IHubo 119:1-176
-
Uyaliqakathekisa ilizwi likaNkulunkulu eliligugu
-
‘Abatsha bangenzani ukuze baphile impilo ehlanzekileyo?’ (9)
-
“Ngiyazithanda izikhumbuzo zakho” (24)
-
“Ngiwuthanda okwamagama umthetho wakho!” (97)
-
‘Ngilokuqedisisa kulabangifundisayo’ (99)
-
“Ilizwi lakho liyisibane enyaweni zami” (105)
-
‘Ilizwi lakho liliqiniso’ (160)
-
Abathanda umthetho kaNkulunkulu balokuthula (165)
-
א [Aleph]
119 Bayathokoza abangasolekiyo* kukho konke abakwenzayo,Abalandela umthetho kaJehova.+
2 Bayathokoza abalalela izikhumbuzo zakhe,+Abamdinga ngenhliziyo yonke.+
3 Kabenzi lutho olubi,Njalo bahamba ezindleleni zakhe.+
4 Wena usitshele ukuthiSigcine imithetho yakho ngonanzelelo.+
5 Aluba nje bengingahlala ngithembekile*+Ukuze ngilalele imilayo yakho!
6 Lapho-ke bengingasoze ngiyangeke+Nxa sengihlolisisa yonke imilayo yakho.
7 Ngizakudumisa ngenhliziyo eqothoNxa ngifunda izahlulelo zakho ezilungileyo.
8 Ngizayilalela imilayo yakho.
Ngicela ungangitshiyi kokuphela.
ב [Beth]
9 Ijaha lingenzani ukuze liphile impilo ehlanzekileyo?
Kumele lizigcine ngokulalela ilizwi lakho.+
10 Ngikudinga ngenhliziyo yonke.
Ungangiyekeli ngiphambuka emilayweni yakho.+
11 Ngiyawaqakathekisa amazwi akho enhliziyweni yami+Ukuze ngingakoneli.+
12 Kwangathi ungadunyiswa Jehova,Ngifundisa imilayo yakho.
13 Zonke izahlulelo ozikhulumileyoNgiyazimemezela ngomlomo wami.
14 Izikhumbuzo zakho zingithokozisa+Ukwedlula loba yini eligugu.+
15 Ngizacabangisisa ngemithetho* yakho,+Ngihlolisise izindlela zakho.+
16 Ngiyazithanda izimiso zakho.
Angisoze ngilikhohlwe ilizwi lakho.+
ג [Gimel]
17 Phatha kuhle inceku yakho,Ukuze ngiphile njalo ngilandele ilizwi lakho.+
18 Vula amehlo ami ukuze ngizibone kuhleIzinto ezimangalisayo ezisemthethweni wakho.
19 Ngiyisihambi elizweni.+
Ungangifihleli imilayo yakho.
20 Zikhathi zonke ngihlala ngifisa kakhuluUkwazi izahlulelo zakho.
21 Uyabakhuza abaziphakamisayo,Abaqalekisiweyo abaphambuka emilayweni yakho.+
22 Ungabavumeli ukuthi bangenze inhlekisa lokuthi bangeyise,Ngoba ngiyazilalela izikhumbuzo zakho.
23 Lalapho ababusi behlangana ukuze bakhulume kubi ngami,Inceku yakho iyacabangisisa ngemilayo* yakho.
24 Ngiyazithanda izikhumbuzo zakho,+Ziyangicebisa.+
ד [Daleth]
25 Ngilele ngacambalala emhlabathini.+
Ngigcina ngiphila njengoba wathembisa.+
26 Ngakutshela izindlela zami, wena wangiphendula.
Ngifundisa imilayo yakho.+
27 Ngenza ngizwisise imithetho yakhoUkuze ngicabangisise ngemisebenzi* yakho emangalisayo.+
28 Angisalali ngenxa yosizi.
Ngiqinisa njengoba wangithembisa.
29 Susa ubuqili kimi,+Ube lomusa kimi ungifundise umthetho wakho.
30 Sengikhethe ukuthembeka kuwe.+
Ngiyabona ukuthi izahlulelo zakho zilungile.
