Salm 69:1-36
Lid-direttur; fuq l-għanja taʼ “Il-Ġilji.” Għanja taʼ David.
69 Alla tiegħi, salvani, għax l-ilmijiet daqt jgħerrquni.*
2 Jien għeriqt f’ħama fond, fejn m’hemmx art soda.
Jien spiċċajt f’ilmijiet fondi,U l-kurrent ġarrni miegħu.
3 Jien għejejt u nħnaqt ngħajjat għall-għajnuna;Il-vista tiegħi marret lura tant kemm ilni nistenna lil Alla biex jaġixxi.
4 Dawk li jobogħduni għalxejn huma iktar mix-xagħar taʼ rasi.
Dawk li jixtiequ joqtluni, l-għedewwa qarrieqa tiegħi,* żdiedu ħafna.
Kelli nagħti dak li ma sraqtx.
5 Alla tiegħi, int taf kemm jien iblahU taʼ xiex jien ħati.
6 Is-Sid taʼ Kollox,* Ġeħova tal-armati,Jalla dawk li jittamaw fik ma jkollhomx għalfejn jistħu minħabba fija.
Alla t’Iżrael,Jalla dawk li jfittxuk ma jiġux umiljati minħabba fija.
7 In-nies jgħajruni għax naqdik;Jien vera ġejt umiljat.
8 Jien sirt stranġier għal ħuti;Sirt barrani għat-tfal t’ommi.
9 Iż-żelu għad-dar tiegħek hu bħal nar jaqbad ġo fija,U t-tmaqdir taʼ dawk li jmaqdru lilek ġie fuqi.
10 Meta umiljajt ruħi u somt,*Ġejt ikkritikat.
11 Meta lbist ħwejjeġ tal-ixkora,Ġejt imwaqqaʼ għaċ-ċajt.*
12 Jien qiegħed fi lsien dawk bilqiegħda f’bieb il-belt.
Dawk fis-sakra jkantaw dwari.
13 Imma jalla t-talba tiegħi tasal għandek f’ħin li turini ħniena, Ġeħova.
Alla tiegħi, uri li int il-wieħed leali li ssalvani,Għax int turi mħabba u lealtà.*
14 Eħlisni mill-ħama;Tħallinix negħreq.
Eħlisni minn dawk li jobogħduniU mill-ilmijiet fondi.
15 Tħallix il-kurrent qawwi tal-ilma jġorrni miegħu,Tħallinix negħreq f’ilma fond,U tħallix il-bir* jiblagħni.
16 Wiġibni Ġeħova, għax int tħobbni.*
Agħti kasi għax int ħanin ħafna,
17 U taħbix wiċċek minni.
Wiġibni malajr għax qiegħed f’sitwazzjoni diffiċli.
18 Ejja qrib u eħlisni;*Salvani* mill-għedewwa tiegħi.
19 Int taf kemm qed niġi mgħajjar, iddiżonorat, u umiljat.
Int tara l-għedewwa kollha tiegħi.
20 It-tgħajjir qasamli qalbi, u l-ferita ma tistax tfiq.*
Kont qed nittama li xi ħadd jifhimni, imma ma kien hemm ħadd,U li nsib lil xi ħadd li jinkuraġġini, imma ma sibt lil ħadd.
21 Imma minflok ikel, tawni velenu,*U xħin qabadni l-għatx, tawni l-ħall.
22 Jalla l-mejda tagħhom issir nassa għalihom,U l-ħafna ġid li għandhom isir nasba.
23 Jalla ma jibqgħux jaraw,U jalla* jitriegħdu l-ħin kollu bil-biżaʼ.
24 Uri r-rabja tiegħek lejhom,U jalla r-rabja kbira tiegħek tilħaqhom.
25 Jalla l-post fejn jgħixu* jsir ħerba;Ħa ma jgħix ħadd fit-tined tagħhom.
26 Għax huma jiġru wara dak li int weġġajt,U jibqgħu jitkellmu dwar it-tbatija li int ġibt fuq xi nies.
27 Ħa jkunu iktar ħatja milli huma,U jalla ma jibbenefikawx mill-ġustizzja tiegħek.
28 Ħa jiġi mħassar isimhom mill-ktieb tal-ħajja,*U ħa ma jitniżżilx maʼ tal-ġusti.
29 Alla tiegħi, jien muġugħ u qed inbati.
Jalla ssalvani u tipproteġini.
30 Jien se nfaħħar bil-kant isem Alla,U se nagħtih glorja u nirringrazzjah.
31 Għal Ġeħova dan ikun aħjar minn barri,Aħjar minn barri żgħir* bil-qrun u d-dwiefer.
32 L-umli se jifirħu meta jaraw il-qawwa li Alla għandu biex isalva.
Agħmlu l-kuraġġ, intom li qed tfittxu lil Alla.
33 Għax Ġeħova qed jismaʼ lill-foqra,U mhux se jobgħod lin-nies tiegħu li huma lsiera.
34 Ħa jfaħħruh is-sema u l-art,U l-baħar u kulma hemm fih.
35 Għax Alla se jsalva lil SijonU se jerġaʼ jibni l-bliet taʼ Ġuda.
L-art se jagħtiha lin-nies tiegħu u se jgħixu fiha.
36 Dawk li jiġu mill-qaddejja tiegħu se jirtuha,U dawk li jħobbu lil ismu se jgħixu fiha.
Noti taʼ taħt
^ Jew “telgħu sa ruħi.”
^ Jew “l-għedewwa tiegħi għalxejn b’xejn.”
^ Jew “Il-Mulej Sovran.”
^ Jew forsi “Meta bkejt u somt.”
^ Letteralment “Sirt proverbju għalihom.”
^ Jew “imħabba leali.” Ara Termini tal-Bibbja Spjegati.
^ Jew “il-ħofra.”
^ Jew “turini mħabba leali.” Ara Termini tal-Bibbja Spjegati.
^ Jew “Ersaq qrib ruħi u salvaha.”
^ Letteralment “Ifdini.” Ara Termini tal-Bibbja Spjegati.
^ Jew “u wasalt biex niddispra.”
^ Jew “pjanta velenuża.”
^ Letteralment “jalla ġenbejhom.”
^ Jew “il-kamp tagħhom imdawwar bil-ħitan.”
^ Jew “mill-ktieb tal-ħajjin.”
^ Jew “għoġol.”
