Onlad karga

Onlad saray karga

 KAPITULO 22

Nagmaliw ya Managsigay na Totoo so Apatiran Disipulo

Nagmaliw ya Managsigay na Totoo so Apatiran Disipulo

MATEO 4:13-22 MARCOS 1:16-20 LUCAS 5:1-11

  • NANANAP SI JESUS NA SARAY DISIPULON SIGPOT PANAON YA ONTUMBOK ED SIKATO

  • NAGMALIW YA MANAGSIGAY NA TOTOO IRAY MANAGSIGAY NA SIRA

Kayari ya sinalin pateyen na saray taga Nazaret si Jesus, sikatoy linmad Capernaum, asingger ed Dayat na Galilea, a tatawagen met ya “dayat na Genesaret.” (Lucas 5:1) Asumpal ed saya so propesiya ed libron Isaias ya makanengneng na baleg a liwawa iray manaayam ed gilig na dayat diad Galilea.​—Isaias 9:1, 2.

On, tuloytuloy ya inyabawag nen Jesus ed Galilea ya “asingger lay Panarian na tawen.” (Mateo 4:17) Anengneng nen Jesus so apatiran disipulo to. Diad gapo et kaiba to ra, balet nen amawil irad Judea kaibay Jesus, intuloy day datin anapan dan panagsigay. (Juan 1:35-42) Balet natan, panaon la ya naynay dan nakaiba si Jesus pian nipasal to ran mangituloy ed ministeryo no sikatoy anggapo la.

Legan a manaakar si Jesus ed gilig na dayat, anengneng toy Simon Pedro, si Andres ya agi to, tan arum nin kaiba da ya manaapiger na iket. Inmasingger si Jesus, linmugan ed baloto nen Pedro, tan imbaga ton iyarawi tod ekat so baloto. Nen akaarawi daiset, inmirong si Jesus tan imbangat tod saray totoon nantitipon ed gilig na dayat so katuaan nipaakar ed Panarian.

Kayari na saya, inkuan nen Jesus ed si Pedro: “Iyakar mo diman ed aralem, tan ipelag yo iray iket yo pian makarel kayo.” Inmebat si Pedro: “Managbangat, sanlabi kami lan mansisigay tan anggapon balot so nala mi, balet lapud imbagam, ipelag ko iray iket.”​—Lucas 5:4, 5.

Impelag day iket da tan dakdakel so narel dan sira kanian napipilat la ray iket da! Kinaweyan da ray kakaiba ran walad sananey a baloto pian onasingger tan tulongan da ra. Apanopano na sira so duaran baloto kanian onlelereg la iratan. Lapud sayan anengneng nen Pedro, sikatoy tinmalimukor ed arapan nen Jesus tan inkuan to: “Katawan, arawian mo ak, ta sakey ak a toon makasalanan.” Inmebat si Jesus: “Agka la natatakot. Manlapud natan et mansigay ka la na totoon mabilay.”​—Lucas 5:8, 10.

Oniay imbaga nen Jesus ed si Pedro tan Andres: “Tumbok kayod siak, tan gawaen ta kayon sumisigay na totoo.” (Mateo 4:19) Impila to met so duara nin managsigay, si Santiago tan Juan, ya ananak nen Zebedeo. Akila met iran tampol. Kanian tinaynan na sarayan apatiran managsigay so anapan da tan sikaray sankaunaan ya sigpot panaon a disipulo nen Jesus.