Onlad karga

Onlad saray karga

 KAPITULO 131

Impasak ed Poste so Anggapoy Kasalanan ya Ari

Impasak ed Poste so Anggapoy Kasalanan ya Ari

MATEO 27:33-44 MARCOS 15:22-32 LUCAS 23:32-43 JUAN 19:17-24

  • IMPASAK SI JESUS ED PANAMAIRAPAN A POSTE

  • INELEK-ELEKAN SI JESUS LAPUD SAMAY AKASULAT ED ULOAN TO

  • IMBAGA NEN JESUS SO ILALON PAMBILAY ED PARAISO DIAD DALIN

Inyakar si Jesus ed lugar ya asingger ed syudad, a diman da pateyen pati say duaran matakew. Satan a lugar et tinawag a Golgotha, odino Pasen na Lapislapis na Ulo, tan nabantag itan “diad bandad arawi.”​—Marcos 15:40.

Sarayan senentensiaan a taloran lalaki et nilakseban. Insan papainumen da ra na alak a nilaokan na drugan mira tan ampait a likido. Nayarin tinimpla itan na saray bibii ed Jerusalem, tan iyaabuloy na saray Romano ya inumen itan na saramay pateyen pian agda naliknay sakit. Balet sanen atimtiman itan nen Jesus, agto labay so oninum. Akin? Labay ton walad sikato so amin a pakalikna to legan na sayan sankairapan a subok; labay to ya amta to so nagagawa tan sikatoy manmatoor anggad patey.

Si Jesus et impaunat ed poste. (Marcos 15:25) Saray lima tan sali to et impasak na saray sundalo, a pinmapanek iray pasak ed laman tan ula-ulat to, kanian ansaki-sakit. Sanen impaalagey so poste, lalon alikna nen Jesus so pinasyan sakit legan a nabibira iray sugat to ed belat na laman to. Ingen ta agnampasnok si Jesus ed saray sundalo, noagta impikasi to ra: “Ama, perdonam ira, ta agda amtay gagawaen da.”​—Lucas 23:34.

Niyugali la na saray Romano so mangiyan na karatula ya akasulat so krimen na asentensiaan a kriminal. Natan, oniay insulat nen Pilato: “Jesus a Nazareno say Ari na Saray Judio.” Insulat itan ed Hebreo, Latin, tan Griego, kanian nabasa na amin. Pakapatnagan itan ya ag-agustoan nen Pilato so impangipilit na saray Judio ya ipapatey si Jesus. Lapud adismaya iray manunan saserdote, inkuan da: “Agmo nepeg ya isulat so ‘Say Ari na Saray Judio,’ noagta samay imbaga ton, ‘Siak so Ari na Saray Judio.’” Balet, lapud aglabay nen Pilato a sikatoy unor-unor lamet ed sikara, inkuan to: “No antoy insulat ko, insulat ko.”​—Juan 19:19-22.

Imbaga lamet na saray sinmanok a saserdote imay palson testimonya ya inyarap legan na bista diad Sanhedrin. Kampegan manpeyeng iramay ondadalan, a sikatoy inelek-elekan tan binalawbalaw da, a kuan da: “Sika a mangibabagan igebam so templo tan ipaalagey mod loob na taloy agew, isalbam so sarilim, tan epas kad satan a panamairapan a poste.” Ontan met, oniay imbaga na saray manunan saserdote tan eskriba: “Onepas komon natan ed panamairapan a poste so Kristo ya Ari na Israel, pian nanengneng mi tan manisia kami.” (Marcos 15:29-32) Si Jesus et binalaw met na anggan saramay asentensiaan a matakew a walad kawigi tan kawanan to, anggaman sikato labat so anggapoy kasalanan.

Niludlurey met si Jesus na saray apatiran Romanon sundalo. Nayarin diad saman et oniinum iray anakseng ya alak, kanian inopresian day Jesus pian insultoen, a mapatnag ya agto nagawat tan agmakainum. Sikatoy kinantiawan na sarayan Romano lapud samay akasulat ed uloan to tan inkuan da: “No sika so Ari na saray Judio, isalbam so sarilim.” (Lucas 23:36, 37) Isipen pa! Samay too, a sikato so dalan, say katuaan, tan say bilay, et mamaltratoen tan luludlureyen natan. Ingen ta intepel to iratan ya amin, ya agto  binalaw iramay maniimaton a Judio, saray Romanon sundalo a manluludlurey ed sikato, odino say duaran asentensiaan a kriminal ya impasak ed abay to.

Inala na saray apatiran sundalo so ilalatop a kawes nen Jesus tan impankapat da. Nampapalaranan ira pian naamtaan da no antoy betang na kada sakey. Balet say lalatopan a kawes to et maabig a klase, ya ‘anggapoy nansaipan, a nilaga manlapud tagey ya anggad saloy.’ Kanian imbaga na saray sundalo: “Agtayo iya pipilaten, noagta manpapalaranan itayo no siopay makala.” Diad ontan et sinumpal da so imbagay kasulatan: “Nanaapagan day kawes ko, tan nampapalaranan da itan.”​—Juan 19:23, 24; Salmo 22:18.

Samay sakey a kriminal et amoria ton siansia a si Jesus et talagan sakey ya ari. Binano to imay kaiba to, a kuan to: “Anggapo tay takot mod Dios, anta nadudusa ka la lanti a singa sayan too? Tan makatunongan labat iyad sikata, ta aawaten ta lay kanepegan ta lapud saray ginawa ta; balet sayan too et anggapoy ginawa ton kasalanan.” Insan akikasi ed si Jesus: “Nonot mo ak sano onsabi kad Panarian mo.”​—Lucas 23:40-42.

Inmebat si Jesus: “Ibagak ed sika natan, nakaiba ta ka,” aliwan diad Panarian, noagta diad “Paraiso.” (Lucas 23:43) Sayan sipan et midumaan ed samay insipan nen Jesus ed saray apostol to, ya onyurong ira ed saray trono a kaiba to diad Panarian. (Mateo 19:28; Lucas 22:29, 30) Balet, nayarin nadngel la na sayan Judion kriminal so nipaakar ed Paraison dalin ya ginawa nen Jehova a panayaman nen Adan, Eva, tan saray kailalakan da. Natan, sayan matakew et ompatey a walaay ontan ya ilalo.