Onlad karga

Onlad saray karga

 KAPITULO 12

Nampabautismo si Jesus

Nampabautismo si Jesus

MATEO 3:13-17 MARCOS 1:9-11 LUCAS 3:21, 22 JUAN 1:32-34

  • ABAUTISMOAN TAN NILANAAN SI JESUS

  • IMPAAMTA NEN JEHOVA YA SI JESUS SO ANAK TO

Manga anem bulan lay linmabas manlapu nen ginmapon nampulong si Juan Bautista, sikatoy nila nen Jesus diad Ilog Jordan a diad saman et manga 30 años to la. Akin? Aliwan pian ompasyar odino nengnengen so iyaaligwas na kimey nen Juan. Sikatoy linmad si Juan pian manpabautismo.

Siempre, diad gapo et aglabay nen Juan, tan inkuan to: “Akin et sikay linmad siak, anta siak komon so nakaukolan a manpabautismo ed sika?” (Mateo 3:14) Amta nen Juan ya si Jesus et espisyal ya Anak na Dios. Tandaan ya nen lukon ni nen Elizabet si Juan, sikatoy malikeliket ya ginmalaw nen binmisitad abung da si Maria, a lukon tod saman si Jesus. Seguradon imbaga iya nen Elizabet ed si Juan. Tan posiblin naamtaan to met so anunsio na anghel nipaakar ed kiyanak nen Jesus tan say impanpanengneng na saray anghel ed saray managpastol diad samay labi ya inyanak si Jesus.

Natatalosan nen Juan ya say pambabautismo to et parad saramay magbabawi ed saray kasalanan da. Balet anggapoy kasalanan nen Jesus. Anggano aglabay nen Juan, mapekder si Jesus: “Onabuloy kad sayan bekta, ta diad onian paraan et nasumpal ta so amin ya uksoyan na Dios.”​—Mateo 3:15.

Akin et matukoy ya nabautismoan si Jesus? Say pampabautismo to et aliwan simbolo na panagbabawi ed saray kasalanan. Say gagala na bautismo to et pian ipresentay sarili to ya gawaey linawa na Ama to. (Hebreo 10:5-7) Karpentero si Jesus, balet natan et panaon la pian igapo toy ministeryo ya angibakian na Ama tod tawen a gawaen to diad dalin. Kasin iilaloan nen Juan a walay nikadkaduman nagawa no bautismoan toy Jesus?

Diad tua, oniay imbaga nen Juan: “Imbagad siak na Dios ya angibaki ed siak a manbautismo ed danum: ‘Siopaman a nanengneng mon dapoan tan pansiansiaan na espiritu, sikato so manbautismo ed panamegley na masanton espiritu.’” (Juan 1:33) Kanian iilaloan nen Juan ya ondapo so masanton espiritu na Dios ed bautismoan to. Kaimwas nen Jesus ed danum, nayarin agla nikelawan si Juan nen anengneng toy “espiritu na Dios a singa malapati ya ondadapo ed [si Jesus].”​—Mateo 3:16.

 Balet wala ni agawa ed bautismo nen Jesus. “Alukasan so tawen.” Antoy labay ya ibaga na satan? Nayarin diad bautismo nen Jesus et anonotan toy impanbilay tod tawen. Kanian anonotan ton sikatoy espiritun anak nen Jehova. Anonotan to met iray katuaan ya imbangat na Dios ed sikato diad tawen antis ya onlad dalin.

Ontan met, diad bautismo nen Jesus et walay inyabawag na sakey a boses manlapud tawen: “Saya so Ana’ko, say inad-arok, ya inabobonan ko.” (Mateo 3:17) Siopay akanboses ed saman? Aliwan si Jesus ta kaiba toy Juan. Saman et boses na Dios. Malinew ya si Jesus et Anak na Dios. Aliwan sikato so Dios.

Si Jesus et too ya anak na Dios, singa say inmunan too ya si Adan. Kayarin insalaysay na disipulo ya si Lucas so bautismo nen Jesus, insulat to: “Mantaon na 30 si Jesus sanen ginapoan toy kimey to, tan unong ya amta la na karaklan et sikatoy anak nen Jose, ya anak nen Heli, . . . ya anak nen David, . . . ya anak nen Abraham, . . . ya anak nen Noe, . . . ya anak nen Adan, ya anak na Dios.”​—Lucas 3:23-38.

Si Jesus et singa si Adan ya toon “anak na Dios.” Nen nampabautismo, atalosan ton sikatoy Anak na Dios a magmaliw ya espiritu ed tawen. Kanian, walay kanepegan nen Jesus ya ibangat so katuaan nipaakar ed Dios tan ipaamta so dalan parad bilay. Ginapoan nen Jesus so kimey ya mansumpal ed pangiter toy bilay to bilang too pian ibagat parad saray makasalanan.