Abafundi bakaJesu balamukela iLizwi likaNkulunkulu futhi benza konke okusemandleni abo ukuthi bakwenze lokho ababekufunda. (Joh. 17:6) Kodwa babelokhu bengazwisisi ukuthi kungani uJesu wayebulewe ngendlela ebuhlungu kangaka futhi waphathwa njengesigebenga. UJesu wabona ukuthi okwakusenza bakhathazeke yikuthi babengayizwisisi iMibhalo, hatshi ukuthi babengaselakholo. (Luk. 9:​44, 45; Joh. 20:9) Yikho wabancedisa ukuthi bayizwisise kuhle. Ake sibone ukuthi wakwenza njani lokhu ngesikhathi ebonakala kubafundi ababili ababesiya e-Emawusi. UJesu kazange ahle atshele amadoda la ukuthi wayengubani, kodwa wawabuza imibuzo. Ngenxa yani? Kungenzakala wayefuna atsho okwakusezingqondweni zawo lezinhliziyweni zawo. Lokho yikho kanye akwenzayo. Amtshela ukuthi ayekhangelele ukuthi uJesu akhulule abako-Israyeli ekucindezelweni ngamaRoma. (Luk. 24:​18-27) UJesu wasebenzisa iMibhalo ukuze awancede azwisise lokho okwakwenzakele. Ngalelolanga ntambama, wabonakala lakwabanye abafundi futhi wabachasisela okwakutshiwo yiziphrofetho.—Luk. 24:​33-48. w24.10 14 ¶9-10

Lokho uJesu ayekwenza lalokho ayekukhuluma wayekufundiswe nguYise osezulwini. Inhlanganiso kaJehova ilingisela uJesu ngokusebenzisa iLizwi likaNkulunkulu ukuthi isitshele lokho okulungileyo lokungalunganga kanye lalokho okukhangelelwe ukuthi sikwenze. (2 Thim. 3:​16, 17) Sihlala sikhunjuzwa ukuthi sibale iLizwi likaNkulunkulu lokuthi sikusebenzise esikubala kulo. Ukutaditsha iBhayibhili sisebenzisa amabhuku enhlanganiso kuyasinceda kakhulu. Siyenelisa ukuqathanisa lokho okufundiswa liBhayibhili lalokho inhlanganiso esitshela khona isebenzisa amabhuku ethu. Nxa sibona ukuthi lokho esikutshelwa yinhlanganiso kaJehova kusekelwe eMibhalweni, siyayithemba kakhulu. (Rom. 12:2) UJesu wayetshumayela “izindaba ezinhle zoMbuso kaNkulunkulu.” (Luk. 4:​43, 44) Kanti njalo walaya abafundi bakhe ukuthi batshumayele ngoMbuso. (Luk. 9:​1, 2; 10:​8, 9) Lamuhla bonke abantu abasenhlanganisweni kaJehova batshumayela izindaba ezinhle zoMbuso. Lokhu bakwenza kungelani lokuthi bahlala ngaphi. w24.04 9 ¶5-7

Hlala ukuthemba esikutshelwa yinhlanganiso kaJehova. Ngesikhathi sama-Israyeli, uJehova wayesebenzisa uMosi loJoshuwa ukuze batshele abantu lokho okwakumele bakwenze. (Josh. 1:17) Nxa ama-Israyeli ayekhumbula ukuthi amadoda la ayesetshenziswa nguJehova, izinto zaziwahambela kuhle. Kwadlula iminyaka eminengi kwasekubunjwa ibandla lamaKhristu njalo abaphostoli abangu-12 yibo ababelikhokhela. (Imiseb. 8:​14, 15) Ngokuhamba kwesikhathi abanye abadala ababeseJerusalema baba phakathi kweqembu leli elalikhokhela. Nxa amabandla ayelandela lokho ayekutshelwa ngamadoda la ayethembekile ‘ayeqhubeka eqiniswa ekukholweni, labazalwane besanda usuku ngosuku.’ (Imiseb. 16:​4, 5) Lalamuhla uJehova uyasibusisa nxa silandela lokho esikutshelwa yinhlanganiso yakhe. w24.07 10 ¶10

UJehova wayemthanda kakhulu uDavida waze wathi ‘uyindoda ethokozisa inhliziyo yakhe.’ Kodwa uDavida wenza izono ezinkulu ezigoqela ukufeba lokubulala. UMthetho kaMosi wawusithi umuntu owenze izono ezinjalo kumele abulawe. (Levi. 20:10; Nani. 35:31) Kodwa uJehova kazange akuvumele ukuthi uDavida abulawe. Wathuma umphrofethi wakhe uNathani kuDavida lanxa wayengakenzi lutho olwalutshengisa ukuthi uyaphenduka. UNathani wasebenzisa umzekeliso owathinta inhliziyo kaDavida. UDavida wazwisisa, wasephenduka. (2 Sam. 12:​1-14) Ngemva kwalokho uDavida wabhala iHubo elaveza ukuthi wayezisola kakhulu ngalokho ayekwenzile. (Hubo. 51, isethulo) IHubo leli seliduduze abantu abanengi abayabe benze izono, labanceda bazimisela ukuphenduka. Siyambonga kakhulu uJehova ngokuthi wancedisa inceku yakhe ayeyithanda uDavida ukuthi iphenduke. w24.08 10 ¶9