31 Nginamathele ezikhumbuzweni zakho.+
Awu Jehova, ungangiyekeli ngidane.*+
32 Ngizayitshisekela imilayo* yakho,Ngoba wenze ukuthi ithole indawo enhliziyweni yami.*
ה [He]
33 Ngifundisa imilayo yakho awu Jehova,+Ngizayilandela kuze kube sekucineni.+
34 Ngenza ngizwisiseUkuze ngilandele umthetho wakho,Ngiwugcine ngenhliziyo yami yonke.
35 Ngikhokhela ukuze ngilandele imilayo yakho+Ngoba ngiyayithanda.
36 Yenza inhliziyo yami ithande izikhumbuzo zakho,Kulokuthi ilandele ekufunayo.*+
37 Susa amehlo ami ezintweni ezingelancedo.+
Yenza ukuthi ngihambe endleleni yakho ukuze ngiqhubeke ngiphila.
38 Gcwalisa isithembiso osenze encekwini yakho,Ukuze wesatshwe.*
39 Susa ihlazo engilesabayo,Ngoba izahlulelo zakho zinhle.+
40 Khangela ubone ukuthi ngiyifisa kangakanani imilayo yakho.
Ngigcina ngiphila ngoba wena ulungile.
ה [Waw]
41 Awu Jehova, kwangathi ngingaluzwa uthando lwakho oluqotho,+Ungisindise njengoba wathembisa,+
42 Lapho-ke ngizamphendula ongichothozayoNgoba ngiyakuthemba okutshoyo.
43 Ungalisusi emlonyeni wami ilizwi leqinisoNgoba ngiyayithemba indlela owahlulela ngayo.
44 Ngizahlala ngiwugcina umthetho wakho,Kuze kube nini lanini.+
45 Ngizahambahamba endaweni evikelekileyo*+Ngoba ngiyayidinga imithetho yakho.
46 Ngizakhuluma ngezikhumbuzo zakho phambi kwamakhosi,Angisoze ngibe lenhloni.+
47 Ngiyayithanda imilayo yakho,Ngiyayithanda sibili.+
48 Ngizaphakamisela izandla zami emilayweni yakho engiyithandayo,+Ngizacabangisisa ngemithetho* yakho.+
ז [Zayin]
49 Khumbula ilizwi owalitshela* inceku yakho,Ilizwi onginika ngalo ithemba.
50 Liyangiduduza nxa ngisebuhlungwini+Ngoba amazwi akho angigcina ngiphila.
51 Abaziphakamisayo bayangichothoza,Kodwa angisoze ngiphambuke emthethweni wakho.+
52 Ngiyazikhumbula izahlulelo zakho zakudala+ awu Jehova,Ziyangiduduza.+
53 Ngifuthelene ngenxa yabantu ababi,Abatshiya umthetho wakho.+
54 Ngihlala ngihlabela imilayo yakhoLoba ngaphi engihlala khona.*
55 Ebusuku ngiyalikhumbula ibizo lakho awu Jehova,+Ukuze ngigcine umthetho wakho.
56 Lokhu bengihlala ngikwenza,Ngoba ngiyayilalela imithetho yakho.
ח [Heth]
