Nxa sifuna ukuthi inyama kaJesu legazi lakhe kusincede kumele sikholwe ukuthi wasihlawulela. Lokhu kutsho ukuthi nxa singaba lokholo kuJesu sizathola ukuphila okungapheliyo. (Efe. 1:7) Labo uJesu athi ‘ngabezinye izimvu’ akumelanga badle isinkwa banathe lewayini eSidlweni SeNkosi Sakusihlwa esenziwa minyaka yonke. (Joh. 10:16) Lanxa kunjalo inyama legazi likaJesu Khristu kuyabanceda. Okuzakwenza ukuthi kubancede yikukholwa ukuthi umhlatshelo kaJesu yiwo ozakwenza ukuthi basindiswe. (Joh. 6:53) Kodwa labo abadlayo bayabe betshengisa ukuthi basesivumelwaneni esitsha futhi balethemba lokuyabusa loJesu ezulwini. Ngakho kungelani lokuthi sigcotshiwe kumbe singabezinye izimvu kuqakathekile ukuthi sibe lokholo ukuze sithole ukuphila okungapheliyo. w24.12 13 ¶14, 16

ESidlweni SeNkosi Sakusihlwa uJesu wanika abaphostoli bakhe isinkwa esingelamvubelo wabatshela ukuthi simela umzimba wakhe. Wabanika lewayini wasesithi limela ‘igazi lesivumelwano.’ (Mak. 14:​22-25; Luk. 22:20; 1 Khor. 11:24) Isivumelwano esitsha senziwa “labendlu ka-Israyeli” abazakuba ‘seMbusweni kaNkulunkulu.’ (Heb. 8:​6, 10; 9:15) Lokho uJesu akukhuluma eSidlweni SeNkosi Sakusihlwa kusebenza ‘emhlambini omncane.’ Ababa ngabokuqala eqenjini leli kwakungabaphostoli bakhe ababethembekile ababekhona ngesikhathi esungula iSidlo SeNkosi Sakusihlwa. Abantu laba yibo abazakuba loJesu ezulwini. w24.12 11 ¶9-10

UJesu wathengiswa, wabotshwa, wathethiswa, waqanjelwa amanga, wagwetshwa njalo wahlukuluzwa. Amasotsha amqhuba emusa lapho ayezabulawelwa khona, afika ambethela esigodweni. Yena wayebuzwa ubuhlungu ngesikhathi esehlelwa yizinto zonke lezi, kodwa ukhona owayesizwa ubuhlungu obedlula lapho. Ngubani? NguJehova uNkulunkulu. Lanxa elamandla amakhulu wazibamba ukuze angavimbi ukuthi iNdodana yakhe ihlupheke. Wayekwenzelani lokhu? Akula okunye ngaphandle kothando. Umhlatshelo kaJesu uyibufakazi obukhulu obutshengisa ukuthi uJehova kakuthontisi, uyakuthanda kakhulu. Wenze konke angakwenza, wazimisela ukuthi azwe ubuhlungu obukhulu kakhulu ukuze akusindise esonweni lasekufeni. (1 Joh. 4:​9, 10) Ufuna ukuncedisa ngamunye wethu ukuthi alwisane lesono aze asinqobe! w24.08 6 ¶13-14

Okungasinceda sizwisise ukuthi uJehova usithanda kangakanani yikucabangisisa ngobuhlungu abuzwayo ngesikhathi ebona iNdodana yakhe iphathwa kubi. USathane uthi nxa inceku kaNkulunkulu ingaba sebunzimeni ngeke iqhubeke iqotho kuye. UJehova wavumela ukuthi iNdodana yakhe ithwale nzima ingakabulawa ukuze kukhanye ukuthi uSathane wayeqamba amanga. (Jobe. 2:​1-5) UJehova wayeyikhangele iNdodana yakhe ngesikhathi ichothozwa ngabakhokheli benkolo ababeyizonda, ibhaxabulwa ngamasotsha, lalapho ibethelwa esigodweni sokuhlutshwa. UJehova wayeyikhangele iNdodana yakhe ayithandayo isifa kabuhlungu. (Mat. 27:​28-31, 39) Phela uJehova wayengakuvimbela konke lokhu. (Mat. 27:​42, 43) Kodwa aluba wamvikela uJesu, akulanhlawulo eyayizabhadalwa njalo sasizaqhubeka singelathemba. Yikho uJehova wavumela ukuthi iNdodana yakhe ihlupheke kuze kube sekufeni. w25.01 22 ¶7

