Onlad karga

Onlad saray karga

 KAPITULO 5

Inkiyanak nen Jesus​—Iner tan Kapigan?

Inkiyanak nen Jesus​—Iner tan Kapigan?

LUCAS 2:1-20

  • INYANAK SI JESUS ED BETLEHEM

  • BINISITA NA SARAY MANAGPASTOL SO KAPANGIYANAK YA JESUS

Si Cesar Augusto, say emperador na gobiernoy Roma, et ingganggan ton nepeg ya manparehistro so amin. Kanian kaukolan ya manbiahe si Jose tan Maria paonlad syudad na Betlehem a baley nen Jose, diad abalaten na Jerusalem.

Dakel so linmad Betlehem pian manparehistro. Say napanayaman labat nen Jose tan Maria et diad pukokan na asno tan arum ni ran ayep. Ditan inyanak si Jesus. Sikatoy binalkot nen Maria na abel tan imparukol tod kuwadra a pananganan na ayep.

Sineguro na Dios ya gawaen nen Cesar Augusto iyan ganggan ya manparehistro. Akin? Ta panamegley na sayan ganggan et seguradon iyanak si Jesus ed Betlehem, say baley na inmunan ateng to ya si Arin David. Abayag lan nipasakbay ed Kasulatan ya diad sayan syudad iyanak so insipan ya Manuley.​—Miqueas 5:2.

Talagan importantin labi iman! Diad uma et walay sinminag a liwawa ed saray managpastol. Gloria iman nen Jehova! Imbaga na sakey ya anghel na Dios ed saray managpastol: “Agkayo natatakot, ta linma ak dia pian ipasabi ed sikayo so maong a balita a mangiter na baleg a liket ed amin a totoo. Ta niyanak ed sikayo natan ed syudad nen David so sakey a manangiliktar, say Kristo a Katawan. Tan saya so panandaan yo: Naromog yoy sakey ya ugaw ya abalkot na abel tan akarukol ed kuwadra.” Insan dakel nin anghel so nampanengneng tan kuan da: “Nigloria so Dios ed tawen, tan diad dalin et niwalay deen ed saray totoon aabobonan to.”​—Lucas 2:10-14.

Kaalis na saray anghel, inkuan na saray managpastol ed kada sakey: “Onla tayo lan tampol sirin ed Betlehem tan nengnengen tayo iyan agawa ya impakabat ed sikatayo nen Jehova.” (Lucas 2:15) Linma ran tampol tan inanap day kapangiyanak ya Jesus a singa imbaga na anghel ya gawaen da. Nen inistorya na saray managpastol so imbaga na anghel ed sikara, nikelawan so amin ya akadngel ed satan. Inapresya tan impapuso nen Maria iratan ya imbaga ra.

Amayamay natan so manisian Disyembre 25 so inkiyanak nen Jesus. Balet diad Betlehem, mauran tan ambetel no Disyembre. No maminsan ni ingen et man-snow. No onman iran panaon, imposiblin mansanlabi ed uma iray managpastol tan saray pulok da. Tan imposible met ya iganggan na emperador na Roma iray totoon manrerebelde ed sikato ya manbiahe na pigaran agew diad panaoy ambetel pian manparehistro. Mapatnag sirin ya niyanak si Jesus ed manga bulan na Oktubre.