Ukukhulisa umntwana ngumsebenzi omkhulu kakhulu. Nxa ungumzali akuthandabuzwa ukuthi wenza konke ongakwenza ukuze uncedise umntanakho abe lokholo oluqinileyo. Siyakuncoma ngalokho. (Dute. 6:​6, 7) Nxa umntwana ekhula angaqalisa ukubuza imibuzo emayelana lalokho esikukholwayo njalo angabuza ukuthi kungani iBhayibhili lisalisa ukwenza ezinye izinto. Kungaqala kukukhathaza ukubona umntanakho esengathi uyakuthandabuza lokho esikukholwayo. Ungabona angathi kasakholwa kuNkulunkulu lokuthi kasakukholwa okutshiwo liBhayibhili. Kodwa kuhle ukuthi abantwana babuze imibuzo ngoba lokho kuyaluqinisa ukholo lwabo. (1 Khor. 13:11) Ngakho akumelanga ukhathazeke kakhulu. Nxa umntanakho angakubuza mayelana lalokho esikukholwayo, kuthathe njengethuba lokumncedisa ukuthi acabangisise ngakho ngoba lokho kuzamnceda ukuthi aqinise ukholo lwakhe. w24.12 14 ¶1-2

AmaKhristu angamaHebheru kwakumele abe lokholo oluqinileyo ukuze asinde ngesikhathi sokuhlupheka okwasekuzaqalisa eJudiya. (Heb. 10:​37, 38) UJesu wayexwayise abalandeli bakhe ukuthi nxa bengabona iJerusalema isigonjolozelwe ngamabutho, baqalise ukubaleka. AmaKhristu wonke kwakumele awalalele amazwi la kungelani lokuthi ayehlala phakathi eJerusalema kumbe emaphandleni. (Luk. 21:​20-24) Okwakujayelekile ngalesosikhathi yikuthi nxa abantu babehlaselwa yisitha babalekele edolobheni elaligonjolozelwe yimiduli njengeJerusalema. Kwakungakhanya kuyibuphukuphuku ukuthi umuntu ohlala edolobheni elinjalo abalekele ezintabeni. Yikho kwakudinga ukuthi amaKhristu abe lokholo oluqinileyo sibili. AmaKhristu angamaHebheru kwakumele abathembe labo ababebekwe nguJesu ukuthi bakhokhele ibandla. Kumele ukuthi ababekhokhela ebandleni batshela abantu ukuthi babaleke nini lokuthi lokho kwakumele bakwenze njani.—Heb. 13:17. w24.09 10 ¶9-10

Ngesikhathi uJesu esemhlabeni, wawenza kuhle umsebenzi uYise ayemthume ukuthi awenze. (Joh. 17:4) Kodwa kazange azitshele ukuthi nxa ufuna into iphume kuhle kumele uzenzele wena. Wafundisa abanye ukuthi labo bawenze kuhle. Wanika abafundi bakhe umsebenzi wokunakekela izimvu zikaJehova eziligugu lokukhokhela emsebenzini wokutshumayela lokufundisa. UJesu wayengababhodi abafundi bakhe nxa wayefuna ukubakhuza. Kodwa wayekhuluma labo kuhle. Abanye babelomkhuba wokuthandabuza, wasebakhuza. (Luk. 24:​25-27; Joh. 20:27) Wabafundisa ukuthi bawuqakathekise kakhulu umsebenzi wokwelusa izimvu zikaNkulunkulu ukwedlula amabhizimusi abo. (Joh. 21:15) Wabakhumbuza ukuthi bangakhathazeki kakhulu nxa bebona abanye bephiwa imisebenzi yenkonzo abangelayo. (Joh. 21:​20-22) Kanti njalo waqondisa imicabango engaqondanga ababelayo ngoMbuso, wasebancedisa ukuthi bacabange kakhulu ngezindaba ezinhle okwakumele zitshunyayelwe.—Imiseb. 1:​6-8. w24.10 15-16 ¶13-14

