Isaias 38:1-22

  • Pagkasakit ngan pagkaopay ni Hezekias (1-22)

    • Kanta han pagpasalamat (10-20)

38  Hito nga panahon hi Hezekias nagkasakit ngan tikamatay na.+ Hi propeta Isaias+ nga anak nga lalaki ni Amoz kinadto ha iya ngan nagsiring, “Ini an siring ni Jehova: ‘Paghatag hin mga instruksyon ha imo panimalay, kay mamamatay ka; diri ka mag-oopay.’”+  Tungod hito hi Hezekias inatubang ha bungbong ngan nag-ampo kan Jehova:  “Nakikimalooy ako ha imo, O Jehova, alayon hinumdumi+ nga naglakat ako hin matinumanon ngan ha bug-os nga kasingkasing+ ha imo atubangan, ngan ginbuhat ko an maopay ha imo pagkita.” Ngan hi Hezekias nagtinangis gud.  Katapos, inabot kan Isaias an pulong ni Jehova, nga nasiring:  “Balik ngan sidnga hi Hezekias,+ ‘Ini an siring ni Jehova nga Dios ni David nga imo kaapoy-apoyan: “Nabatian ko an imo pag-ampo.+ Nakita ko an imo mga luha.+ Kitaa, dudugangan ko hin 15 ka tuig an imo kinabuhi,*+  ngan tatalwason ko ikaw ngan ini nga syudad tikang ha kamot han hadi han Asirya, ngan papanalipdan ko ini nga syudad.+  Ini an tigaman tikang kan Jehova basi ipakita ha imo nga tutumanon ni Jehova an iya ginsiring:+  Kitaa, an nagtitipaubos nga lambong han adlaw paaatrason ko hin napulo ka balitang ha hagdan* ni Ahaz.”’”+ Salit an adlaw nga inubós na inatras hin napulo ka balitang ha hagdan.  Ini an iginsurat* ni Hadi Hezekias han Juda han nagkasakit hiya ngan nag-opay ha iya sakit. 10  Nagsiring ako: “Ha kabutngaan han akon kinabuhiKinahanglan ko kumadto ha mga ganghaan han Lubnganan.* Diri ihahatag ha akon an nabibilin ko nga mga tuig.” 11  Nagsiring ako: “Diri ko makikita hi Jah,* hi Jah ha tuna han mga buhi.+ Diri ko na makikita an katawohanKon kaupod na ako han mga naukoy ha lugar diin natatapos an ngatanan. 12  An akon mismo urukyan gin-gabot ngan gintanggal tikang ha akon+Pariho han tolda han usa nga paraataman hin panon. Ginlikid ko an akon kinabuhi pariho han ginbubuhat han parahablon;Iya ako gin-uutod pariho han mga inulang nga patindog dida ha hablonan. Tikang ha adlaw tubtob ha gab-i imo ako gindadara ngadto ha akon kataposan.+ 13  Ginpapakalma ko an akon kalugaringon tubtob ha aga. Pariho hin leon, padayon niya nga ginpapanbari an ngatanan ko nga tul-an;Tikang ha adlaw tubtob ha gab-i imo ako gindadara ngadto ha akon kataposan.+ 14  Pariho han balinsasayaw o han siwit, padayon ako nga nahuni;+Padayon ako nga nagkukurokutok pariho han sarapati.+ An akon mga mata maluya nga nagkikita ha kahitas-an:+ ‘O Jehova, nasasakit gud ako;Buligi ako!’*+ 15  Ano an akon masisiring? Nagyakan hiya ha akon ngan ginios. Maglalakat ako nga mapainubsanon* ha ngatanan ko nga tuigTungod kay nasasakit gud ako.* 16  ‘O Jehova, pinaagi hini nga mga butang* nabubuhi an tagsa nga tawo,Ngan aada hini an kinabuhi han akon espiritu. Ipapahiuli mo an akon kahimsog ngan titipigan ako nga buhi.+ 17  Kitaa! Imbes nga kamurayawan, nagkaada ako duro nga kapaitan;Kondi tungod kay nalilipay ka ha akon,*Imo ako gintalwas tikang ha buho han kabungkagan.+ Imo iginlabog ha imo luyo an ngatanan ko nga sala.*+ 18  Kay an Lubnganan* diri makakaghimaya ha imo,+An kamatayon diri makakagdayaw ha imo.+ An mga nahingangadto ha buho diri makakalaom han imo pagkamatinumanon.+ 19  An mga buhi, an mga buhi makakagdayaw ha imo,Sugad la han akon nahihimo hini nga adlaw. An usa nga amay makakahatag ha iya mga anak hin kahibaro mahitungod han imo pagkamatinumanon.+ 20  O Jehova, talwasa ako,Ngan magtutokar kami han akon mga kanta gamit an mga instrumento nga may kwerdas+Ha ngatanan nga adlaw han amon kinabuhi ha balay ni Jehova.’”+ 21  Katapos, hi Isaias nagsiring: “Pagdara kamo hin karan-on nga hinimo tikang ha pinisa nga uga nga mga igos ngan itampos* ito ha hubag, basi mag-opay hiya.”+ 22  Antes hini, hi Hezekias nagpakiana: “Ano an tigaman nga masagka ako ngadto ha balay ni Jehova?”+

Mga footnote

Lit., “mga adlaw.”
Ini nga mga hagdan bangin ginagamit hadto ha pag-ihap han oras, pariho han mga instrumento nga nagsusumat han oras pinaagi han sirak han adlaw.
O “ginkomposo.”
O “Sheol,” karuyag sidngon, an lubnganan han katawohan. Kitaa an Glossary.
“Jah” an ginpahalipot nga porma han ngaran nga Jehova.
Lit., “Magin garantiya ko ikaw.”
O “seryoso.”
O “Tungod han kapait han akon kalag.”
Karuyag sidngon, an mga pulong ngan mga buhat han Dios.
O “akon kalag.”
O “ginkuha tikang ha imo atubangan an ngatanan ko nga sala.”
O “Sheol,” karuyag sidngon, an lubnganan han katawohan. Kitaa an Glossary.
O “ibutang.”