NguNisani 16 ngo-33 C.E. Abafundi bakaJesu basosizini futhi bayesaba kakhulu. Ababili babo bayasuka eJerusalema baye esigabeni okuthiwa yi-Emawusi. Kuthutsha umuntu abangamaziyo aqalise ukuhamba labo, abafundi besebemxoxela ngalokho okwenzakale kuJesu okubatshiye bedanile. Umuntu lo ubatshela izinto abangasoze bafa bazikhohlwa. ‘Uqalisa kuMosi lakubo bonke abaPhrofethi’ ebachasisela ukuthi kungani bekumele uMesiya ahlupheke futhi afe. Amadoda la athi efika e-Emawusi umuntu ahamba laye awavezele ukuthi ungubani. Uyabatshela ukuthi unguJesu osevusiwe. (Luk. 24:​13-35) UJesu wabonakala kanengi kubafundi bakhe phakathi kwensuku zakhe zokucina ezingu-40 esemhlabeni. Abafundi bakaJesu babekade besosizini futhi besesaba. Kodwa uJesu wathi esebakhuthazile bathokoza futhi baba lesibindi sokutshumayela lokufundisa izindaba ezinhle zoMbuso. w24.10 12 ¶1-3

Ukukhula komntwana esiba ngumuntu omdala kuyazenzakalela, kodwa ukuthuthuka ekukhonzeni khona akuzenzakaleli. Ngokwesibonelo, abazalwane beKhorinte bamukela izindaba ezinhle babhabhathizwa basebesamukela umoya ongcwele. Kanti njalo uPhawuli wabafundisa izinto ezinengi. (Imiseb. 18:​8-11) Kodwa abanye babo babelokhu bengaqinanga lanxa basebeleminyaka eminengi bebhabhathiziwe. (1 Khor. 3:2) Nxa sifuna ukuba ngamaKhristu aqinileyo kumele siqale sibe lesifiso sokuthuthuka. Labo ‘abakholisa ukuhlala bengelalwazi’ futhi abafuna ukuhlala bezinsane ekukhonzeni abasoze bathuthuke. (Zaga. 1:22) Kasifuni ukufanana lomuntu othi esekhule waba ngumuntu omdala abe elokhu esiyabuza abazali bakhe okokwenza. Kodwa sifuna ukuzithwalela imithwalo yethu, sisebenze nzima ukuze siqhubeke sithuthuka. Nxa usenza okusemandleni akho ukuthi uqhubeke uthuthuka, khuleka kuJehova umcele akuphe “isifiso lamandla okwenza okumthokozisayo.”—Flp. 2:13. w24.04 4 ¶9-10

UJehova uyasitshela ukuthi uzwa njani nxa esahlulela abantu. (Hez. 33:11) Ngeke abhubhise umuntu phakade engelasizatho sokwenza njalo. Ulesihawu esikhulu futhi uhlala ekulungele ukutshengisa abantu isihawu. Kuyini esikwaziyo ngabantu abangasoze bavuswe? IBhayibhili lisitshela ngabantu abalutshwana nje abangasoze bavuswe. UJesu wakhuluma amazwi ayetshengisa ukuthi uJudasi Iskariyothi kasoze avuswe. (Mak. 14:21; khangela lomcijo wokutaditsha okaJohane 17:12 ku-Nguqulo Yomhlaba Omutsha yesiNgisi okuthiwa yi-Study Bible.) UJudasi wayekwazi ukuthi ayekwenza kwakuphikisana lentando kaJehova kanye leNdodana yakhe kodwa waqinisa ikhanda wakwenza. (Khangela uMakho 3:29 le-Nqabayokulinda kaJuly 15, 2007 ikhasi 18.) UJesu waphinda wathi abanye abakhokheli benkolo ababemphikisa babezakufa bengelathemba lokuphinda bavuke. (Mat. 23:33) Kanti njalo umphostoli uPhawuli waxwayisa abahlamuki ababengaphenduki ukuthi babengasoze bavuswe.—Heb. 6:​4-8; 10:29. w24.05 4 ¶10-11

Nxa singahlala siseduze loJehova, loba yini uSathane asenza yona iyabe ingeyesikhatshana nje. (1 Joh. 3:8) Emhlabeni omutsha uJehova uzaqhubeka encedisa izinceku zakhe ezithembekileyo ukuthi zibe ngabangane bakhe futhi uzaqeda lokufa. (Isam. 21:4) Kuyisibusiso esikhulu ukuba setendeni likaJehova! Singenelisa ukuba ngabangane bakhe kuze kube nini lanini. (Hez. 37:27) Kodwa kumele senzeni nxa sifuna ukuhlala sisetendeni lakhe? Nxa umuntu engakunxusa emzini wakhe uyabe ufuna ukuba leqiniso lokuthi awenzi izinto ezizamcaphula. Ngendlela efananayo, lathi sifuna ukwazi lokho okumele sikwenze ukuze siqhubeke sisetendeni likaJehova. Kumele sizimisele ukwenza konke okusemandleni ethu ukuthi ‘simthokozise kukho konke’ ngenxa yokuthi siyamthanda. (Kol. 1:10) Kumele simesabe, singakhohlwa ukuthi unguNkulunkulu. Nxa simhlonipha asisoze senze izinto ezizamcaphula. Sifuna ukuhlala sihamba loNkulunkulu wethu ngokuzithoba.—Mik. 6:8. w24.06 4 ¶8-9

