Onlad karga

Onlad saray karga

 KAPITULO 4

Maria​—Malukon Balet Aliwan Kasal

Maria​—Malukon Balet Aliwan Kasal

MATEO 1:18-25 LUCAS 1:56

  • NAAMTAAN NEN JOSE YA MALUKON SI MARIA

  • SI MARIA ET NAGMALIW YA ASAWA NEN JOSE

Si Maria et apat bulan lan malukon. Tandaan ya diad gapo na panlulukon to et binisita toy kanayon ton si Elizabet diad kapukdolan a lugar na Judea ya mamaabalaten. Balet natan et akapawil lay Maria ed abung da diad Nazaret. Asingger lan naamtaan na saray totoo ya sikatoy malukon. Isipen pa labat no panon kairap iman ed sikato!

Say mas mairap ni et akisipanan lan miasawa si Maria ed karpentero ya si Jose. Tan amta to ya base ed Ganggan na Dios ed Israel, say biin akisipanan lan miasawa balet akilawanan ed sananey a laki et tupaken anggad ompatey. (Deuteronomio 22:23, 24) Kanian anggano agnanggaway imoral si Maria, sikatoy mapaga no panon ton ipaliwawa ed si Jose so impanlukon to tan no antoy nagawa.

Taloy bulan ya anggapo si Maria kanian seguradon labalabay lan nanengneng nen Jose. Nen nannengneng ira, imbaga nen Maria so situasyon to, tan impaliwawa ton maong ed si Jose ya sikatoy nanlukon panamegley na masanton espiritu na Dios. Balet no isipen, talagan agnatalosan tan agnapanisiaan itan nen Jose.

Amta nen Jose ya maong a bii si Maria tan maabig so reputasyon to. Tan talagan inar-aro to. Balet anggano panoy pangipaliwawa nen Maria, agnapaliisan ya isipen nen Jose ya alukonan na arum a laki si Maria. Aglabay nen Jose ya tupaken day Maria anggad ompatey odino niiyan ed kababaingan; kanian inisip ton masekreton idiborsyo. Nensaman, say saninaron nansipanan la et ipapasen lan sanasawa, tan kaukolan so diborsyo no labay day mansian.

 Diad pannononot nen Jose ed saya, sikatoy akaugip. Nampanengneng ed sikato so sakey ya anghel diad kugip tan kuan to: “Agka natatakot a mangisempet ed asawam a si Maria, ta sikatoy nanlukon ed panamegley na masanton espiritu. Sikatoy mangiyanak na sakey a laki, tan say ingaran mod sikato et Jesus, ta sikatoy mangilaban ed totoo to ed saray kasalanan da.”​—Mateo 1:20, 21.

Kabangon nen Jose, agaylay liket to ta malinew lad sikatoy agawa! Ginawa ton tampol so ingganggan na anghel. Insempet toy Maria ed abung to. Sayan pangipaamta ed publiko et pinagka-seremonya na kasal pian nipaimano ya kasal la ra. Anggaman ontan, anggapo ni seksual a relasyon nen Jose tan Maria legan ya lukon toy Jesus.

Kayari pigaran bulan, namparaan si Jose tan Maria ya ontaynan ed abung dad Nazaret. Iner so laen da anta asingger lan mananak si Maria?