IZaga 29:1-27
29 Umuntu osekhuzwe kanengi elokhu eqinisa intamo,*+Uzahlifizwa ngokucwayiza kwelihlo angaphindi asile.+
2 Abantu bayathokoza nxa abalungileyo bebanengi,Kodwa bayakhala* nxa kubusa umuntu owenza okubi.+
3 Umuntu othanda ukuhlakanipha uthokozisa uyise,+Kodwa ozwanana lamawule uyayitshaphaza inotho yakhe.+
4 Inkosi yenza kube lokuhlaliseka elizweni nxa isahlulela kuhle,+Kodwa umuntu othanda ukufunjathiswa uyalidiliza ilizwe.
5 Umuntu oncoma umakhelwane wakhe emyenga,Uzifakela umambule enyaweni.+
6 Umuntu owenza okubi uthiywa yisiphambeko sakhe,+Kodwa olungileyo umemeza ngentokozo njalo uyajabula.+
7 Olungileyo uyawananza amalungelo abayanga,+Kodwa owenza okubi kalandaba lawo.+
8 Abantu abazikhukhumezayo bayalithungela ngomlilo idolobho,+Kodwa abahlakaniphileyo bayaluqeda ulaka.+
9 Nxa umuntu ohlakaniphileyo ephikisana lesiphukuphuku,Kuba lokutshingelana lokweyisana kodwa akulungi lutho.+
10 Abomele ukuchitha igazi bazonda loba ngubani ongelacala,*+Njalo bafuna ukubulala abantu abathembekileyo.*
11 Isithutha sikhipha lonke ulaka lwaso,*+Kodwa ohlakaniphileyo uyazikhuza, abambe ulaka lwakhe.+
12 Nxa umbusi elalela amanga,Zonke izinceku zakhe zizakwenza okubi.+
13 Umyanga lalowo ocindezela abanye bafanana ngalokhu:
UJehova unika amehlo abo bobabili ukukhanya.*
14 Nxa inkosi isahlulela kuhle abayanga,+Isihlalo sayo sobukhosi sizakuma kokuphela.+
15 Uswazi* kanye lokukhuza kunika ukuhlakanipha,+Kodwa umntwana oyekelelwayo* uyangisa unina.
16 Nxa abenza okubi besanda, lesiphambeko siyanda,Kodwa abalungileyo bazabona ukuwa kwabo.+
17 Laya indodana yakho, izakuphumuza,Izakwenza uthokoze kakhulu.+
18 Nxa umbono ungekho,* abantu bazenzela umathanda.+
Kodwa bayathokoza abalandela umthetho.+
19 Isisebenzi kasivumi ukuqondiswa ngamazwi,Ngoba lanxa sizwisisa asilaleli.+
20 Sewake wambona yini umuntu okhuluma ngewala?+
Isiphukuphuku silethemba elingcono kulaye.+
21 Nxa isisebenzi singatotozwa sisakhula,Ekucineni sizakuba ngumuntu ongabongiyo.
22 Umuntu ozonda masinyane uvusa umsindo,+Lomuntu ophangisa ukuthukuthela uhlala ephambanisa.+
23 Ukuziphakamisa komuntu yikho okuzamehlisa,+Kodwa othobekileyo emoyeni uzathola udumo.+
24 Ozwanana lesela uyazizonda.
Lanxa engabizwa ukuthi azofakaza kakhulumi lutho.+
25 Ukwesaba abantu kungumjibila,*+Kodwa othemba uJehova uzavikelwa.+
26 Abantu abanengi bayafuna ukukhuluma lombusi ukuze bathole uncedo,*Kodwa umuntu ukuthola kuJehova ukwahlulelwa kuhle.+
27 Ongalunganga uyenyanyeka kwabalungileyo,+Kodwa lowenza okubi laye uyamenyanya umuntu ohamba ngendlela yokuthembeka.+
Amabala angaphansi
^ Kumbe, “oba yisiqholo.”
^ Kumbe, “bayabubula.”
^ Kumbe, “omsulwa.”
^ Ezinye inguqulo zithi, “Kodwa othembekileyo ufuna ukuvikela impilo yakhe.”
^ Kumbe, “konke esikuzwayo ngaphakathi.”
^ Lapha kutshiwo ukuthi ubanika ukuphila.
^ Kumbe, “Ukulaya; Ukujezisa.”
^ Kumbe, “ongakhuzwayo.”
^ Kumbe, “isambulo singekho; umbono oyisiphrofetho ungekho.”
^ Kumbe, “kuba yisithiyo.”
^ Ezinye inguqulo zithi, “bafuna ukwenzelwa umusa ngumbusi.” NgesiHebheru, “badinga ubuso bombusi.”