Nxa singalalela uJehova sizaphila kuze kube nini lanini. Ama-Israyeli ayesezangena eLizweni Lesithembiso. Lathi sesizangena emhlabeni omutsha esiwuthenjiswe nguNkulunkulu, sibone umhlaba utshintshwa usiba lipharadayisi. (Isaya. 35:1; Luk. 23:43) USathane lamadimoni akhe bayabe bengasekho. (Isam. 20:​2, 3) Zonke inkolo zamanga ezidukisa abantu ziyabe zingasekho. (Isam. 17:16) Bayabe bengasekho ohulumende abadlisa abantu imbuya ngoluthi. (Isam. 19:​19, 20) Epharadayisi kuyabe kungela ngitsho lesisodwa isigebenga. (Hubo. 37:​10, 11) Wonke umuntu uyabe elalela imithetho kaJehova, yikho emhlabeni abantu bazabe bemanyene futhi kulokuthula. Bayabe bethandana futhi bethembana. (Isaya. 11:9) Sisilindele ngabomvu lesosikhathi. Kanti njalo nxa singamlalela uJehova asisoze siphile okweminyaka emilutshwana nje, sizaphila emhlabeni olipharadayisi kuze kube nini lanini.—Joh. 3:16. w24.11 9 ¶7

Isiphrofetho esisembhalweni walamuhla sigcwaliseka ngendlela emangalisayo ngensuku zethu. Izindaba ezinhle zoMbuso zitholakala ngezindimi ezedlula 1 000 njalo abantu abanengi bayenelisa ukungena kuwebhusayithi yethu i-jw.org ukuze bafunde okunengi ngoMbuso kaNkulunkulu. UJesu watshela abafundi bakhe ukuthi wayezaze abuye ‘bengakawabhodi wonke amadolobho’ kumbe bengakatshumayezi umuntu wonke. (Mat. 10:23; 25:​31-33) Okwakhulunywa nguJesu yikho okuzakwenzakala lasesikhathini sethu. Lamuhla kulamamiliyoni abantu abahlala ezindaweni esingenelisi ukutshumayela sikhululekile kuzo. Kanti njalo umzuzu ngamunye kuzalwa abantwana abanengi. Senza konke okusemandleni ethu ukuthi sitshumayeze abantu “kuzo zonke izizwe, lezizwana, lezindimi.” (Isam. 14:6) Lanxa kunjalo kasisoze senelise ukutshumayeza abantu bonke ukuphela kungakafiki. w24.05 10 ¶6-7

UJesu wayekhuluma kuhle labanye ukuze abaduduze njalo abavuselele. Kazange akhulume amazwi azwisa abafundi bakhe ubuhlungu. (Luk. 8:​47, 48) Nxa amadoda angalingisela uJesu ayabe esenza kuhle kakhulu. Watshela amadoda ukuthi kumele abe qotho kubomkawo. Waphinda amazwi atshiwo nguYise ukuthi indoda kumele “inamathele kumkayo.” (Mat. 19:​4-6) Lokhu kutsho ukuthi indoda lomfazi kumele bazwanane kakhulu kube angathi bananyathiselwe ndawonye. Nxa omunye wabo angenza ubutshapha bobabili bayezwa ubuhlungu. Indoda ethanda umkayo ngaleyondlela izaxwaya iphonografi. Kayiqali ukukhangela ‘izinto ezingelancedo.’ (Hubo. 119:37) Izabe ingathi iyenze isivumelwano lamehlo ayo esokuthi kayisoze ikhangele omunye owesifazana ize imhawukele.—Jobe. 31:1. w25.01 10 ¶12-13

Kunzima ukuzwisisa ukuthi umuntu uyabe esitshoni nxa esithi, “Sengikuthethelele.” Indlela uJehova asithethelela ngayo itshiyene kakhulu lendlela thina esithethelelana ngayo. Akula ngitsho loyedwa umuntu ongathethelela njengoJehova. Umhubi wakhuluma ngoJehova wathi: “Wena uyathethelela sibili, ukuze abantu bakwesabe.” (Hubo. 130:4) Leli liqiniso, uJehova “uyathethelela sibili.” Sifunda kuye indlela okumele sithethelele ngayo abanye. Kwamanye amavesi abalobi beBhayibhili babesithi nxa bekhuluma ngokuthethelela kukaJehova basebenzise elinye ibala lesiHebheru ababengalisebenzisi nxa bekhuluma ngokuthethelela kwabantu. Nxa uJehova ethethelela umuntu, uhle acitshe isono sakhe baphinde babe ngabangane. Indlela uJehova asithethelela ngayo iyamangalisa njalo siyambonga kakhulu ngoba kadinwa ngokusithethelela. w25.02 8 ¶1-3

Ukuphumelela kwethu enkonzweni akuyi ngokuthi abantu bayasilalela yini kumbe abasilaleli. Kungani sisitsho njalo? Ngenxa yokuthi nxa sitshumayelile siyabe senze lokho uJehova loJesu abafuna sikwenze. Lanxa singaswela umuntu wokuxoxa laye kumbe siphikiswe, singathokoza ngoba siyabe sijabulise uBaba wethu osezulwini. (Zaga. 27:11) Nxa omunye ummemezeli angathola umuntu ofuna ukufunda iBhayibhili, kumele sithokoze laye. Eyinye iNqabayokulinda yafanisa umsebenzi esiwenzayo lokudinga umntwana olahlekileyo. Abantu abanengi bangaphuma ijumo besiyamdinga. Nxa engatholakala ayisikho ukuthi lowomuntu omtholileyo nguye yedwa othokozayo kodwa abantu bonke bayathokoza. Ngendlela efananayo sonke ebandleni sisebenza ndawonye emsebenzini wokudinga abafundi. Kuyabe kumele sisebenze sonke ukuze siqede insimu. Kanti njalo sonke siyathokoza nxa umuntu ofunda iBhayibhili angaqalisa ukuza emihlanganweni yethu. w24.04 18 ¶13-14