57 Jehova uyisabelo sami.+
Ngithembisile ukugcina amazwi akho.+
58 Ngiyakuncenga ngenhliziyo yami yonke,+Woba lomusa kimi+ njengoba wathembisa.
59 Ngizihlolile indlela zamiUkuze ngiphenduke ngilandele izikhumbuzo zakho.+
60 Angiphuzi ukulalela imilayo yakho,+Ngiyaphangisa ukuyilandela.
61 Intambo zababi ziyangithandela,Kodwa umthetho wakho angiwukhohlwa.+
62 Ngiyavuka phakathi kwamabili ngikubonge+Ngoba izahlulelo zakho zilungile.
63 Ngingumngane wabo bonke abakwesabayo,Lalabo abagcina imithetho yakho.+
64 Uthando lwakho oluqotho lugcwele umhlaba wonke Jehova,+Ngifundisa imilayo yakho.
ט [Teth]
65 Uyiphathe kuhle inceku yakhoNjengoba nje wathembisa, awu Jehova.
66 Nginika ukuqedisisa lolwazi,+Ngoba ngithembe imilayo yakho.
67 Ngingakabi sebunzimeni, ngangijayele ukuphambuka,*Kodwa khathesi sengiwalalela amazwi akho.+
68 Umuhle+ futhi lemisebenzi yakho mihle.
Ngifundisa imilayo yakho.+
69 Abazigqajayo bakhuluma amanga ngami,Kodwa mina ngilalela imithetho yakho ngenhliziyo yonke.
70 Inhliziyo zabo zomile,+Kodwa mina ngiyawuthanda umthetho wakho.+
71 Ukwehlelwa zinhlupho kungincedile,+Ngoba kungenze ngafunda imilayo yakho.
72 Umthetho owukhulumileyo muhle kimi+
Ukwedlula isiliva legolide elinengi.+
י [Yod]
73 Izandla zakho zangenza futhi zangibumba.
Ngipha ukuzwisisa
Ukuze ngifunde imilayo yakho.+
74 Abakwesabayo bayangibona bathokozeNgoba ngithembele elizwini* lakho.+
75 Awu Jehova, ngiyazi ukuthi izahlulelo zakho zilungile,+Ungijezisile ngenxa yokuthi uthembekile.+
76 Kwangathi uthando lwakho oluqotho+ lungangiduduza,Njengoba nje wayithembisa inceku yakho.
77 Woba lesihawu kimi ukuze ngiqhubeke ngiphila,+Ngoba ngiyawuthanda umthetho wakho.+
78 Kwangathi abaziphakamisayo bangayangiswa,Ngoba bangiphatha kubi ngingenzanga lutho.*
Kodwa mina ngizacabangisisa ngemithetho* yakho.+
79 Kwangathi abakwesabayo bangaphenduka kimi,Labo abazaziyo izikhumbuzo zakho.
80 Kwangathi ngingalandela imilayo yakho+ ngenhliziyo emsulwa
Ukuze ngingayangiswa.+
כ [Kaph]
81 Ngiyilindele ngabomvu insindiso yakho+Ngoba ngithembele elizwini* lakho.
82 Ngilindele ukuthi isithembiso sakho sigcwaliseke,+Ngapha ngisithi: “Uzangiduduza nini?”+
83 Nginjengesigubhu sesikhumba esilenga endaweni elentuthu,Kodwa angiyikhohlwa imilayo yakho.+
84 Inceku yakho kumele ilinde okwensuku ezingaki?
Uzabajezisa nini abangihlukuluzayo?+
85 Abaziphakamisayo bangigebhela amagodi bengithiya,Labo abangawulaleliyo umthetho wakho.
86 Ngiyayithemba yonke imilayo yakho.
Abantu bayangihlukuluza ngingonanga lutho, ngicela ungincede!+
87 Baphose bangitshabalalisa emhlabeni,Kodwa angizange ngiyitshiye imithetho yakho.
88 Ngigcina ngiphila ngenxa yothando lwakho oluqotho,Ukuze ngilalele izikhumbuzo zakho ozikhulumileyo.
ל [Lamed]