UJehova wacela u-Abrahama ukuthi anikele ngendodana yakhe u-Isaka. Kufanele ukuthi nxa u-Abrahama wayecabanga ngalokho wayesizwa ubuhlungu obukhulu. Lanxa kunjalo wamlalela uJehova. Wathi eseyibulala indodana yakhe uNkulunkulu wammisa. Kodwa kulesifundo esiqakathekileyo uJehova ayefuna abantu basifunde. Wayefuna sizwisise ukuthi wayezimisele ukunikela ngeNdodana yakhe ayithandayo ukuthi ibe ngumhlatshelo. UJehova kabathontisi abantu. (Gen. 22:​1-18) Ngemva kweminyaka eminengi uNkulunkulu wanika isizwe sako-Israyeli uMthetho. EMthethweni lo abantu kwakumele benze imihlatshelo ukuze bahlawulele izono zabo. (Levi. 4:​27-29; 17:11) Imihlatshelo le yayitshengisa ukuthi uJehova wayezakwenza omunye umhlatshelo ongcono kakhulu owawuzakwenza ukuthi abantu bakhululwe esonweni, kungasaphindi kufuneke omunye umhlatshelo. Abaphrofethi bakaNkulunkulu baphefumulelwa ukuthi bachasise ukuthi inzalo eyayithenjisiwe kwakumele ihlupheke futhi ibulawe ukuze abantu bakhululwe esonweni lasekufeni. Inzalo le kwaba yiNdodana kaNkulunkulu ezelwe yodwa.—Isaya. 53:​1-12. w24.08 4 ¶7-8

Nxa ubala iBhayibhili kumele ube leqiniso lokuthi uyakwenza lokho okubalayo. Ngesikhathi ulibala ungazibuza ukuthi, ‘Lokhu engikubalayo ngingakwenza njani khathesi kumbe esikhathini esizayo?’ Nansi isibonelo: Ake sithi ubala u-1 Thesalonika 5:​17, 18. Ngemva kokubala amavesi la ungama ubusucabangisisa ngokuthi ukhuleka kangaki lokuthi imithandazo yakho injani. Ungacabanga lezinye izinto ongafuna ukumbonga ngazo uJehova. Mhlawumbe ungakhetha izinto ezintathu ayabe ekwenzele zona mhlalokho ubusumbonga ngazo. Ukuzinika imizuzu emilutshwana nje ucabangisise kuzakunceda ukuthi ulizwisise iLizwi likaNkulunkulu futhi uzimisele ukwenza elikutshoyo. Nxa ungazama ukukwenza lokho nsuku zonke, uzathola okunengi kakhulu eLizwini likaNkulunkulu. Uzabe ususenelisa ukwenza lokho elikutshoyo. w24.09 4-5 ¶9-10

UJehova wasidala ngendlela emangalisayo ngoba lanxa kusithokozisa ukwamukela, okusithokozisa kakhulu yikupha abanye. Siyathokoza kakhulu nxa sincedisa labo esikhonza labo futhi nxa bangasibonga siyathaba. Kodwa kungelani lokuthi umuntu usibongile kumbe kasibonganga, okusithokozisayo yikuthi senze okuqondileyo. Ungakhohlwa ukuthi kungelani lokuthi abanye ubenzeleni, “uJehova uyenelisa ukukunika okunengi kakhulu.” (2 Imilan. 25:9) UJehova uzakunika okunengi kakhulu ukwedlula lokho wena oyabe ukunike abanye. Kambe ikhona yini intokozo enkulu engedlula ukubhadalwa nguJehova? Ngakho kasizimiseleni ukuqhubeka silingisela uBaba wethu osezulwini ophanayo. w24.09 31 ¶20-21

UJehova ulozwelo lesihawu. (Hubo. 103:13; Isaya. 49:15) Nxa siphakathi kobuhlungu, laye uyabe ebuzwa ubuhlungu esibuzwayo. (Zak. 2:8) Uyasincedisa ukuthi simazi njalo sibe ngabangane bakhe. (Hubo. 25:14; Imiseb. 17:27) Uthobekile, “uyakhothama akhangele ezulwini lasemhlabeni, aphakamise ohluphekayo amsuse emhlabathini.” (Hubo. 113:​6, 7) Konke lokhu kwenza simkhazimulise uNkulunkulu wethu omkhulu. Siyamkhazimulisa uJehova ngoba sifuna abanye babemazi. Abantu abanengi kabalazi iqiniso ngoJehova ngoba uSathane uvale ingqondo zabo ngokumemethekisa amanga ngaye. (2 Khor. 4:4) USathane wenze abantu bakholwa ukuthi uJehova nguye obangela inhlupho ezisemhlabeni lokuthi kalandaba lathi kanye lokuthi uhlala ebazondele abantu. Kodwa thina siyalazi iqiniso ngoNkulunkulu wethu. Yikho nxa sitshela abanye iqiniso leli siyabe simdumisa.—Isaya. 43:10. w25.01 3 ¶6-7