Sikulindele ngabomvu ukubona izinto ezizakwenzakala esikhathini esizayo! Sikhulekela ukuthi uJehova asibusise sibone abantu abanengi besamukela iqiniso ukuhlupheka okukhulu kungakaqalisi. Okunye esikukhangeleleyo yikuthi langesikhathi sokuhlupheka okukhulu abanye abantu bazatshiya umhlaba kaSathane babuye bezokhonza uJehova ndawonye lathi! Sisamelele ukuthi konke lokhu kwenzakale kulomsebenzi okumele siqhubeke siwenza. Silesibusiso sokutshumayela izindaba ezinhle zoMbuso kaNkulunkulu emhlabeni wonke njalo umsebenzi lo awusoze uphinde wenziwe. Kanti njalo kumele siqhubeke sixwayisa abantu ngezinto esezizakwenzakala. Abantu kumele babekwazi ukuthi ukuphela komumo lo wezinto sekuseduze kakhulu. Sizimisele ukuqhubeka siwuqakathekisa umsebenzi wokutshumayela futhi siwenza ngentshiseko ngenxa yokuthi siyazithanda izindaba ezinhle futhi siyabathanda abantu. Okuqakatheke kakhulu yikuthi siyamthanda uJehova lebizo lakhe. Umsebenzi lo sizawenza aze athi “Sekwanele!” w24.05 19 ¶14-16

UJesu engakabulawa wafundisa uPhetro labanye abaphostoli isifundo esiqakathekileyo esimayelana lokuthobeka. Abafundi bakhe bamangala kakhulu bembona esenza umsebenzi owawandise ukwenziwa yisigqili. UJesu wabeka eceleni izembatho zakhe zangaphandle wasethatha ithawulo wayithandela ekhalweni, wathela lamanzi enditshini, waseqalisa ukugezisa abafundi bakhe inyawo. (Joh. 13:​4, 5) Kumele ukuthi wathatha isikhathi eside egezise inyawo zabaphostoli abangu-12 okugoqela lezikaJudasi owayezamthengisa. Kodwa uJesu wenza umsebenzi lo ngenxa yokuthi wayethobekile. Ngemva kwalokho uJesu wathi kubo: “Liyakuzwisisa yini lokhu engikwenze kini? Lingibiza ngokuthi ‘Mfundisi’ langokuthi ‘Nkosi’ njalo liqondile ngoba ngiyikho lokho. Yikho nxa mina engiyiNkosi loMfundisi ngiligezise inyawo, lani kumele ligezisane inyawo.”—Joh. 13:​12-14. w25.03 10 ¶9-11

Abantu esiphila labo benza kube nzima ukuthi sihlale siseduze loJehova. Abanengi bayakwala ukuthi uNkulunkulu ukhona. Izikhathi ezinengi labo abangenzi okufunwa nguNkulunkulu bakhanya bephumelela. Lokhu kungenza kube nzima ukuthi siqhubeke sikholwa kuNkulunkulu. Lanxa singeke siphike ukuthi uNkulunkulu ukhona, singaqalisa ukuthandabuza ukuthi uzasincedisa. Umlobi weHubo 73 kwake kwamhlupha lokho. Wayebona abantu bengelandaba lemithetho kaNkulunkulu kodwa izinto ziqhubeka zibahambela kuhle. Lokho kwamenza wazibuza ukuthi kuyanceda yini ukuthi aqhubeke ekhonza uNkulunkulu. (Hubo. 73:​11-13) Kuyini okwanceda umhubi ukuthi alungisise indlela ayesecabanga ngayo? Wacabangisisa ngokwakuzakwenzakala kulabo abayekela ukuthemba uJehova. (Hubo. 73:​18, 19, 27) Wacabanga langezibusiso ezitholwa ngumuntu okhonza uJehova. Lathi kungaba kuhle ukuthi sicabange ngezibusiso ezinengi uJehova asiphe zona. w24.06 25 ¶16-17

