Salm 71:1-24
71 Ġeħova, jien lejk dort għall-protezzjoni.
Jalla qatt ma niġi umiljat.
2 Salvani u eħlisni għax int ġust.
Ismagħni* u salvani.
3 Sir għalija fortizza fil-blat fejn dejjem nistaʼ nidħol.
Ibgħat lil xi ħadd biex isalvani,Għax int il-blata u l-fortizza tiegħi.
4 Alla tiegħi, eħlisni minn idejn il-ħżiena,Minn idejn dawk li jaħqruni b’mod inġust.
5 Għax int it-tama tiegħi, Ġeħova s-Sid taʼ Kollox;*Jien ilni nafda fik* minn meta kont żagħżugħ.
6 Ilni niddependi minnek mit-twelid;Int għentni meta ħriġt minn żaqq ommi.
Jien infaħħrek il-ħin kollu.
7 Ħafna jammirawni minħabba dak li ġrali,Imma jien naf li int l-aqwa protezzjoni tiegħi.
8 Se nitkellem il-ġurnata kollha dwar is-sbuħija tiegħek,U se nfaħħrek.
9 Twarrabnix fi xjuħiti;Titlaqnix meta ma tantx ikolli saħħa.
10 L-għedewwa tiegħi jitkellmu kontrija,U dawk li qed jipprovaw joqtluni* jiftiehmu bejniethom,
11 U jgħidu: “Alla abbandunah.
Ejja niġru warajh u naqbduh, għax m’hemmx min isalvah.”
12 Alla tiegħi, toqgħodx ’il bogħod minni.
Alla tiegħi, fittex għinni.
13 Jalla l-għedewwa tiegħiJiġu mġiegħla jistħu u jinqerdu.
Jalla dawk li jipprovaw jagħmluli l-ħsaraJiġu ddiżonorati u umiljati ħafna.
14 Imma min-naħa tiegħi, se nistenna lilek biex taġixxi;Se nkompli nfaħħrek iktar.
15 Jien se nitkellem dwar il-ġustizzja tiegħek,Il-ġurnata kollha se nsemmi d-drabi li int salvajt,Għalkemm huma ħafna biex nifhimhom.*
16 Ġeħova s-Sid taʼ Kollox,Jien se nitkellem dwar l-affarijiet tal-għaġeb li għamilt int;Jien se nsemmi biss il-ġustizzja tiegħek.
17 Alla tiegħi, int għallimtni minn mindu kont żagħżugħ,U s’issa għadni nxandar dwar l-affarijiet tal-għaġeb tiegħek.
18 Alla tiegħi, tabbandunanix lanqas meta nixjieħ u xagħri jibjad.
Ħallini nitkellem dwar is-saħħa tiegħek* mal-ġenerazzjoni li jmissU dwar is-saħħa tiegħek maʼ dawk li ġejjin warajja.
19 Alla tiegħi, il-ġustizzja tiegħek hi kbira ħafna.
Int għamilt affarijiet tal-għaġeb;Min hu bħalek, Alla tiegħi?
20 Għalkemm ġegħeltni ngħaddi minn tbatija u inkwiet,Erġaʼ agħtini s-saħħa;Tellagħni mill-ilmijiet fondi.
21 Jalla terġaʼ tagħtini d-dinjità,U tipproteġini u tgħinni nħossni aħjar.
22 Alla tiegħi, peress li int leali,Jien se nfaħħrek billi ndoqq strument tal-korda.
Qaddis t’Iżrael,Jien se nfaħħrek bil-kant waqt li ndoqq l-arpa.
23 Se ngħajjat bil-ferħ waqt li nfaħħrek bil-kant,Għax int salvajtli ħajti.*
24 Jien se nitkellem dwar* il-ġustizzja tiegħek il-ġurnata kollha,Għax dawk li qed jipprovaw jeqirduni se jiġu umiljati u ddiżonorati.
Noti taʼ taħt
^ Letteralment “Mejjel widintek lejja.”
^ Jew “Mulej Sovran Ġeħova.”
^ Jew “Int il-fiduċja tiegħi.”
^ Jew “joqtlu lil ruħi.”
^ Jew “ngħoddhom.”
^ Letteralment “idek.”
^ Jew “ruħi.”
^ Jew “se nimmedita fuq.”