Lanxa iNdodana kaNkulunkulu yayingelasono futhi isenza izimangaliso ezinengi, uSathane wasebenzisa abantu bakhe ukuthi baqambe amanga ngayo. Ngokwesibonelo, abakhokheli benkolo batshela abantu ukuthi uJesu wayekhipha amadimoni esebenzisa amandla ayewaphiwa ‘ngumbusi wamadimoni.’ (Mak. 3:22) Ngesikhathi uJesu ethonisiswa, abakhokheli benkolo bathi wayethuke uNkulunkulu futhi babetshotshozela abantu ukuthi bathi uJesu abulawe. (Mat. 27:20) Ngokuhamba kwesikhathi abalandeli bakaKhristu bathi betshumayela izindaba ezinhle, izitha zabo ‘zayenga abantu, zenza ukuthi baphikisane’ labo ukuze babahlukuluze. (Imiseb. 14:​2, 19) INqabayokulinda kaDecember 1, 1998 yachasisa imiSebenzi 14:2 yathi: “Izitha ezazingamaJuda zazingafuni ukulalela lokho okwakukhulunywa ngamaKhristu futhi zaphinda zatshotshozela abantu bezinye izizwe ukuthi labo bangawalaleli lokuthi bawazonde.” Lalamuhla uSathane ulokhu ‘edukisa umhlaba wonke.’ w24.04 11 ¶15-16

Ukuthi umuntu uzakuthola ukuphila okuphakade akuyi ngokuthi ufe nini. UJehova nguMahluleli ongelasici njalo uhlala esahlulela kuhle. (Hubo. 33:​4, 5) Asithandabuzi ukuthi “uMahluleli womhlaba wonke” uzakwenza okulungileyo. Kulengqondo ukuthi siphethe ngalokhu: Ukuthi umuntu uzathola ukuphila okungapheliyo yini kumbe hatshi akuyi ngokuthi uhlala ngaphi. Kulamamiliyoni abantu ahlala ezindaweni lapho okungelathuba lokuzwa izindaba ezinhle zoMbuso. Ngakho uJehova ngeke ahle athi abantu laba ‘bazimbuzi.’ (Mat. 25:46) UMahluleli olungileyo womhlaba wonke uyabathanda kakhulu abantu laba ukwedlula indlela thina esingabathanda ngayo. Asikwazi ukuthi uJehova uzazihambisa njani izinto ngesikhathi sokuhlupheka okukhulu. Mhlawumbe ngesikhathi uJehova esesenza izizwe zonke ukuthi zibekwazi ukuthi ungcwele, abanye phakathi kwabantu laba bazathola ithuba lokufunda ngaye, babe lokholo kuye besebemkhonza.—Hez. 38:16. w24.05 12 ¶14-15

Abantu bakaJehova bayakuthanda ukuncedisana. (2 Khor. 8:4) Kodwa kwezinye izikhathi kudinga isibindi ukuthi bancedisane. Ngokwesibonelo, nxa kungavuka impi endaweni ethile, abadala bayananzelela ukuthi abafowethu labodadewethu bayabe sebedinga ukukhuthazwa lokusekelwa. Bayabancedisa lokuthi bathole amaBhayibhili lamabhuku ethu kanye lokuthi bathole ukudla, lezigqoko lendawo yokuhlala. Abadala bazimisele ukufaka impilo zabo engozini ukuze bancedise abazalwane ngenxa yokuthi bayabathanda. Ngezikhathi lezo ezinzima, kuqakathekile ukuthi sihlale simanyene. Lalela lokho eliyabe likutshelwa yiwofisi yegatsha. (Heb. 13:17) Abadala kumele bahlale behlola lokho okumele bakwenze ukuze balungiselele umonakalo ongaba khona. Kanti njalo kuyabe kumele balandele lokho abakutshelwa yinhlanganiso ngalokho okumele bakwenze nxa kube lengozi. (1 Khor. 14:​33, 40) Woba lesibindi kodwa uhlale unanzelela ingozi ezingaba khona. (Zaga. 22:3) Qala ucabangisise ungakenzi lutho. Nxa usenza imisebenzi yakho woba leqiniso lokuthi uvikelekile, ungaphonguzifaka engozini nje. Thembela kuJehova. Kasoze ayekele ukukuncedisa ukuze wenelise ukusiza abafowenu labodadewenu. w24.07 4 ¶8; 5 ¶11

