenengneng to ran maneebatan! Antoy ginawa to?

Agto nampasnokan iray apostol, imbes sikatoy nankatunongan: “Saray arari na saray nasyon et pakakatawan ed totoo ra, tan saramay walaan na pakauley ed saray totoo et tatawagen a saray Manamalangkap. Balet aliwa kayo komon ya ontan. . . . Ta siopay mas manunaan, samay mamangan odino samay manseserbi? Agta samay mamangan?” Insan impanonot toy alimbawa ya lanang ton ipapanengneng ed sikara: “Balet siak so manseserbi ed sikayo.”​—Lucas 22:25-27.

Anggan wala ray kakapuyan na saray apostol, agda tinaynan si Jesus diad mairap iran situasyon. Kanian inkuan to: “Misipanan ak ed sikayo parad sakey a panarian, no panon a say Amak et akisipanan ed siak.” (Lucas 22:29) Sarayan lalaki et matoor a patumbok nen Jesus. Impaseguro to ya panamegley na sipanan tod sikara, nakaiba to rad Panarian tan miuley irad sikato.

Anggano wala itan ya balibalin ilalo da, too ni ran siansia ya agperpekto. Inkuan nen Jesus ed sikara: “Imbaga nen Satanas a labay to kayon yakayaken ya amin a singa trigo” ya nitaytayak. (Lucas 22:31) Impasakbay to met: “Diad sayan labi et taynanan yo ak ya amin, ta walan nisulat: ‘Pateyen ko so managpastol, tan nitaytayak iray karnero ed pulok to.’”​—Mateo 26:31; Zacarias 13:7.

Mataletalek ya kinmontra si Pedro: “Anggano taynan da kan amin, agta kan balot taynan!” (Mateo 26:33) Imbaga nen Jesus ed si Pedro ya antis ya onkukaok ya mamidua so lalong ed satan a labi, iburi toy Jesus. Balet inyarum ni nen Jesus: “Impikasi ta ka lan masimsimoon ta pian ag-onkapuy so pananisiam; tan sano akapawil ka la, pabiskeg mo iray agagim.” (Lucas 22:32) Balet ta mapekder ya imbaga nen Pedro: “Anggano kaukolan ya ompatey ak a kaibam, agta kan balot iburi.” (Mateo 26:35) Ontan met so imbaga na arum ya apostol.

Inkuan nen Jesus ed saray disipulo to: “Nakaiba yo ak ed daiset nin panaon. Anapen yo ak; tan singa imbagak lad saray Judio et ibagak met natan ed sikayo, ‘Agkayo makakar ed laen ko.’” Insan to inyarum: “Iter kod sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok​—no manaaroan kayo.”​—Juan 13:33-35.

Nen arengel nen Pedro so imbaga nen Jesus ya daiset labat lay panaon a sikatoy nakaiba da, intepet to: “Katawan, iner so laen mo?” Oniay inyebat nen Jesus: “Agmo ak nayarian a tumboken natan diman ed laen ko, balet ontumbok ka lanlamang.” Aguloan si Pedro kanian inkuan to: “Katawan, akin et agta ka nayarian a tumboken natan? Iter koy bilay ko parad sika.”​—Juan 13:36, 37.

Impanonot natan nen Jesus imay nen imbaki to ray apostol ya manpulong ed Galilea ya ag-ira mangaawit na pananginay kuarta o pananginay naakan. (Mateo 10:5, 9, 10) Intepet to: “Agta anggapoy kinmulang ed sikayo?” Inmebat ira: “Anggapo!” Balet antoy gawaen da ed saray onsublay ya agew? Oniay imbilin nen Jesus ed sikara: “Samay walaan na supot na kuarta et awiten to itan, pati say pananginay naakan, tan samay andian  na espada et ilako toy ilalatop ton kawes tan mangaliw na espada. Ibagak ed sikayo, no antoy nisulat et nepeg a nagawad siak, salanti, ‘Sikatoy impasen a sakey ed saray makasalanan.’ Ta nasusumpal la iya nipaakar ed siak.”​—Lucas 22:35-37.

Say tutukoyen nen Jesus et no ipasak da lad poste, kaiba iray makasalanan. Kayari na satan et pairapen ya maong iray patumbok to. Say amta ra et akaparaan ira tan inkuan da: “Katawan, niay duaran espada.” Inkuan tod sikara: “Magenap la itan.” (Lucas 22:38) Lapud saratan ya duaran espada, nawalaay pankanawnawa si Jesus ya mangibangat na sananey nin importantin leksion.