Onlad karga

Onlad saray karga

 KAPITULO 2

Si Jesus et Pinagalangan Antis na Inkiyanak To

Si Jesus et Pinagalangan Antis na Inkiyanak To

LUCAS 1:34-56

  • BINISITA NEN MARIA SO KANAYON TON SI ELIZABET

Kayarin imbaga nen anghel Gabriel ed marikit nin Maria ya sikatoy mangiyanak na laki a tawagen ya Jesus tan manuley ya Ari ed andi-anggaan, intepet nen Maria: “Panon iyan nagawa, anta agak nin balot akiakdol ed laki?”​—Lucas 1:34.

“Niwalad sika so masanton espiritu,” so ebat nen Gabriel, “tan tarongan kay pakayari na Sankatagyan. Tan lapud satan, samay niyanak et natawag a masanto, Anak na Dios.”​—Lucas 1:35.

Pian natulongan si Maria ya awaten so mensahe, inyarum nen Gabriel: “Say kanayon mon si Elizabet, ya ibabaga na totoo a lepes, et angilukon met na anak a laki anggaman akulaw la, tan komanem lan bulan to; ta anggapoy imposible ed Dios.”​—Lucas 1:36, 37.

Inawat nen Maria so imbaga nen Gabriel, a singa nanengneng tayod inyebat to. “Siak so biin aripen nen Jehova!” so imbalikas to. “Nagawa komon ed siak so unong ed imbagam.”​—Lucas 1:38.

Kaalis nen Gabriel, namparaan lay Maria ya ombisitad si Elizabet tan ed asawa to, a manaayam diad asingger ed Jerusalem diad gilig na pukdol ed Judea. Manlapud abung nen Maria ed Nazaret et manga talora o apatiran agew so biahe.

Akasabin siansia si Maria ed abung nen Zacarias. Kaloob to, imbano toy kanayon ton si Elizabet. Diad saman et napno na masanton espiritu si Elizabet, tan imbaga tod si Maria: “Narayew kad amin a bibii, tan abendisyonan so bunga na eges mo! Kanian siopa ak pian nawalaan na onian pribilehyo, ya onlad siak so ina na Katawan ko? Ta nen nadngel koy impangibanom, malikeliket a ginmalaw so ugaw ed eges ko.”​—Lucas 1:42-44.

Inmebat si Maria tan misalsalamat: “Idaydayew na kamarerwak si Jehova, tan agko napokpokay manlikliket ed Dios a Manangiliktar ko, lapud inimano toy abeban kipapasen na biin aripen to. Ta manlapu lad natan, iyabawag na amin a henerasyon a maliket ak, lapud balbaleg a bengatla so ginawa ed siak na makapanyarin Dios.” Naimano tayo ya anggano sikatoy talagan apaboran, inter toy amin a dayew ed si Jehova. Inkuan nen Maria: “Masanto so ngaran to, tan diad mantutumbokan iran henerasyon et nipatnag so panangasi tod saramay ontatakot ed sikato.”​—Lucas 1:46-50.

Diad impuyan ya propesiya, intultuloy nen Maria ya indayew so Dios, a kuan to: “Diad panamegley na taklay to et sikatoy nanggaway makapanyari iran bengatla; intaytayak to iray mapaatagey so intension na puso ra. Inyabeba tod trono iray makapanyarin totoo tan inyatagey to iray totoon abebbebay kipapasen da; saray narasan et pinesepesel toy maong iran bengatla, tan saray mayaman et pinataynan ton kalimalima. Tinulongan toy lingkor ton Israel, pian ipanengneng a naynay ton sankanonot so sipan to ya ipatnag so panangasi ed si Abraham tan ed ilalak to, a singa imbaga tod saray inmuunan atateng tayo.”​—Lucas 1:51-55.

Diad manga taloran bulan, nansiansiay Maria ed sikara di Elizabet, nayarin pian ontulong legan na unor iran simba antis na pananak nen Elizabet. Talagan alay abig ya sarayan duaran matoor a bibii et saniba ed sayan parte na bilay da sanen sikaray nanlukon diad tulong na Dios!

Tan imanoen so galang ya inter ed si Jesus antis na inkiyanak to. Sikatoy tinawag nen Elizabet ya “Katawan ko,” tan “malikeliket a ginmalaw” so ugaw ed eges to kasabi nen Maria. Talagan duma itan ed impantrato na arum ed si Maria tan say iyanak ton ugaw, a singa nanengneng tayo.