89 Ilizwi lakho lizahlala emazulwini+Kuze kube nini lanini, awu Jehova.
90 Uzahlala uthembekile kuzo zonke izizukulwane.+
Umhlaba uwumise waqina ukuze uhlale ukhona.+
91 Konke okwenzileyo* kuqhubeke kukhona kwaze kwaba lamuhla ngenxa yezahlulelo zakho,Ngoba konke kuyizinceku zakho.
92 Aluba ngangingawuthandi umthetho wakho,Ngangizatshabalala ngesikhathi ngisebunzimeni.+
93 Angisoze ngiyikhohlwe imithetho yakho,Ngoba ngayo ungigcine ngiphila.+
94 Ngisindisa ngoba ngingowakho,+Phela ngiyidingile imithetho yakho.+
95 Ababi balindele ukungibulala,Kodwa ngiyacabangisisa ngezikhumbuzo zakho.
96 Ngibonile ukuthi konke okupheleleyo kulalapho okucina khona,Kodwa imilayo yakho yona ayilamingcele.*
מ [Mem]
97 Ngiwuthanda okwamagama umthetho wakho!+
Ngicabangisisa ngawo* ilanga lonke.+
98 Umlayo wakho wenza ngihlakaniphe ukwedlula izitha zami,+Ngoba wona uzangikhokhela kuze kube phakade.
99 Ngilokuqedisisa ukwedlula bonke abangifundisayo+Ngoba ngiyacabangisisa ngezikhumbuzo* zakho.
100 Engikwenzayo kutshengisa ukuthi ngiyazwisisa kulamadoda amadala,Ngoba ngiyayilalela imithetho yakho.
101 Kangivumi ukuhamba kuloba yiphi indlela embi,+Ukuze ngilalele ilizwi lakho.
102 Angiphambuki ezahlulelweni zakhoNgoba wena ungifundisile.
103 Amazwi akho amnandi kakhulu elimini lwami,Amnandi kuloluju!+
104 Imithetho yakho yenza ngibe lokuzwisisa.+
Yikho ngizizonda zonke indlela zamanga.+
נ [Nun]
105 Ilizwi lakho liyisibane enyaweni zami,Likhanyisa indlela yami.+
106 Ngenze isifungo sokuthi ngizalandela izahlulelo zakho ezilungileyo,Njalo ngizasigcwalisa.
107 Ngihlupheke kakhulu.+
Awu Jehova, ngigcina ngiphila njengoba wathembisa.+
108 Awu Jehova, yamukela iminikelo yami yokuzithandela eyokukudumisa,+Ungifundise izahlulelo zakho.+
109 Impilo yami ihlala isengozini,Kodwa angiwukhohlwanga umthetho wakho.+
110 Ababi bangifakele umjibila,Kodwa angiphambukanga emithethweni yakho.+
111 Izikhumbuzo zakho zizahlala zingezamiNgoba ziyayithokozisa inhliziyo yami.+
112 Sengizimisele ukulalela imilayo yakho zikhathi zonke,Kuze kube sekucineni.
ס [Samekh]
113 Ngiyabazonda abalenhliziyo examalazileyo,*+Kodwa ngiyawuthanda umthetho wakho.+
114 Ulihawu lami lendawo yami yokucatsha,+Ngoba ngithembele elizwini* lakho.+
115 Lingasondeli eduze kwami lina elenza okubi,+Ukuze ngilalele imilayo kaNkulunkulu wami.
116 Ngisekela njengoba wathembisa,+Ukuze ngiqhubeke ngiphila.
Ungavumeli ukuthi ithemba lami litshabalale ngisale ngidanile.+
117 Ngisekela ukuze ngisindiswe,+Lapho-ke ngizahlala ngicabanga ngemilayo yakho.+
118 Uyabalahla bonke abaphambuka emilayweni yakho+Ngoba ngabaqambimanga futhi bangamaqili.
119 Ubalahla njengezibi bonke abenza okubi emhlabeni.+
Yikho ngizithanda izikhumbuzo zakho.
120 Ngikwesaba ngize ngiqhuqhe,Ngiyazesaba izahlulelo zakho.
ע [Ayin]
121 Ngikwenzile okufaneleyo lokulungileyo.
Unganginikeli ezandleni zabangicindezelayo!
122 Thembisa inceku yakho ukuthi uzayisiza.
Ngicela ukuthi abaziphakamisayo bangangicindezeli.