Kudala ngezikhathi zeBhayibhili abanye babecindezela abafowabo abangabayanga ngokubaboleka imali besebebabhadalisa isilenzuzo. Abanye abahluleli babevuma ukufunjathiswa besebesahlulela kubi abantu abangelacala. Izinto lezi ziyenyanyeka kuJehova. (Hez. 22:12) Kungaba kuhle ukuthi sihlale sihlola indlela esiyibona ngayo imali. Zibuze imibuzo le: ‘Ngihlala ngicabanga ngemali yini kumbe ngezinto ebengingazithenga aluba bengilayo? Nxa ngingaboleka imali ngiyaphuza yini ukuyibhadala ngizitshela ukuthi umuntu ongiboleke yona kayidingi? Ukuba lemali kungenza ngizibone ngiqakathekile yini? Kunzima yini ukuthi ngiyiphe abanye? Ngicabanga ukuthi abafowethu labodadewethu abalemali bayithanda ukwedlula uJehova yini? Ngingumngane labantu abanothileyo kuphela yini?’ Okuzasinceda ukuthi uJehova ahlale esamukela yikuxwaya ukuthanda imali. Nxa singenza njalo uJehova kasoze asitshiye. w24.06 12-13 ¶17-18

Ukuze singaweli esilingweni sokwenza isono kumele sizifundise ukuthanda ukwenza okulungileyo. Nxa singafunda ‘ukuzonda okubi sithande okuhle’ sizazimisela kakhulu ukwenza okulungileyo. (Amos. 5:15) Nxa singahlala sicabanga ukwenza okuhle sizakuma siqine lanxa silingwa ukuthi senze okubi. Kumele sihlale sisenza izinto ezinengi eziphathelane lokukhonza. Nxa sisemihlanganweni yebandla kumbe sisekutshumayeleni siyabe siqinisa isifiso sethu sokuthokozisa uJehova. (Mat. 28:​19, 20; Heb. 10:​24, 25) Ukubala iLizwi likaNkulunkulu lokulitaditsha besesicabangisisa ngalo kuzasinceda ukuthi sithande okuhle besesizonda okubi. (Josh. 1:8; Hubo. 1:​2, 3; 119:97) Khumbula ukuthi uJesu watshela abafundi bakhe wathi: ‘Hlalani likhuleka ukuze lingangeni ekulingweni.’ (Mat. 26:41) Nxa singenza njalo siyabe sinika uJehova ithuba lokuthi asincedise futhi ukuthandaza kusinceda lokuthi sizimisele ukwenza okumthokozisayo.—Jak. 4:8. w24.07 17-18 ¶14-16

Nxa kulabantu obafundisa ukwenza umsebenzi othile, lingisela uJehova. Khumbula ukuthi uJehova kancitshani lokuhlakanipha kwakhe. Lathi kumele sinike abanye ulwazi kanye lokuhlakanipha, singagodli lutho. Asiyekeli ukunika abanye lonke ulwazi esilalo sisesaba ukuthi bazacina bephiwa umsebenzi esiwenzayo. Nxa kuyikuthi sazifundela sodwa ukwenza umsebenzi othile, akumelanga sizitshele ukuthi asisoze sifundise muntu ngoba sazifundela. Akulamuntu kaJehova okumele abe lomcabango onjalo. Ngakho labo esibafundisayo sifuna ukubanika lonke ulwazi size sibanike “ngitsho lokuphila kwethu.” (1 Thes. 2:8) Sithemba ukuthi labo ‘bazafanela sibili ukufundisa abanye.’ (2 Thim. 2:​1, 2) Nxa sonke singaba ngabantu abaphanayo, sabele abanye ukuhlakanipha kwethu sizathokoza futhi labo bazathokoza. w24.09 29 ¶12-13

Nxa ubona angathi wena awulakho onganceda ngakho abanye ungakhathazeki. Akuthandabuzwa ukuthi ulakho okuhle ongakwenzela abanye ebandleni. Okunye ongakwenza yikubala amazwi abhalwa ngumphostoli uPhawuli aku-1 Khorinte 12:​12-30 njalo ucele uJehova akuncede ubone ukuthi ungakwenza njani okusemazwini la. Amazwi kaPhawuli aveza ukuthi wena uqakathekile njengazo zonke izinceku zikaJehova lokuthi ulakho ongakwenza okuzanceda ibandla. Yenza konke okusemandleni akho emsebenzini kaJehova njalo uncedise labafowenu labodadewenu. Qiniseka ukuthi abadala bazakunika imisebenzi ehambelana lalokho owenelisa ukukwenza. (Rom. 12:​4-8) Wonke umKhristu kumele aqhubeke esondela kuJehova, abe ngumuntu ophanayo njalo aphile ngendlela ethokozisa uJehova. w24.11 17 ¶12-13

UHana wayelenhlupho ezinengi ezazisenza ukuthi ahlale ekhala. Olunye uhlupho ayelalo yikuthi wayesesithenjini futhi unyanewabo uPhenina wayemzonda. Okwakubuhlungu kakhulu yikuthi uPhenina wayelabantwana abanengi yena engela. (1 Sam. 1:​1, 2) UPhenina wayehlala emchothoza uHana ngenxa yokuthi wayengatholi abantwana. UHana yena kwakumzwisa ubuhlungu “akhale aze ehluleke lokudla” futhi ‘inhliziyo yakhe yayisiba buhlungu kakhulu.’ (1 Sam. 1:​6, 7, 10) Wayesenzani ukuze athole induduzo? Okunye ayekwenza yikuyakhonza uJehova ethabanikeli. Ngelinye ilanga wathi ekhonale wancenga uJehova wathi: ‘Khangela ukuthi mina incekukazi yakho ngihlupheka njani futhi ungikhumbule.’ (1 Sam. 1:11) UJehova wayebubonile ubunzima ayekubo, wakuzwa ukukhala kwakhe futhi ngokuhamba kwesikhathi wambusisa waba labantwana.—1 Sam. 1:​19, 20; 2:21. w24.12 21 ¶5-7