INkosi uDavida wayemazi uJehova futhi wayethembele kuye. Wakhuleka kuye ecela ukuthi amncedise ngesikhathi ehlaselwa yiNkosi uSawuli kanye lezinye izitha zakhe. UNkulunkulu wathi esephendule umthandazo wakhe wamkhulula, uDavida wathi: “UJehova uyaphila!” (Hubo. 18:46) Evesini le kayisikho ukuthi uDavida wayevuma ukuthi uNkulunkulu ukhona nje. Elinye ibhuku elichasisa amaHubo lithi uDavida wayetshengisa ukuthi uyaqiniseka ukuthi uJehova “unguNkulunkulu ophilayo ohlala ezimisele ukunceda abantu bakhe.” Okwenzakala kuDavida kwakumtshengisa ukuthi uNkulunkulu uyaphila njalo lokho kwamnceda ukuthi azimisele ukumkhonza lokumdumisa. (Hubo. 18:​28, 29, 49) Ukuqiniseka ukuthi uJehova unguNkulunkulu ophilayo kuzasinceda ukuthi sikukhuthalele ukumkhonza. Kuzasinceda lokuthi sibe lamandla okuqinisela nxa sisebunzimeni njalo siqhubeke sisebenza nzima enkonzweni kaNkulunkulu. Kanti njalo kuzasinceda lokuthi sizimisele ukuhlala siseduze loJehova. w24.06 20-21 ¶3-4

Kuyini esikufunda emazwini umphostoli uPhawuli awatshela amaKhristu aseThesalonika? Nxa singezwa izinto ezingahambelani lalokho esikufundiswa liBhayibhili kumbe indaba ezethusayo, kumele siqedisise, sizihlolisise. Ngesikhathi seSoviet Union, izitha zethu zabhodisa incwadi okwakukhanya angathi ivela emawofisini ethu amakhulu. Incwadi leyo yayikhuthaza abafowethu labodadewethu ukuthi babumbe enye inhlanganiso. Yayikhanya angathi ivela kubazalwane sibili. Lanxa kunjalo, abafowethu ababethembekile kabazange bathatheke ngayo. Bananzelela ukuthi okwakubhalwe kuyo kwakungavumelani lalokho ababekufundisiwe. Lalamuhla, ezinye izitha zethu zisebenzisa ezempucuko zizama ukusidukisa lokwenza ukuthi singamanyani labafowethu labodadewethu. Akumelanga ‘siphange siphithane ingqondo.’ Kodwa kumele sihlolisise ukuthi esikuzwayo lesikubalayo kuyavumelana yini leqiniso esesilifundile. Nxa singenza njalo siyabe sizivikela.—2 Thes. 2:2; 1 Joh. 4:1. w24.07 12 ¶14-15

Isinqumo esiqakatheke kakhulu esingenziwa ngumuntu yikuzinikela kuJehova amkhonze labantu bakhe. UJehova ufuna sonke sikwenze lokhu. Ngenxa yani? Ufuna sibe ngabangane bakhe njalo siphile kuze kube nini lanini. (Dute. 30:​19, 20; Gal. 6:​7, 8) UJehova kasibambi ngamandla ukuthi simkhonze. Uyayekela umuntu ngamunye azikhethele lokho afuna ukukwenza. Kodwa abadala kumele benzeni nxa umKhristu obhabhathiziweyo angenza isono esikhulu? Nxa engaphenduki kuyabe kumele asuswe ebandleni. (1 Khor. 5:13) Lanxa kunjalo, uJehova uyabe elokhu ethemba ukuthi uzaphenduka kuye. Phela isizatho esiqakathekileyo esenza uJehova wasihlawulela ngoJesu yikuthi wayefuna ukuthethelela izoni eziphendukayo. Lanxa umuntu angenza isono esikhulu, uJehova uyabe elokhu emthanda, yikho eqhubeka emkhuthaza ukuthi aphenduke.—Zak. 1:3; Rom. 2:4; Jak. 4:8. w24.08 14 ¶1-2

