Onlad karga

Onlad saray karga

 KAPITULO 21

Diad Sinagoga ed Nazaret

Diad Sinagoga ed Nazaret

LUCAS 4:16-31

  • BABASAEN NEN JESUS SO LUKOT NEN ISAIAS

  • SINALI NA SARAY TAGA NAZARET A PATEYEN SI JESUS

Seguradon mantatalaran la iray taga Nazaret. Mankakarpentero diman si Jesus antis ya inmalis pian manpabautismo ed si Juan manga sakey taon lay apalabas. Balet natan et kabkabat lan manggagaway makapakelkelaw iran bengatla. Sikatoy labalabay lan nanengneng na saray kabaleyan to ya manggaway milagro.

Lalo ran eksayted nen linmay Jesus ed sinagoga ra, a singa datin gagawaen to. Diman et manpipikasi ira tan babasaen da ray libro nen Moises, a singa gagawaen “diad saray sinagoga kada sabaton.” (Gawa 15:21) Babasaen met iray kabiangan na saray mapropetikon libro. Nen inmalagey si Jesus pian manbasa, mapatnag ya abirbir to ray dakel ya wadman lapud pigay taon ya inyatendi tod sinagoga ra. Inyawat dad sikatoy lukot nen propeta Isaias. Imbuskag tod pakabasaan na Sakey a nilanaan na espiritu nen Jehova, ya wala natan ed Isaias 61:1, 2.

Imbasa nen Jesus no panon a sayan impasakbay a Sakey et ipulong toy kibulos na saray naaripen, kipawil na pakanengneng na saray bulag, tan isabi na makapaliket a taon nen Jehova. Impawil nen Jesus so lukot ed lingkor tan inmirong. Sikatoy sankanengneng na amin a wadman. Insan nansalita, nayarin kalabas na pigaran minuto, tan oniay importantin kabiangan na imbaga to: “Diad sayan agew et asumpal iyan kasulatan a kaykayari yon nadngel.”​—Lucas 4:21.

Pandinayewan na totoo “iray makapasagyat ya ibabaga to,” tan inkuan da: “Agta saya imay anak nen Jose?” Balet lapud atebek ton labay dan nanengneng a manggaway milagro a singa saray narerengelan dan gagawaen to, intuloy nen Jesus: “Seguradon iyaplika yod siak iyan panangibaga, ‘Managtambal, paabig moy sarilim. Gawam met dia ed mismon baley mo iray nadngelan mi ya agawa ed Capernaum.’” (Lucas 4:22, 23) Nayarin parad saray datin kabaleyan nen Jesus, kaukolan ya diad mismon baley to so pangigapoan ton mantambal, pian sikaray unonan natulongan to. Kanian posiblin inisip da ya imbaliwala to ra.

Lapud atebek toy nononoten da, sinalambit nen Jesus so pigaran agawa diad history na Israel. Inkuan ton dakel so abalo ed Israel diad panaon nen Elias, balet ag-imbaki si Elias ed anggan sakey ed sikara. Imbes, sikatoy linmad aliwan Israelitan balo ed Zarepat, baley ya asingger ed Sidon, tan diman nanggaway manangisalbay-bilay a milagro. (1 Arari 17:8-16) Tan diad panaon nen Eliseo, amayamay so akating ed Israel, balet ta say pinaabig to labat et say Siryanon si Naaman.​—2 Arari 5:1, 8-14.

Antoy reaksion na saray kabaleyan nen Jesus ta nayarin inisip da ya aliway impangusar tod saray agawad apalabas pian ipasagilig ya makasarili tan anggapoy pananisia ra? Akapasnok iray wadman ed sinagoga, inmalagey ira, tan impaway dan tampol ed syudad si Jesus. Inyakar dad tagey na palandey ya akaletnegan na Nazaret, tan sinali dan ipelag ed kelas. Balet ta akatakas tan agda asakitan. Paonla la natan si Jesus ed Capernaum, ya asingger ed Dayat na Galilea.