123 Amehlo ami asefiphele ngilokhu ngilindele insindiso yakho,+Lesithembiso sakho esilungileyo.+
124 Woba lothando oluqotho encekwini yakho,+Ungifundise imilayo yakho.+
125 Ngiyinceku yakho, ngipha ukuzwisisa+Ukuze ngizazi izikhumbuzo zakho.
126 Sekuyisikhathi sokuthi wenze okufunayo awu Jehova,+Ngoba bephule umthetho wakho.
127 Lokhu kwenza ngiyithande imilayo yakhoUkwedlula igolide, igolide elihlambulukileyo.*+
128 Konke ongifundisa khona ngikubona kuqondile.+
Ngiyazizonda zonke indlela zamanga.+
פ [Pe]
129 Izikhumbuzo zakho ziyamangalisa,Yikho ngizilalela.
130 Ukuchasiswa kwamazwi akho kuletha ukukhanya,+Kwenza ongelalwazi azwisise.+
131 Ngikomele ukuzwa imilayo yakho,+Sengize ngisehluleka lokuphefumula.
132 Phendukela kimi ungenzele umusa+Ngoba yiyo indlela obaphatha ngayo abathanda ibizo lakho.+
133 Qondisa indlela yami* ngelizwi lakho,Akungabi lalutho olubi olungibusayo.+
134 Ngilamulela* ebantwini abangicindezelayo,Mina ngizayilalela imithetho yakho.
135 Woba lomusa encekwini yakho,+Uyifundise imilayo yakho.
136 Inyembezi ziyajuluka ezihlathini zamiNgoba abantu abawugcini umthetho wakho.+
צ [Tsade]
137 Ulungile awu Jehova,+Lezahlulelo zakho ziqondile.+
138 Izikhumbuzo osinika zona zilungile,Singazithemba ngokupheleleyo.
139 Intshiseko yami injengomlilo ovuthayo ngaphakathi kwami,+Ngoba izitha zami ziwakhohliwe amazwi akho.
140 Amazwi akho ahlambulukile,+Inceku yakho iyawathanda.+
141 Ngingumuntukazana njalo ngidelelekile,+Lanxa kunjalo angiyikhohlwanga imithetho yakho.
142 Ukulunga kwakho kuzahlala kuze kube nini lanini,+Umthetho wakho uliqiniso.+
143 Lanxa ngisehlelwa zinhlupho lobunzima,Ngiqhubeka ngiyithanda imilayo yakho.
144 Izikhumbuzo zakho zizahlala zilungile kuze kube phakade,Ngenza ngizwisise+ ukuze ngiqhubeke ngiphila.
ק [Qoph]
145 Ngiyakuncenga ngenhliziyo yami yonke. Ngiphendula awu Jehova,Ngizayilalela imilayo yakho.
146 Ngiyakubiza, ngisindisa!
Ngizazilalela izikhumbuzo zakho.
147 Ngivuke emadabukakusa ngakhala kuwe ngicela uncedo,+Ngoba ngithembele emazwini* akho.
148 Ngiyavuka phakathi kobusuku,*Ngicabangisise ngamazwi* akho.+
149 Lalela engikutshoyo ngoba ulothando oluqotho.+
Awu Jehova, ngigcina ngiphila ngoba wahlulela kuhle.
150 Abenza izinto ezenyanyekayo basondela kimi,Abawulaleli umthetho wakho.
151 Wena useduze kwami Jehova,+Yonke imilayo yakho iliqiniso.+
152 Ngafunda ngezikhumbuzo zakho kudala,Owamisa ukuthi zihlale kuze kube nini lanini.+
ר [Resh]
153 Khangela ukuhlupheka kwami ungikhulule+Ngoba angiwukhohlwanga umthetho wakho.
154 Ngivikela* ungikhulule,+Ungigcine ngiphila njengoba wathembisa.
155 Insindiso ikhatshana lababiNgoba abazange bayidinge imilayo yakho.+
156 Isihawu sakho sikhulu awu Jehova.+
Ngigcina ngiphila ngoba wahlulela kuhle.