Inhlawulo isifundisa ukuthi uJesu uyabathanda kakhulu abantu, ikakhulu abalandeli bakhe. (Joh. 13:1) UJesu wayekwazi ukuthi ezinye izinto okwakumele azenze emhlabeni zazizabe zinzima kakhulu, ngokwesibonelo kwakumele afe kabuhlungu. Lanxa kunjalo, konke ayekwenza ngesikhathi esemhlabeni wayekwenza ngenhliziyo yonke ngenxa yokuthi wayebathanda abantu. Umsebenzi wokutshumayela lowokufundisa wayewenza ngenhliziyo yonke futhi wayebancedisa abantu ngoba ebathanda. Langelanga abulawa ngalo wagezisa abaphostoli bakhe inyawo, wazinika isikhathi sokubakhuthaza lokubaduduza. (Joh. 13:​12-15) Ngesikhathi elengiswe esigodweni wazinika isikhathi sokukhuluma lesigebenga esasibethelwe eceleni kwakhe, wasinika ithemba njalo wahlela lokuthi ngubani ozasala egcine unina. (Luk. 23:​42, 43; Joh. 19:​26, 27) Kuyacaca ukuthi uJesu wayebathanda kakhulu abantu okwempilo yakhe yonke futhi lokhu wakutshengisa langokubafela. w25.01 23 ¶11

IBhayibhili lisebenzisa umzekeliso ukuze lisincede sizwisise ukuthi nxa uJehova angasithethelela sisala sikhululekile. Lithi ‘siyizigqili zesono’ ngenxa yokuthi sizelwe silaso. Siyambonga kakhulu uJehova ngoba uyasithethelela. Sesinjengezigqili ezikhululiweyo ngoba ‘sakhululwa esonweni.’ (Rom. 6:​17, 18; Isam. 1:5) Nxa sesikwazi ukuthi uJehova uyasithethelela, siyathokoza kakhulu njengesigqili esikhululiweyo. UJehova wasihlawulela ngeNdodana yakhe ukuze sisiliswe esonweni. (1 Phet. 2:24) Nxa singawona, siyabe siphambanisa ubungane bethu loJehova, kodwa inhlawulo yenza sibuyisane laye siphinde sibe ngabangane bakhe. Nxa umuntu olomkhuhlane omubi angasila, uyathokoza. Lathi siyathokoza kakhulu nxa uJehova angasithethelela siphinde sibe ngabangane bakhe. w25.02 11 ¶16; 13 ¶17

Emzekelisweni wamathalenta uJesu wakhuluma ngenceku ezimbili ezazithembekile enkosini yazo, leyodwa eyayingathembekanga. (Mat. 25:​14-30) Inceku ezimbili ezithembekileyo zimela amaKhristu agcotshiweyo athembekileyo. INkosi yawo uJesu iwanxusa ukuthi ‘athokoze layo’ njalo athola umvuzo wawo wokuyaphila ezulwini. Umvuzo lo awuthola ngokuvuswa okubizwa ngokuthi yikuvuswa kwabafileyo kwakuqala. (Mat. 25:​21, 23; Isam. 20:5b) Kodwa lokho inceku eyayilivilavoxo eyakwenzayo kuyisixwayiso kumaKhristu agcotshiweyo. Njani? Kumele batshengise ukuthi bakhuthele. Emzekelisweni wamathalenta lasemzekelisweni wentombi ezilitshumi, uJesu wayengatsho ukuthi abagcotshiweyo bazakuba ngamavila. Wayechasisa lokho okwakungenzakala nxa babengahlalela izandla. Babengacina besehluleka ukwenza ukuthi ‘ukubizwa kwabo lokukhethwa kwabo kuqiniseke’ futhi babengasoze bavunyelwe ukungena eMbusweni wamazulu. w24.09 22 ¶10; 23 ¶12-13

