Onlad karga

Onlad saray karga

 KAPITULO 98

Pinilalek Lamet na Saray Apostol so Inkaprominente

Pinilalek Lamet na Saray Apostol so Inkaprominente

MATEO 20:17-28 MARCOS 10:32-45 LUCAS 18:31-34

  • IMPASAKBAY LAMET NEN JESUS SO IPATEY TO

  • INARAP NEN JESUS IRAY APOSTOL TO LAPUD PILALEK DAN MAGMALIW A PROMINENTE

Sanen manampot lay pambiabiahe nen Jesus tan saray disipulo to ed bandad abalaten, diad Perea a paarap ed Jerusalem, binaliw da so Ilog Jordan ya asingger ed Jerico. Wala ray kaiba ran manbiabiahe ya onlad Paskua na 33 C.E.

Manaakar si Jesus ed unaan na saray disipulo, ta determinadon makasabin tampol ed syudad parad Paskua. Balet natatakot iray disipulo. Diad agano ni, sanen inatey si Lazaro tan asingger lan onalis si Jesus ed Perea pian onlad Judea, oniay inkuan nen Tomas: “Onla itayo met, pian ompatey tayon kaiba to.” (Juan 11:16, 47-53) Kanian delikado so onlad Jerusalem, tan natalosan no akin a natatakot iray disipulo.

Pian niparaan ira ed nagawad arapen, intagar nen Jesus iray apostol diad sakey a pasen tan inkuan to: “Onla tayod Jerusalem, tan say Anak na too et iyawat ed saray manunan saserdote tan saray eskriba. Sikatoy sentensiaan da na patey, tan iyawat dad totoo na saray nasyon pian elek-elekan tan sipsiplatan tan ipasak dad poste; tan sikatoy paolien ed komatlon agew.”​—Mateo 20:18, 19.

Komatlo la iyan impangibaga nen Jesus ed saray disipulo to nipaakar ed ipatey tan kioli to. (Mateo 16:21; 17:22, 23) Balet natan et imbaga ton sikatoy ipasak ed poste. Dinmengel ira, balet agda natalosan no antoy kabaliksan na ibabaga to. Nayarin iilaloan da so kipawil na panarian na Israel diad dalin, tan labay dan naawat so gloria tan kagalangan ed sakey a panarian diad dalin a kaibay Kristo.

Kaiba ed saray manbiabiahe si Salome, ya ina na saray apostol a si Santiago tan Juan. Inikdan nen Jesus iyan duaran apostol na ngaran a mankabaliksay “Ananak na Karol,” tan agla pankelawan iya lapud misasanok ira. (Marcos 3:17; Lucas 9:54) Abayag lan ambisyon na sayan dua so magmaliw a prominente ed Panarian na Kristo.  Amta itan na ina ra. Kanian inasinggeran toy Jesus, dinmakmomo, tan kinmerew na pabor parad sikara. Imbaga nen Jesus: “Antoy labay mo?” Inyebat to: “Kerewen kod sika a payurongen mo irayan duaran ana’ko diad Panarian mo, sakey ed nikawanan mo tan sakey ed nikawigim.”​—Mateo 20:20, 21.

Si Santiago tan Juan so talagan nanlapuan na sayan kerew. Kapkapangibaga nen Jesus so dalanen ton kababaingan tan kipaabeba, kanian inkuan tod sikara: “Agyo amtay kekerewen yo. Nayarian yo kasi oninum ed kopa a ngalngalik la inuman?” Inyebat da: “Nayarian mi.” (Mateo 20:22) Siansia nin agda atalosan so talagan kabaliksan na saya.

Anggaman ontan, imbaga nen Jesus ed sikara: “Tua ya oninum kayo ed kopak, balet say iyurong ed nikawanan ko tan nikawigik et aliwan siak so mandesisyon, ta saratan a pasen et parad saramay angiparaanan nen Amak.”​—Mateo 20:23.

Sinmanok iray samploran apostol sanen naamtaan day kerew nen Santiago tan Juan. Nayarin prangkaan so panagsalita di Santiago tan Juan diad samay inmunan impansasangsang na saray apostol no siopay sankamanunaan ed sikara. (Lucas 9:46-48) Diad sayan kerew da, ompapatnag ya ag-inyaplika na Labindua so simbawa nen Jesus nipaakar ed pagmaliw ya mapaabeba. Pampilalekan da nin siansia so magmaliw a prominente.

Inarap nen Jesus iyan isyu tan say sakit na linawan pawawalaen na saya. Tinawag to so Labindua tan maaron sinimbawa to ra, ya inkuan to: “Amta yo a saramay mapatnag a manuuley ed saray nasyon et pakakatawan ed totoo ra, tan kokontrolen na saray walaay autoridad iray totoo ra. Agnepeg ya ontan ed sikayo, noagta siopaman a labay toy magmaliw a manuna ed sikayo et nepeg a magmaliw a lingkor yo, tan siopaman a labay toy magmaliw ya unaan ed sikayo et nepeg a magmaliw ya aripen na amin.”​—Marcos 10:42-44.

Impanonot nen Jesus so ehemplo a nepeg dan aligen​—say ehemplo to. Impaliwawa to: “Singa say Anak na too a linma dia aliwan pian panlingkoran, noagta pian manlingkor tan iter toy bilay to a panondon ed amayamay.” (Mateo 20:28) Ngalngali taloy taon a nanlingkor si Jesus ed arum. Tan gawaen to nin siansia itan anggan ompatey parad katooan! Kaukolan ya aligen na saray disipulo so Kristo, a pilaleken day manlingkor nen say palingkoran, tan magmaliw ya mapaabeba nen say magmaliw a prominente.