Onlad karga

Onlad saray karga

 KAPITULO 51

Impamatey Diad Sakey ya Birthday

Impamatey Diad Sakey ya Birthday

MATEO 14:1-12 MARCOS 6:14-29 LUCAS 9:7-9

  • IMPAPUTOT NEN HERODES SO ULO NEN JUAN BAUTISTA

Legan ya itutuloy na saray apostol nen Jesus so ministeryo dad Galilea, si Juan Bautista ya angipakabat ed si Jesus et anggapoy nagawaan to. Akapriso nin siansia kayari na ngalngali duay taon.

Diretsaan ya imbaga nen Juan ya kontrad ganggan so impangasawa nen Arin Herodes Antipas ed si Herodias ya asawa na agi ton si Felipe. Indiborsyo nen Herodes so inmunan asawa to pian naasawa toy Herodias. Unong ed Mosaikon Ganggan, ya ibabaga nen Herodes ya uunoren to, say impangasawa to et pikakalugoran tan ilegal. Lapud saman ya ginawa nen Juan, sikatoy impaipriso nen Herodes, a nayarin lapud sugsog nen Herodias.

Ag-amta nen Herodes no antoy gawaen tod si Juan lapud saray totoo et “ipapasen dan propeta si Juan.” (Mateo 14:5) Balet desididoy Herodias. Sikatoy “nanem-em na sakit na linawa” ed si Juan, tan diad tua et labay ton pateyen. (Marcos 6:19) Anggad sinmabin siansiay pankanawnawa.

Antis na Paskua nen 32 C.E., angorganisa si Herodes na baleg ya selebrasyon parad birthday to. Linman amin so ataragey ya opisyal nen Herodes, saray opisyal na armada, pati saray importantin totoo ed Galilea. Legan na panliliket da, sinmayaw si Salome​—say anak nen Herodias ed datin asawa ton si Felipe. Agustoan na lalaki so impansayaw to.

Lapud aliketan a maong si Herodes ed si Salome, oniay imbaga to: “Kerew kad siak na antokaman a labay mo, tan iter ko itan ed sika.” Insamba to ni ingen: “Anggan antoy kerewen mod siak, iter kod sika, angga ed kapaldua na panarian ko.” Antis ya inmebat, pinmaway si Salome tan tinepetan toy ina to: “Antoy kerewen ko?”​—Marcos 6:22-24.

Saya la may pankanawnawan tatalaranan nen Herodias! “Say ulo nen Juan a Managbautismo,” so maples ya ebat to. Tampol ya amawil si Salome ed si Herodes pian ibagay kerew to: “Labay kon iter mon tampol ed siak so ulo nen Juan Bautista ya akakargad bandihado.”​—Marcos 6:24, 25.

Naermenan a maong si Herodes, balet nadngel na saray bisita so impansamba tod si Salome. Agto labay ya nabaingan kanian tinoor to anggano mamatey ni na inosentin too. Imbaki nen Herodes ed prisoan so sakey a managbantay tan imbaga toy makapabiglan gawaen to. Nagugunoyan, amawil imay managbantay ya awit toy ulo nen Juan ya walad bandihado. Inter tod si Salome, tan inyakar to itan ed ina to.

Nen nadngel na saray disipulo nen Juan so agawa, inala day bangkay to tan imponpon da. Insan da imbalita ed si Jesus.

Ataktakot si Herodes nen abalitaan ton si Jesus et mamapaabig na totoo tan mamapapaway na saray demonyo. Iisipen to no kasin say manggagawa ed sarayan bengatla​—si Jesus​—et sikato lanlamang si Juan Bautista ya ‘apaoli manlapud inaatey.’ (Lucas 9:7) Lapud satan, labalabay nen Herodes Antipas ya nanengneng si Jesus. Say talagan gagala to et aliwan pian narengel so ipupulong nen Jesus. Imbes, labay ton nanengneng pian naseguro no kasin dugay iisipen to odino andi.