157 Banengi abangihlukuluzayo labayizitha zami,+Kodwa angizange ngizitshiye izikhumbuzo zakho.
158 Ngiyabenyanya abangamaqiliNgoba abawalaleli amazwi akho.+
159 Khangela ukuthi ngiyithanda kangakanani imithetho yakho!
Awu Jehova, ngigcina ngiphila ngoba ulothando oluqotho.+
160 Ilizwi lakho lonke liliqiniso,+Zonke izahlulelo zakho ezilungileyo zizahlala kuze kube phakade.
ש [Sin] kumbe [Shin]
161 Ababusi bangihlukuluza+ ngingonanga lutho,Kodwa ngiyawahlonipha kakhulu amazwi akho.+
162 Ngiyathokoza ngamazwi akho,+Njengomuntu othokoziswa yimpahla enengi ayithumbileyo.
163 Amanga ngiyawazonda njalo ngiyawenyanya,+Kodwa umthetho wakho ngiyawuthanda.+
164 Ngikudumisa kasikhombisa ngelanga,Ngenxa yokuthi izahlulelo zakho zilungile.
165 Abathanda umthetho wakho balokuthula okukhulu,+Akulalutho olungabenza bakhubeke.
166 Ngilindele insindiso yakho Jehova,Ngiyayilalela imilayo yakho.
167 Ngiyazilalela izikhumbuzo zakho,Ngizithanda okwamagama.+
168 Ngiyayigcina imithetho yakho lezikhumbuzo zakhoNgoba wena uyakubona konke engikwenzayo.+
ת [Taw]
169 Kwangathi ungakuzwa ukukhalela kwami uncedo, awu Jehova.+
Ngenza ngizwisise njengoba wathembisa.+
170 Kwangathi ungangilalela nxa ngicela ukuthi ube lomusa kimi.
Ngisindisa njengoba wathembisa.
171 Kwangathi umlomo wami ungahlala ukudumisa,+Ngoba ungifundisa imilayo yakho.
172 Kwangathi ulimi lwami lungahlabela amazwi akho+Ngoba yonke imilayo yakho ilungile.
173 Kwangathi isandla sakho singahlala silungele ukunginceda+Ngoba ngikhetha ukulalela imithetho yakho.+
174 Ngilindele insindiso yakho Jehova,Ngiyawuthanda umthetho wakho.+
175 Ngicela ukuqhubeka ngiphila ukuze ngikudumise,+Kwangathi izahlulelo zakho zingangisiza.
176 Ngihlanhlathile njengemvu elahlekileyo.+
Idinge inceku yakho ngoba angiyikhohlwanga imilayo yakho.+
Amabala angaphansi
^ Kumbe, “abaqotho.”
^ NgesiHebheru, “Aluba nje izindlela zami bezingahlala ziqondile.”
^ Kumbe, “Ngizayihlolisisa imithetho.”
^ Kumbe, “iyayihlolisisa imilayo.”
^ Kumbe, “ngihlolisise imisebenzi.”
^ Kumbe, “ngiyangiswe.”
^ NgesiHebheru, “Ngizagijima endleleni yemilayo.”
^ Ezinye inguqulo zithi, “ukuthi ngibe lesibindi.”
^ Kumbe, “ifune inzuzo.”
^ Ezinye inguqulo zithi, “Esingesalabo abakwesabayo.”
^ Kumbe, “enkulu.”
^ Kumbe, “Ngizahlolisisa imithetho.”
^ Kumbe, “lokho owakuthembisa.”
^ Kumbe, “engike ngahlala khona ngiyisihambi.”
^ Kumbe, “ngangisona ngingazi.”
^ Kumbe, “ngilindela ilizwi.”
^ Ezinye inguqulo zithi, “ngokungiqambela amanga.”
^ Kumbe, “ngizayihlolisisa imithetho.”
^ Kumbe, “ngilindela ilizwi.”
^ Lapha kutshiwo konke akudalileyo.
^ NgesiHebheru, “ibanzi.”
^ Kumbe, “Ngiyawuhlolisisa.”
^ Kumbe, “ngiyazihlolisisa izikhumbuzo.”
^ Kumbe, “eyehlukene phakathi.”
^ Kumbe, “ngilindela ilizwi.”
^ Kumbe, “elicengekileyo.”
^ Kumbe, “Qinisa izinyathelo zami.”
^ NgesiHebheru, “Ngihlenga.”
^ Kumbe, “ngilindela amazwi.”
^ NgesiHebheru, “kwemilindo yobusuku.”
^ Kumbe, “Ngihlolisise amazwi.”
^ Kumbe, “Phatha indaba yami.”