Ngesikhathi umphostoli uJohane ebhala incwadi yakhe yesithathu kwasekulabantu ababememethekisa izimfundiso zamanga njalo bedala ukwahlukana ebandleni. Lanxa kunjalo, abanye baqhubeka “behamba eqinisweni.” Babemlalela uJehova futhi beqhubeka ‘belandela imilayo yakhe.’ (2 Joh. 4, 6) Okwakusenziwa ngamaKhristu la ayethembekile kwamthokozisa uJohane, kwaphinda kwamthokozisa uJehova. (Zaga. 27:11) Sifundani? Nxa singahlala sithembekile sizathokoza. (1 Joh. 5:3) Ngokwesibonelo, kuyasithokozisa ukwazi ukuthi nxa sisenza okuhle siyabe sithokozisa uJehova. Uyathaba nxa esibona silwisana lezilingo njalo silalela imilayo yakhe. Kanti njalo lezingilosi lazo ziyathokoza. (Luk. 15:10) Lathi siyathaba nxa sibona abanye bethu beqhubeka bethembekile. (2 Thes. 1:4) Nxa umumo lo wezinto usudlulile kuzasithokozisa ukwazi ukuthi saqhubeka siqotho kuJehova lanxa sasiphila emhlabeni obuswa nguSathane. w24.11 12 ¶17-18

Kumele umhlole okwesikhathi esinganani umuntu ungakazibiki kuye? Nxa ungajaha ukukhuluma laye kungakhanya angathi ulamawala. (Zaga. 29:20) Kanti njalo nxa ungathatha isikhathi eside ungakamtsheli, kungakhanya angathi awuyazi into oyifunayo ikakhulu nxa esenanzelele ukuthi uyamfuna. (Umtshu. 11:4) Khumbula ukuthi akudingeki ukuthi uze uqiniseke ukuthi umuntu uzatshada laye ungakamlandi. Kodwa kumele ube usuqiniseka ukuthi usukulungele ukutshada lokuthi umuntu ofisa ukuthandana laye lingahlalisana kuhle nxa lingatshada. Kumele wenzeni nxa ungananzelela ukuthi kulomuntu okufunayo? Nxa kuyikuthi awufisi ukuthandana laye, kwenze kucace lokho ngezenzo zakho. Kubi ukwenza angani uzathandana lomuntu kodwa ukwazi ukuthi awumfuni.—Efe. 4:25. w24.05 22-23 ¶9-10

Wonke amaKhristu agcotshwe nguJehova sibili futhi lathembekileyo yiwo kuphela azamukelwa nguJesu eMbusweni wezulu. Abagcotshiweyo abehluleka ukuhlala bephapheme kabasoze baqoqwe ‘labakhethiweyo.’ (Mat. 24:31) Bonke abantu bakaNkulunkulu, kungelani lokuthi balaliphi ithemba kumele balalele isixwayiso sikaJesu, bahlale bephapheme futhi baqhubeke bethembekile. Siyayithemba indlela uJehova ahlulela ngayo ngoba simazi kuhle. Asikhathazeki nxa kusiba labanye abathembekileyo abagcotshwa nguJehova khathesi. Komunye umzekeliso uJesu wakhuluma ngezisebenzi ezaqhatshwa sekungaba lihora lesi-11 ukuthi zizosebenza ensimini yamagilebisi. (Mat. 20:​1-16) Labo abaqhatshwa ntambama baphiwa umholo olingana lowalabo ababeqhatshwe ekuseni. Yikho nxa abagcotshiweyo bangatholakala bethembekile bazaphiwa umvuzo wabo wokuyabusa ezulwini kungelani lokuthi bagcotshwe nini. w24.09 24 ¶15-17

Okwenziwa nguJesu kuyasifundisa lokho esingakwenza nxa singaphathwa kubi. Abanye abantu lezihlobo zakhe babeke bamphathe kubi. Izihlobo zakhe zathi usephambene. Abakhokheli benkolo bathi usebenza lamadimoni. Amasotsha eRoma wona amchothoza, amtshaya futhi acina embulele. (Mak. 3:​21, 22; 14:55; 15:​16-20, 35-37) UJesu kazange aphindisele lanxa waphathwa kubi kangaka. Akwenzayo kusifundisani? (1 Phet. 2:​21-23) UJesu wayekwazi lokho okwakumele akwenze nxa ephathwa kubi. Yikho lathi kungasinceda kakhulu ukumlingisela. Wayesazi isikhathi sokuthula lesikhathi sokukhuluma. (Mat. 26:​62-64) Kwezinye izikhathi wayengaphenduli nxa eqanjelwa amanga. (Mat. 11:19) Nxa ephendula wayengabathethisi ababemphatha kubi futhi wayengabethuseli. w24.11 4-5 ¶9-10

