Onlad karga

Onlad saray karga

 KAPITULO 76

Akidungo ed Saray Fariseo

Akidungo ed Saray Fariseo

LUCAS 11:37-54

  • PRANGKAN BINAGAAN NEN JESUS IRAY FARISEON MANSIMPISIMPITAN

Legan ya walad Judea si Jesus, inawat toy imbitasyon ya pangan ed abung na sakey a Fariseo. Nayarin panangugto iman, aliwan pangdem. (Lucas 11:37, 38; ikompara so Lucas 14:12.) Antis na panangan, ritual na saray Fariseo so panuras anggad siko. Balet ag-itan ginawa nen Jesus. (Mateo 15:1, 2) Anggapoy nakontran Ganggan na Dios no gawaen itan, balet ag-itan igaganggan na Dios.

Mankelaw iray Fariseo ta agtinumbok nen Jesus itan ya tradisyon. Alikas iya nen Jesus tan inkuan to: “Sikayo ran Fariseo, lilinisan yoy paway na kopa tan plato, balet diad dalem yo et napnoy inkaagum tan kaugsan. Agmakatunongan a totoo! Agta samay nanggawad paway et sikato met lanlamang so nanggawad dalem?”​—Lucas 11:39, 40.

Aliwan say panuras na lima antis na pangan so isyu, noagta say pankunkunwari dan relihyoso. Uurasan na saray Fariseo tan na arum so lima ra bilang ritual, balet papaulyanan dan marutak so puso ra lapud kaugsan. Kanian sinimbawa ira nen Jesus: “Saray walad dalem na puso yo so iter yon regalo lapud panangasi, pian magmaliw kayon malinis ed amin a bengatla.” (Lucas 11:41) Talagan tua ’tan! Nepeg ya manlapud puso so pangiter, aliwan pian napabilib so arum tan kunkunwarin matunong.

Aliwa met ya masiblet irayan lalaki. Kuan nen Jesus: “Iiter yo so kakaplo na yerbabuena tan ruda tan arum ni ran tambal a tanaman, balet ibabaliwala yoy hustisya tan panangaro ed Dios! Obligasyon yon iter so kakaplo, balet agnepeg ya ibaliwala so arum ni ran bengatla.” (Lucas 11:42) Kekerewen ed Ganggan na Dios so pambayar na kakaplo na amin ya bunga. (Deuteronomio 14:22) Kaibad satan so yerbabuena tan ruda, tanaman ya uusaren a pantambal odino rekado. Estrikton iiter na saray Fariseo so kakaplo na sarayan tanaman, balet panon to ray mas importantin kekerewen na Ganggan, a singa say pangipanengneng na hustisya tan panagpaabeba ed Dios?​—Miqueas 6:8.

Intuloy ya imbaga nen Jesus: “Pakaskasi kayo la, sikayo ran Fariseo, lapud labalabay yoy walad arap a yurongan diad saray sinagoga tan labalabay yoy paibano diad saray tindaan! Pakaskasi kayo la, lapud singa kayo saray lubok ya agnanengneng, kanian nagagatinan iratan na totoo tan agda amta!” (Lucas 11:43, 44) On, nayarin napatir iray totoo ed saratan ya lubok tan magmaliw iran marutak, kanian ag-ira nayarin mibiang ed saray relihyoson seremonya. Imbaga ’tan nen Jesus pian nidanet ya agnahahalata so karutakan na saray Fariseo.​—Mateo 23:27.

Sinmyodot so sakey ya lakin makabat ed Ganggan na Dios: “Managbangat, pati sikami et ininsultom ed sarayan imbagam.” Balet kaukolan ya natalosan na sarayan lalaki ya agda natutulongan iray totoo. Kuan nen Jesus: “Pakaskasi kayo met iran makabat ed Ganggan, lapud ipapasakbat yod totoo iray ambelat ya aawiten, balet agyo idiwit ed saratan so anggan sakey a gamet yo! Pakaskasi kayo la, lapud igagawaan yo na saray lubok iray propeta, balet saray inmuunan atateng yo so amatey ed sikara!”​—Lucas 11:45-47.

Saray ambelat ya awit ya tutukoyen nen Jesus et saray impasapasan tradisyon tan say interpretasyon na saray Fariseo ed Ganggan. Papairapen na sarayan lalaki iray totoo lapud ipipilit dan nepeg ya unoren na amin so ambelat ya ipapasakbat da. Pinatey na saray inmuunan atateng da iray propeta na Dios, manlapu lad si Abel. Natan, kunkunwarin papagalangan da ray propeta ta igagawaan da ray lubok, pero diad tua, aaligen day kagagawa na saray inmuunan atateng da. Labay da ni ingen ya pateyen so sankaimportantian ya Propeta na Dios. Imbaga nen Jesus ya ukomen na Dios iyan henerasyon. Tan agawa itan kayari manga 38 taon, nen 70 C.E.

Intuloy ni nen Jesus: “Pakaskasi kayo la, sikayo  ran makabat ed Ganggan, lapud inekal yo so tombok na pikakabat. Sikayon mismo et agkayo linmoob, tan aamperen yo iramay malabay ya onloob!” (Lucas 11:52) Sarayan lalaki ya nepeg komon a mangibangat no antoy labay ya ibaga na Salita na Dios et aamperen da laingen iray totoo ya naamtaan tan natalosan itan.

Antoy reaksion na saray Fariseo tan eskriba? Nen onalis lay Jesus, mamapasnok iran onkokontra ed sikato tan pinauranan day tepet. Nantepet ira aliwan pian makaaral. Imbes, labay dan patitan si Jesus pian makapansalita na bengatlan pangarestoan dad sikato.