Onlad karga

Onlad saray karga

 KAPITULO 7

Binisita na Saray Astrologo si Jesus

Binisita na Saray Astrologo si Jesus

MATEO 2:1-12

  • TINUMBOK NA SARAY ASTROLOGO SO SAKEY A “BITEWEN” YA PAONLAD JERUSALEM INSAN DIAD SI JESUS

Wala ray lalakin nanlapud Bukig. Astrologo ira​—aaralen day posisyon na saray bitewen, kanian sarag da kunon amtaen so kabaliksan na saray nagagawad bilay na totoo. (Isaias 47:13) Nen wala rad lugar dad Bukig, akanengneng iray “bitewen” tan tinumbok da itan ya pigaran libon kilometro, aliwan paonlad Betlehem, noagta diad Jerusalem.

Nen sinmabi ray astrologo diman, intepet da: “Iner so kawalaan na samay niyanak ya ari na saray Judio? Ta anengneng mi so bitewen to sanen wala kamid Bukig, kanian linma kami dia pian sikatoy igalang mi.”​—Mateo 2:1, 2.

Naamtaan iya nen Arin Herodes na Jerusalem tan agaylay pasnok to. Kanian tinawag to iray manunan saserdote tan arum nin lider na relihyon na saray Judio tan tinepet to no iner iyanak so Kristo. Based Kasulatan so inyebat da: “Diad Betlehem.” (Mateo 2:5; Miqueas 5:2) Lapud satan, masekreton impatawag nen Herodes iray astrologo tan imbaga to: “La kayo tan seetan yon anapen so ugaw, tan sano aromog yo la, ipakabat yod siak ta pian onla ak met a mangigalang ed sikato.” (Mateo 2:8) Balet diad tua, papaanap nen Herodes so ugaw ta labay ton pateyen!

Kaalis na saray astrologo, walay makapakelaw ya agawa. Say “bitewen” ya anengneng da nen wala ni rad Bukig et akauna lad sikara. Kanian aliwa iyan ordinaryon bitewen, balet niwala iya pian mangigiyad sikara. Tinumbok itan na saray astrologo ya anggad tinmunda ed petek na abung nen Jose tan Maria tan wadmay ugaw nin anak da.

Kaloob na saray astrologo ed abung, anengneng day Maria ya kaibay ugaw nin Jesus. Sikaray dinmakmomo ed sikato tan niregaloan day balitok, olibano, tan mira. Kayari to, nen kuan da lan ompawil ed si Herodes, pinasakbayan ira na Dios diad kugip ya agla ra ompapawil diman. Kanian sinmempet la rad bansa ra tan duma lay dinalan da.

Siopay naisip mon angontrol ed “bitewen” ya angigiyad saray astrologo? Tandaan ya ag-ira direktan inggiya na satan ed si Jesus diad Betlehem. Imbes, inggiya to rad Jerusalem, ya diman et akitongtong ed sikaray Arin Herodes ya malabay a mamatey ed si Jesus. Tan onman komon so agawa no agsinmalet so Dios tan ag-apasakbayan iray astrologo ya agla ibabagad si Herodes no iner so kulaan nen Jesus. Malinew a say kalaban na Dios, si Satanas, so malabay a mamatey ed si Jesus, tan kinontrol toy bitewen pian nasumpal so gagala to.