Onlad karga

Onlad saray karga

 KAPITULO 29

Nayari Kasi Manggaway Maabig no Sabaton?

Nayari Kasi Manggaway Maabig no Sabaton?

JUAN 5:1-16

  • NAMPULONG SI JESUS ED JUDEA

  • PINAABIG TOY MANSASAKIT A LAKI ED TIPONAY DANUM

Dakel so agawaan nen Jesus legan na malaknab a ministeryo tod Galilea. Balet nen imbaga ton “kaukolan ko met ya iyabawag ed arum a syudad so maong a balita na Panarian na Dios,” aliwa labat ya Galilea so sankanonot to. Kanian, sikatoy “nampulong diad saray sinagoga ed Judea.” (Lucas 4:43, 44) Praktikal iman lapud manasingger lay piesta ed Jerusalem.

No ikomparad saray abasa tayon ministeryo nen Jesus ed Galilea, daiset so nabasa tayod Ebanghelyo nipaakar ed kimey tod Judea. Anggano dakel so ag-interesado ed Judea, agtinmunda si Jesus ya nampulong tan nanggaway maabig inerman so kawalaan to.

Magano lan onlay Jesus ed sentro a syudad na Judea, diad Jerusalem, parad Paskua nen 31 C.E. Diad matoon lugar ya asingger ed Puerta na Saray Karnero, walay atarongan ya maawang a tiponay danum ya tatawagey Bethzatha. Dakel ya mansasakit, bulag, tan piley so oonlad sayan tiponay danum. Akin? Lapud panisiaan da ya onabig ira diad ilasur dad tiponan no akimbog so danum.

Sabaton ed saman tan anengneng nen Jesus ed tiponay danum so sakey a laki ya 38 taon lan mansasakit. Tinepetan nen Jesus: “Labay moy onabig?” Inmebat imay laki: “Katawan, anggapoy mangilasur ed siak diad tiponan na danum sano nakikimbog la, balet sano onlasur ak la et walay sananey a makauna ed siak.”​—Juan 5:6, 7.

Walay imbaga nen Jesus ya seguradon pankelawan na laki tan siopaman a makarengel: “Alagey ka! Libit moy dukolan mo tan manakar ka.” (Juan 5:8) Tan ontan so ginawa to. Inmabig ya tampol imay laki, nilibit toy dukolan to tan nanakar!

Imbes ya maliket ed makapakelaw ya agawa, inukom na saray Judio so laki tan inkuan da: “Sabaton natan, tan sebel a manlibit kay dukolan.” Oniay inyebat tod sikara: “Samay amaabig ed siak et inkuan ton, ‘Libit moy dukolan mo tan manakar ka.’” (Juan 5:10, 11) Krikritikoen na saraman ya Judio so siopaman ya mamaabig no Sabaton.

Tinepetan da imay laki: “Siopa tay angibaga ed sikan, ‘Libit mo itan tan manakar ka’?” Akin et ontay tepet da? Ta ‘ag-aliklikas a linmaok si Jesus ed dakdakel a totoo,’ tan ag-amta na saman a laki so ngaran nen Jesus. (Juan 5:12, 13) Balet nanengneng lanlamang na sayan laki si Jesus. Ag-abayag, diad templo et nabet toy Jesus tan abidbir to ya sikato may amaabig ed sikato diad tiponay danum.

Inanap na saman a laki iray Judio ya mantetepet nipaakar ed inyabig to. Imbaga tod sikara ya si Jesus iman. Nen naamtaan da iya, linma ray Judio ed si Jesus. Kasin linma rad sikato pian naamtaan no panon ton nagagawaan iray makapakelaw a bengatla? Andi. Say gagala da et mananap na lingo ed panggagawa nen Jesus na maabig ed Sabaton. Ginapoan da ni ingen ya pasegsegangen!