Kwabase-Efesu 5:1-33
5 Ngakho lingiselani uNkulunkulu+ njengoba lingabantwabakhe abathandayo.
2 Qhubekani liphila impilo yothando*+ njengoba nje uKhristu laye wasithanda*+ wazinikela ngenxa yethu* ukuze abe ngumhlatshelo lomnikelo oluqhatshi olumnandi kuNkulunkulu.+
3 Lingaqali ukuxoxa ngobufebe* langayo yonke imihlobo yokungcola loba ubuhwaba+ ngoba lokhu akubafanelanga abantu abangcwele.+
4 Akumelanga kube lokuziphatha okulihlazo, lenkulumo yobuthutha kanye lobuphoxo obulenhlamba,+ okuyizinto ezingafanelanga, kodwa kufanele kube lokubonga.+
5 Liyakwazi futhi liyakunanzelela ukuthi umuntu ofebayo*+ kumbe ongcolileyo loba oyisihwaba,+ okutsho ukuthi okhonza izithombe, kalalo ilifa eMbusweni kaKhristu loNkulunkulu.+
6 Akungabi lomuntu oliqila ngamazwi angatsho lutho ngoba ulaka lukaNkulunkulu luzakwehlela ebantwini abangalaleliyo ngenxa yezinto ezinjalo.
7 Ngakho lingabi lobudlelwano labo
8 ngoba kuqala lalisemnyameni kodwa khathesi selisekukhanyeni+ ngenxa yokuthi selingabeNkosi.+ Qhubekani lihamba njengabantwana bokukhanya
9 ngoba izithelo zokukhanya zigoqela ukwenza konke okuhle lokulunga leqiniso.+
10 Qhubekani lihlolisisa ukuthi kuyini okwamukelekayo+ eNkosini,
11 futhi yekelani ukwenza imisebenzi yobumnyama engancediyo+ kodwa liyiveze egcekeni ukuthi injani.
12 Phela kuyayangisa lokukhuluma ngezinto abazenza ensitha.
13 Ukukhanya kwenza zonke izinto zivele egcekeni ngoba yonke into esekukhanyeni iyakhanya.
14 Yikho kuthiwa: “Vuka wena oleleyo, vuka kwabafileyo.+ Ungenza njalo uKhristu uzakukhanyisela.”+
15 Nanzelelani lingenzi* njengabantu abangahlakaniphanga kodwa yenzani njengabahlakaniphileyo,
16 lisisebenzise kuhle isikhathi senu*+ ngoba insuku zimbi.
17 Yekelani ukuba yizithutha kodwa qhubekani liqedisisa lokho okuyintando kaJehova.*+
18 Kanti njalo akumelanga lidakwe liwayini+ elenza abantu baziphathe butshapha,* kodwa qhubekani ligcwaliswa ngomoya.
19 Qinisanani ngamahubo langezingoma zokudumisa uNkulunkulu, langezingoma zokukhonza, lihlabele+ lidumisa uJehova*+ ngezingoma+ ezinhliziyweni zenu.
20 Hlalani libonga+ uNkulunkulu uBaba wethu ngenxa yakho konke asenzela khona, limbonge ngebizo leNkosi yethu uJesu Khristu.+
21 Zehliseni omunye komunye+ ngenxa yokwesaba uKhristu.
22 Amakhosikazi kawazehlise kubomkawo+ ngendlela azehlisa ngayo eNkosini
23 ngoba indoda iyinhloko yomkayo+ njengoba nje loKhristu eyinhloko yebandla,+ futhi yena ungumsindisi walowomzimba.
24 Njengoba ibandla lizehlisa kuKhristu, amakhosikazi lawo kumele azehlise kubomkawo kukho konke.
25 Madoda qhubekani lithanda omkenu+ njengoKhristu owathanda ibandla waze wazinikela ngenxa yalo+
26 ukuze alenze* libe ngcwele, elihlambulula ngokuligezisa ngamanzi esebenzisa ilizwi,+
27 esenzela ukuthi alethule phambi kwakhe liyibukhazikhazi futhi lingatshwabhananga, lingelatshatha kumbe okunye okubi+ kodwa lingcwele njalo lingelasici.+
28 Amadoda lawo kumele enze njalo. Kumele athande omkawo ngendlela athanda ngayo imizimba yawo. Indoda ethanda umkayo iyazithanda yona
29 ngoba akulamuntu owake wazonda umzimba wakhe,* kodwa uyawunika ukudla futhi awuphathe kuhle njengoba nje loKhristu eliphatha njalo ibandla,
30 ngoba thina siyizitho zomzimba wakhe.+
31 “Ngenxa yalokho indoda izatshiya uyise lonina inamathele kumkayo* futhi bobabili bazakuba nyamanye.”+
32 Imfihlo le engcwele+ iqakatheke kakhulu. Khathesi ngikhuluma ngoKhristu langebandla.+
33 Lanxa kunjalo, kumele ngamunye wenu athande inkosikazi yakhe+ ngendlela azithanda ngayo, lenkosikazi kumele imhloniphe kakhulu umkayo.+
Amabala angaphansi
^ NgesiGrikhi, “lihamba ethandweni.”
^ Ezinye inguqulo zithi, “walithanda.”
^ Ezinye inguqulo zithi, “yenu.”
^ NgesiGrikhi, por·nei′a. Khangela iNgcazelo Yamabala.
^ Khangela iNgcazelo Yamabala ebaleni elithi, “Ubufebe.”
^ NgesiGrikhi, “lingahambi.”
^ Kumbe, “lithenge isikhathi.”
^ Khangela iSengezo ku-A5.
^ Kumbe, “bangakhuzeki.”
^ Khangela iSengezo ku-A5.
^ Lapha kutshiwo ibandla.
^ NgesiGrikhi, “inyama yakhe.”
^ Kumbe, “ihlale lomkayo.”