Ake sithi uphe umngane wakho isipho esihle futhi obonayo ukuthi sizamnceda empilweni. Ubungezwa njani nxa ebengathatha isipho leso asifake ebhokisini akhohlwe ngaso? Akuthandabuzwa ukuthi ubungadana. Kodwa nxa ebengabonga futhi asisebenzise isipho leso kufanele ukuthi lawe ubuzathokoza kakhulu. UJehova laye wasipha isipho esiqakathekileyo, wanikela ngeNdodana yakhe ukuze isihlawulele. Kumele ukuthi uyathokoza nxa ebona ukuthi siyasiqakathekisa isipho esiligugu asipha sona lokuthi siyambonga ngothando lwakhe. (Joh. 3:16; Rom. 5:​7, 8) Kungenzakala ukuthi ngokuhamba kwesikhathi sicine singasayiqakathekisi inhlawulo, kube sengathi sesisifake ebhokisini isipho esisiphiwe nguNkulunkulu. Siyabe silaso sibili kodwa singaselandaba laso. Yikho ukuze sihlale sisiqakathekisa isipho lesi kumele sizinike isikhathi sokucabanga ngalokho uNkulunkulu loKhristu abasenzela khona. w25.01 26 ¶1-2

Nxa kubekwa umuntu ozakuba ngumdala webandla akubekwa umuntu osanda kuguquka. Lokhu akutsho ukuthi kuyabe kumele ube usuleminyaka eminengi ubhabhathiziwe, kodwa kuyabe kumele kukhanye ukuthi usulobuntu obunjengobukaKhristu. Ungakabekwa ukuthi ube ngumdala kuyabe kumele utshengise ukuthi uthobekile njengoJesu, ulindele ukuthi uJehova akunike loba yiwuphi umsebenzi ebandleni. (Mat. 20:23; Flp. 2:​5-8) Ungatshengisa ukuthi uqotho ngokuhlala uthembekile kuJehova langokulandela lokho asitshela khona esebenzisa inhlanganiso yakhe. IMibhalo ikubeka kucace ukuthi umdala kumele enelise ukufundisa. Lokhu kutsho ukuthi sekumele abe ligabazi yini nxa esenza izinkulumo? Ngitsho lakancane. Asibo bonke abadala abangamagagu ekukhulumeni, kodwa ngobunengi babo bafundisa kuhle ekutshumayeleni lalapho beselusa abafowethu labodadewethu. w24.11 23-24 ¶14-15

Nxa ungatshayisana lokunye ongakuzwisisiyo eBhayibhilini zama ukudingisisa ngakho, ubusuzinika isikhathi sokucabangisisa ngalokho okutholileyo. Mhlalokho zama ukutshona ucabangisisa ngokuthi kukutshelani ngoJehova langeNdodana yakhe langendlela abakuthanda ngayo. (Hubo 119:97 lamabala angaphansi) Ungakhalali nxa kuyikuthi uthe ubala kumbe uchwayisisa wangatholi lutho olutsha. Ukubala singakufanisa lokugebha igolide. Izikhathi ezinengi umuntu odinga igolide kuyabe kumele abekezele ngoba kungathatha amahora amanengi kumbe amalanga amanengi ukuthi athole igolide elincane nje. Kodwa kakhalali, uyaqhubeka egebha ngoba igolide liqakathekile kuye lanxa angaze athole elincane kangakanani. Ngakho yonke into entsha esiyifunda eBhayibhilini iqakatheke kakhulu ukwedlula igolide. (Zaga. 8:10) Yikho bekezela, ungakhalali ukubala iBhayibhili.—Hubo. 1:2. w25.01 25 ¶14-15

UJehova ukhangelele ukuthi sizimisele ukuthethelela abanye lanxa bengasizwisa ubuhlungu. (Hubo. 86:5; Luk. 17:4; Efe. 4:32) Kwesinye isikhathi lokho okwenziwa ngabanye kungasizwisa ubuhlungu kakhulu, ikakhulu nxa kungumngane kumbe isihlobo. (Hubo. 55:​12-14) Indlela abanye abayabe besizwise ngayo ubuhlungu ingenza sizwe angathi sigwaziwe. (Zaga. 12:18) Kwezinye izikhathi singazama ukuziqinisa sisenzela ukuthi abanye bangaboni ukuthi sizwa ubuhlungu. Ukwenza njalo kufanana lokuthi nxa ungagwazwa uyekele ingqamu ingangcothulwanga. Lathi ngeke sikhangelele ukuthi sizwe ngcono singazange senze lutho ngobuhlungu esibuzwayo. Nxa umuntu angasiphambanisa kulula ukuthi sihle sizonde. IBhayibhili liyatsho lalo ukuthi singazonda. Kodwa liyasixwayisa ukuthi singahlali sifuthelene. (Hubo. 4:4; Efe. 4:26) Ngenxa yani? Ngenxa yokuthi nxa umuntu ezondile kukalutshwana ukuthi enze okuqondileyo. (Jak. 1:20) Khumbula ukuthi nxa umuntu angasizondisa siyazikhethela ukuthi sizahlala sizondile yini kumbe sizakwehlisa umoya. w25.02 15 ¶4-6

