Onlad karga

Onlad saray karga

 KAPITULO 114

Diad Isabi na Kristo Ukomen to ray Karnero tan Kanding

Diad Isabi na Kristo Ukomen to ray Karnero tan Kanding

MATEO 25:31-46

  • IMBAGA NEN JESUS SO ILUSTRASYON NIPAAKAR ED SARAY KARNERO TAN KANDING

Diad Palandey na Saray Olibo, kakkayari nen Jesus ya inistorya iray ilustrasyon nipaakar ed samploran mamarikit tan saray talento. Panon ton sinampotan so ebat tod tepet na saray apostol nipaakar ed tanda na kiwawala to tan say kaunoran a parte na sistema na mundo? Angiter na sampot ya ilustrasyon nipaakar ed saray karnero tan kanding.

Oniay impangigapo nen Jesus: “Sano say Anak na too et onsabi ed gloria to, tan kaiba toy amin ya anghel, diad satan et sikatoy onyurong ed maglorian trono to.” (Mateo 25:31) Malinlinew ed imbaga to ya sikato, si Jesus, so manunan karakter ed sayan ilustrasyon. Mabetbet ton tatawagey sarili to ya “Anak na too.”​—Mateo 8:20; 9:6; 20:18, 28.

Kapigan nagawa iyan ilustrasyon? Diad ‘isabi nen Jesus ed gloria to’ kaiba iray anghel tan onyurong “ed maglorian trono to.” Wala la may abitla to nipaakar ed “Anak na too ya onsasabi diad saray lurem na tawen a walaay pakapanyari tan baleg a gloria” tan kaiba iray anghel. Kapigan itan nagawa? “Kayarin tuloy na kairapan.” (Mateo 24:29-31; Marcos 13:26, 27; Lucas 21:27) Kanian nagawa iyan ilustrasyon diad arapen, no onsabi lay Jesus ed gloria to. Antoy gawaen tod saman?

Impaliwawa nen Jesus: “Sano say Anak na too et onsabi . . . , natipon ed arap to so amin a nasyon, tan pambibiiganen to iray totoo, a singa sakey a managpastol ya ibibiig to iray karnero ed saray kanding. Tan saray karnero et ipasen to diad kawanan to, balet saray kanding et diad kawigi to.”​—Mateo 25:31-33.

Oniay imbaga nen Jesus nipaakar ed saray karnero ya walad dapag ya papaboran to: “Insan ibaga na Ari ed saramay walad kawanan to: ‘Gali dia, sikayo ran benendisyonan nen Amak, tawir yoy Panarian ya imparaan ed sikayo manlapu lad inkiletneg na mundo.’” (Mateo 25:34) Akin ya paboran na Ari iray karnero?

 Impaliwawa na Ari: “Sanen narasan ak et pinakan yo ak. Sanen napgaan ak et pinainum yo ak. Agyo ak kabat balet pinatuloy yo ak ed ayaman yo. Sanen lakseb ak et kinawesan yo ak. Sanen nansakit ak et inasikaso yo ak. Sanen wala ak ed prisoan et binisita yo ak.” Nen tinepet na saray karnero, “saray matunong,” no panon dan ginawa iraman a kamaongan, inyebat to: “No ginawa yo itan ed sakey ed saray sankamelagan ed sarayan agagik, ginawa yo met la itan ed siak.” (Mateo 25:35, 36, 40, 46) Aliwan diad tawen da ginawa iraya ta anggapoy mansasakit odino narasan ed tawen. Ginawa iratan parad saray agagi nen Kristo diad dalin.

Panon to iray kanding, ya inyan ed kawigi? Inkuan nen Jesus: “Insan ibaga [na Ari] ed saramay walad kawigi to: ‘Arawi kayod siak, sikayo ran naukom diad andi-anggaan ya apoy ya imparaan parad Diablo tan saray anghel to. Ta sanen narasan ak et agyo ak pinakan; tan sanen napgaan ak et agyo ak pinainum. Sanen agyo ak kabat et agyo ak pinatuloy. Sanen lakseb ak et agyo ak kinawesan. Sanen nansakit ak tan wala ak ed prisoan et agyo ak inasikaso.’” (Mateo 25:41-43) Kanepegan da labat itan ya panangukom ta agda trinato ya maabig iray agagi nen Kristo diad dalin, ya nepeg da komon a gawaen.

Naaralan na saray apostol ya say resulta na satan ya pangukom ed arapen et permanente​—andi-anggaan. Inkuan nen Jesus ed sikara: “Diad saman et [ibaga] ed sikara [na Ari]: ‘Ibagak ed sikayoy tua, no agyo itan ginawa ed sakey ed sarayan sankamelagan, agyo met itan ginawa ed siak.’ Saraya so ompatey ed andi-anggaan, balet saray matunong so mangawat na bilay ya andi-anggaan.”​—Mateo 25:45, 46.

Dakel so pannonotan na saray apostol nen Jesus ed samay ebat tod tepet da, ya ontulong ed sikaran usisaen iray ugali tan kagagawa da.