Sonke siyayifuna imali ukuze sizinakekele futhi sondle izimuli zethu. (Umtshu. 7:12; 1 Thim. 5:8) Izikhathi ezinengi nxa sicabanga ngomsebenzi esizawukhetha siyakhangela ukuthi sizabe sihola malini. Kodwa nxa umuntu ekhangela lokho kuphela uyabe ehamba ngokubona. Nxa sihamba ngokholo sizakhangela lokuthi umsebenzi wakhona uzasivumela yini ukuthi siqhubeke simkhonza kuhle uJehova. Yikho ungazibuza ukuthi: ‘Umsebenzi lo awusoze ungenzise izinto ezizondwa nguJehova yini?’ (Zaga. 6:​16-19) ‘Kawusoze ungiphambanise yini ekukhonzeni kumbe wenze ukuthi ngiqede isikhathi eside ngikhatshana lemuli yami?’ Nxa uphendule imibuzo le ngo-yebo, kungaba ngcono ukuthi ungawuthathi umsebenzi lo lanxa imisebenzi itholakala nzima. Nxa sihamba ngokholo sizakwenza izinqumo ezitshengisa ukuthi asithandabuzi ukuthi uJehova uzasinakekela.—Mat. 6:33; Heb. 13:5. w25.03 21 ¶5-6

Kumele sihlale sizama ukubona abafowethu labodadewethu ngendlela uJehova ababona ngayo. Lokhu singakwenza ngokuhlala sikhangela okuhle abakwenzayo kulokuthi sikhangele amaphutha abo ngoba esikhathini esizayo bayabe bengasawenzi. Singenelisa ukulungisisa loba yikuphi ukungazwanani okungaba khona phakathi kwethu. Nxa singenza njalo, abantu abafuna ukuphathwa ngendlela le elothando bazafisa ukubuya epharadayisi esikulo. Kwangathi singahlala sikubona kuligugu kakhulu ukuba sepharadayisi leli esilenzelwe nguJehova. Loba ngubani ofuna ukuvuselelwa, ukusuthiseka, lokuhlaliseka kanye lokuvikeleka kumele abuye epharadayisi esikulo futhi angaqali ukuphuma kulo. Kodwa kumele ananzelele ngoba uSathane uzama ngamandla wonke ukusihuga ukuthi siphume kulo. (1 Phet. 5:8; Isam. 12:9) Akumelanga sivume ukuthi asinqobe. Asisebenzeni gadalala ukuthi sivikele ipharadayisi esikulo ukuze lihlale lilihle, limsulwa futhi lilokuthula. w24.04 24-25 ¶18-19

Bazali lingafundisa abantwabenu ukuthi batshisekele ukukhonza uJehova. Fundisani abantwabenu ngamazwi langezenzo ukuthi izinto ezinjengokutaditsha iBhayibhili, ukuya emihlanganweni yebandla kanye lokuya ekutshumayeleni ziqakatheke ukwedlula zonke izinto empilweni. Lokhu kuzabanceda bangaboni angathi ukuba nguFakazi kaJehova yikungena nje isonto yangekhaya bacine bengasaqakathekisi ukukhonza kumbe batshiye uJehova. Nxa umuntu engatshiya ukukhonza uJehova sekusitsho ukuthi asechithekile kawasabutheki yini? Hatshi, ngenxa yokuthi angaphenduka aqalise ukumkhonza. Okungamnceda ukuthi enze njalo yikuzithoba lokuvuma ukuncediswa ngabadala. (Jak. 5:14) Lanxa kungaba nzima, nxa ungenza konke okusemandleni akho uzaphinda ube ngumngane kaJehova! w24.07 24-25 ¶18-19

Kuyini elingakwenza ukuze lihlale limsulwa ngesikhathi lithandana? Nxa liqhubeka lithandana, imizwa yenu iyabe ilokhu ikhula. Manje kuyini okungalinceda ukuthi lihlale limsulwa? Lingaxoxi ngezemacansini, lingabi lodwa endaweni engelabantu futhi nxa linatha lingadlulisi amalawulo. (Efe. 5:3) Izinto lezi zingavusa imizwa yenu futhi zenze kube nzima ukuthi lihlale limsulwa. Kungalinceda ukuthi lihlale lixoxa ngokuthi lingazivikela njani ukuze lingacini seliziphatha kubi. (Zaga. 22:3) Nxa isikhathi silokhu sihamba lingakhetha ukuthi yiziphi izenzo zokutshengisana uthando elingazenza. Kodwa kumele lenze izinto ezizalitshiya limsulwa. Phela nxa lingenza izinto lifuqwa yimizwa kungaba nzima ukuthi lenze isinqumo esihle. (Ingoma. 1:2; 2:6) Kulula ukuthi nxa abantu betshengisana uthando behluleke ukuzibamba bacine sebeziphatha kubi. (Zaga. 6:27) Ngakho nxa liqalisa ukuthandana, xoxani ngezimiso zeBhayibhili ezingalinceda libone lokho elingakwenza lalokho okungamelanga likwenze.—1 Thes. 4:​3-7. w24.05 29 ¶10-11