UJesu wasebenzisa umzekeliso ukuze asincede sizwisise ukuthi kuyibuthutha ukugijimisa imali lenotho emhlabeni thina singanothanga kuNkulunkulu. (Luk. 12:​16-21) Phela akulamuntu olaziyo elakusasa. (Zaga. 23:​4, 5; Jak. 4:​13-15) UJesu waphinda wathi bonke abafisa ukuba ngabalandeli bakhe kumele bazimisele ‘ukutshiya’ yonke impahla abalayo bamlandele. (Luk. 14:33) Lokhu yikho kanye okwenziwa ngamaKhristu akuqala aseJudiya ngesikhathi sabaphostoli. (Heb. 10:34) Lalamuhla abanye abafowethu labodadewethu balahlekelwa yizinto abalazo ngenxa yokungangeneli kwezombusazwe. (Isam. 13:​16, 17) Kuyini okubenza bazimisele ukwenza lokhu? Yikuwakholwa ngenhliziyo yonke amazwi akhulunywa nguJehova athi: “Angisoze ngikutshiye loba sekutheni, angisoze ngikulahle loba sekutheni.” (Heb. 13:5) Liqiniso ukuthi senza konke esingakwenza ukuze silungiselele elakusasa, kodwa nxa izinto zingaphonguthi phendu, asithandabuzi ukuthi uJehova uzaqhubeka esincedisa. w25.03 29 ¶13-14

UJehova kakhangelelanga ukuthi sisebenze nzima sodwa ukuze sithuthuke. Labo abaphiwe umsebenzi wokwalusa lokufundisa ebandleni bazimisele ukusincedisa ukuthi ‘sikhule ngokwaneleyo’ kumbe ukuthi sithuthuke size “sifike ebangeni lokukhula ngokugcweleyo njengoKhristu.” (Efe. 4:​11-13) UJehova uyasinika lomoya wakhe ongcwele ukuze usincede ukuthi sibe ‘lengqondo kaKhristu.’ (1 Khor. 2:​14-16) Kanti njalo wasipha amaVangeli amane asitshengisa indlela uJesu ayecabanga ngayo lalokho akukhulumayo kanye lezinto azenzayo ngesikhathi esemhlabeni. Nxa singalingisela indlela uJesu ayecabanga ngayo lalokho ayekwenza singathuthuka sibe ngamaKhristu aqinileyo. Kodwa kumele sifunde ‘sidlule emfundisweni yokuqala emayelana loKhristu’ ukuze sithuthuke. w24.04 4-5 ¶11-12

Izinqumo sizenza kusa kwamalanga. Ezinye zakhona zilula njengokukhetha ukuthi udleni ekuseni kumbe ukuthi ulale sikhathi bani. Kodwa ezinye kunzima ukuzenza. Phela ezinye yizo ezitshoyo ukuthi impilakahle yakho izakuba njani, ukuthi uzathokoza yini loba hatshi, kumbe ukuthi uzaqhubeka umkhonza kuhle yini uJehova. Ezinye zingatshiya imuli yakho ithokoza kumbe idanile. Sifuna ukwenza izinqumo ezisincedayo futhi ezinceda lemuli zethu. Okuqakatheke kakhulu yikuthi senze izinqumo ezizathokozisa uJehova. (Rom. 12:​1, 2) Nxa ufuna ukwenza isinqumo esihle into eqakathekileyo okuyabe kumele uyenze yikudinga konke okuphathelane lendaba. Kuqakatheke ngani lokho? Ake sithi uyagula ubususiya kudokotela. Ubungathini nxa udokotela lo engakubhalela amaphilisi engazange akubuze imibuzo kumbe akuhlole? Udokotela oyingcitshi uqala ahlole isigulane futhi asibuze imibuzo engakenzi isinqumo. Yikho lawe uzenza izinqumo ezinhle nxa ungaqala udinge konke okuphathelane lendaba. w25.01 14 ¶1-3

Kuyini esikwaziyo ngesihawu sikaJehova? Utshengise njani ukuthi “kafisi ukuthi loba ngubani abhujiswe”? (2 Phet. 3:9) Ake sixoxe ngendlela aba lesihawu ngayo kwabanye abenza izono ezinkulu. INkosi uDavida yake yenza izono ezinkulu ezigoqela ukufeba kanye lokubulala. Kodwa uJehova waba lesihawu kuyo wayithethelela ngoba yaphenduka. (2 Sam. 12:​1-12) INkosi uManase layo yenza izono ezinengi ezimbi kakhulu okwesikhathi eside. Lanxa kunjalo uJehova waba lesihawu kuyo wayithethelela ngoba yayisiphendukile. (2 Imilan. 33:​9-16) Lokhu kusikhumbuza ukuthi uJehova uba lesihawu ebantwini nxa kulesizatho sokuthi enze njalo. Uzabavusa abantu labo ngoba bananzelela ukuthi babesenza izinto ezimbi kakhulu basebephenduka. w24.05 4 ¶12