Sifuna abanye bangathandabuzi ukuthi singabancedisa, ikakhulu ezikhathini ezinzima. (Zaga. 17:17) Manje singenzani ukuze basithembe? Singenza konke okusemandleni ethu ukuthi silingisele uJehova nsuku zonke, ngokwesibonelo ngokugcina izithembiso zethu langokubamba isikhathi. Abadala abathenjwayo bayalinceda kakhulu ibandla. Balinceda njani? Nxa abamemezeli bekwazi ukuthi bangathintana labadala loba nini, ngokwesibonelo umbonisi weqembu lenkonzo yasensimini, kuyabanceda ukuthi bangakhathazeki kakhulu nxa bangaba lohlupho. Nxa bangabakwazi ukuthi abadala bazimisele ukubancedisa, abasoze bathandabuze ukuthi bayabathanda. Abazalwane bazabathemba abadala nxa bebanika iseluleko esivela eBhayibhilini lasemabhukwini enceku ethembekileyo, hatshi esivela emibonweni yabo. Abafowethu labodadewethu bayamthemba umdala ogcina imfihlo futhi oyenza lokho ayabe ethembise ukukwenza. w24.06 30 ¶14-15

Khathesi asikhangelelanga ukuthi uJehova asuse zonke inhlupho zethu kodwa siyakwazi ukuthi uzahlala esiqinisa. (Hubo. 41:3) UJehova usebenzisa umoya wakhe ongcwele ukuthi asiqinise, asinike ukuhlakanipha njalo asincede singakhathazeki kakhulu. (Zaga. 18:14; Flp. 4:13) Usenza sihlaliseke ngoba usithembisa ukuthi esikhathini esizayo yonke imikhuhlane izabe ingasekho. (Isaya. 33:24) EBhayibhilini kulamazwi angasiduduza futhi asenza sihlaliseke nxa sisebunzimeni. (Rom. 15:4) Omunye udadewethu ohlala eWest Africa wabanjwa i-cancer futhi lokhu kwakusenza ukuthi ahlale ekhala. Uthi: ‘Umbhalo ongiduduza kakhulu ngu-Isaya 26:3. Ivesi le yenza ngingathandabuzi ukuthi uJehova angangenza ngihlaliseke futhi ngingakhathazeki kakhulu nxa ngisebunzimeni.’ Ikhona yini ivesi ekududuzayo nxa usebunzimeni kumbe usuphelelwa lithemba? w24.12 24 ¶17-18

Abadala bayazama ukuthi kube yibo abaqalayo ukuncedisa abantu asebephambukile. Bafuna ukuthi izimvu lezi ezilahlekileyo ziphenduke ekhaya. (Luk. 15:​22-24, 32) Nxa isoni siphenduka kuba lentokozo ezulwini futhi lalapha emhlabeni siyathokoza. (Luk. 15:7) Kuyacaca ukuthi uJehova kabemukeli abantu abenza okubi bengaphenduki. Lanxa kunjalo kabakhalali, uyazama ukubancedisa ngoba ufuna baphenduke. UHosiya 14:4 uyasivezela ukuthi uJehova uzwa njani nxa izoni ziphenduka. Uthi: “Ngizabelapha, ukungathembeki kwabo kuphele. Ngizabathanda ngenhliziyo yami yonke, ngoba angisabazondelanga.” Nxa ungumdala kumele ukuthi amazwi la akwenza usukumele phezulu nxa ubona okuyinhlansi okuncane nje okutshengisa ukuthi umuntu useqalisa ukuphenduka. Kanti njalo nxa watshiya uJehova kumele ukuthi amazwi la ayakukhumbuza ukuthi uphenduke kuye ngoba uyakuthanda futhi ufuna uphenduke kuye. w24.08 28 ¶8-9

Kwezinye izikhathi abanye abantu abasibongi ngalokho esiyabe sibenzele khona. Singanika abantu isikhathi sethu kumbe sisebenzise amandla ethu lezinye izinto esingabe silazo ukuthi sibancedise. Kodwa kwezinye izikhathi singasala singakwazi ukuthi bakuthandile yini esibenzele khona. Nxa lokho kungenzakala, kuyini okungasinceda ukuthi singadani? Khumbula ukuthi okwenza sithokoze nxa sisipha ayisikho ukuthi abantu bayasibonga kumbe hatshi. (Imiseb. 20:35) Singahlala sithokoza nxa sisipha abanye lanxa kungakhanya angathi abasibongi. Njani? Hlala ukhumbula ukuthi nxa usipha abanye uyabe ulingisela uJehova. UJehova unika abantu izinto ezinhle kungelani lokuthi bayambonga kumbe kabambongi. (Mat. 5:​43-48) UJehova usithembisa ukuthi nxa lathi singapha abanye ‘singakhangelelanga ukuthola lutho, umvuzo wethu uzakuba mkhulu.’ (Luk. 6:35) Ngakho ungadani nxa ungenzela omunye umuntu into ethile abeseyekela ukubonga. Kungelani lokuthi abantu bayasibonga kumbe kabasibongi, uJehova kasoze ayekele ukusinika umvuzo ngoba siyabe senzele abanye okuhle futhi singabantu ‘abapha bethokoza.’—Zaga. 19:17; 2 Khor. 9:7. w24.09 29 ¶14-16