IBhayibhili lisitshela ngabanye abantu ababelungile kodwa batshintsha, baqalisa ukwenza izinto ezimbi. Omunye wabo kwakuyiNkosi uSolomoni njalo uJehova wayembusise kakhulu. Wayemazi uJehova futhi wayekwazi lokuthi kumele amkhonze njani. Kodwa ngokuhamba kwesikhathi watshintsha waqalisa ukukhonza onkulunkulu bamanga. Izono zakhe zamzondisa kakhulu uJehova njalo isizwe sako-Israyeli sahlupheka okweminyaka eminengi ngenxa yalokho ayekwenzile. IMibhalo ithi uSolomoni “wafa wangcwatshwa edolobheni likaDavida uyise” lapho okwangcwatshelwa khona amanye amadoda ayethembekile. (1 Amakho. 11:​5-9, 43; 2 Amakho. 23:13) Lokho sekusitsho ukuthi uJehova uzamvusa yini? IBhayibhili alitsho lutho ngalokho. Ukuvuswa kwabafileyo kuyisipho esisiphiwa nguNkulunkulu wethu olothando. Isipho lesi usinika labo afuna bathole ithuba lokumkhonza kuze kube nini lanini. (Jobe. 14:​13, 14; Joh. 6:44) INkosi uSolomoni izasiphiwa yini isipho lesi? Asikwazi, nguJehova kuphela okwaziyo. Esikwaziyo yikuthi uJehova uzakwenza okulungileyo. w24.05 4 ¶9

UJehova uyasamukela etendeni lakhe nxa singazinikela kuye. Etendeni lakhe sithola konke okusinceda ukuthi siqinise ukholo lwethu futhi siba ngabangane babanye abaphakathi kwalo. Kodwa itende likaJehova alikho endaweni eyodwa. Litholakala loba ngaphi okulezinceku zakhe ezithembekileyo. (Isam. 21:3) Abantu abafa bethembekile bona ke? Singathi balokhu bekhona yini etendeni likaJehova? Ye singatsho njalo! Ngenxa yani? Ngenxa yokuthi uJehova ulokhu ebakhumbula futhi kuye kufana lokuthi basaphila. UJesu wathi: “UMosi laye wakuveza endabeni yesihlahla sameva ukuthi abafileyo bazavuswa. Wabiza uJehova ngokuthi ‘nguNkulunkulu ka-Abrahama loNkulunkulu ka-Isaka loNkulunkulu kaJakhobe.’ UnguNkulunkulu wabaphilayo hatshi owabafileyo ngoba kuye bonke bayaphila.”—Luk. 20:​37, 38. w24.06 3 ¶6-7

UZadokhi wahamba eHebroni ehlomile, elungele ukulwa. (1 Imilan. 12:38) Wayezimisele ukuya empini loDavida lokuvikela isizwe sako-Israyeli. Lanxa uZadokhi wayengabe engakujayelanga ukuya empini, wayelesibindi. Pho uZadokhi wasithatha ngaphi isibindi njengoba yena wayengumphristi nje? Kulamadoda amanengi ayewazi ayelamandla futhi elesibindi. Yikho akuthandabuzwa ukuthi wafunda okunengi kuwo. Ngokwesibonelo, uDavida wayelesibindi ‘sokukhokhela abako-Israyeli nxa besiya empini’ futhi lokho kwenza ukuthi bonke bamsekele ngenhliziyo yonke. (1 Imilan. 11:​1, 2) Zonke izikhathi nxa uDavida wayehlaselwa yizitha zakhe, wayethembela kuJehova ukuthi amncedise. (Hubo. 138:3) UJehoyada lendodana yakhe eyayiliqhawe uBhenaya kanye lezinye izinduna zezizwana ezingu-22 ezazisekela uDavida ngamanye amadoda ayelesibindi uZadokhi ayengawalingisela.—1 Imilan. 11:​22-25; 12:​26-28. w24.07 3 ¶5-6

USawuli waseThasu wabahlukuluza kabuhlungu abalandeli bakaKhristu. Kumele ukuthi amaKhristu amanengi ayecabanga ukuthi ngeke wafa waphenduka. Kodwa uJesu wayengacabangi njengabo, wayekwazi ukuthi uSawuli angaphenduka atshintshe. Yena loYise babebona okuhle kuSawuli. UJesu wathi: “Indoda le iyisitsha sami engisikhethileyo.” (Imiseb. 9:15) UJesu wenza isimangaliso ukuze ancedise uSawuli ukuthi aphenduke. (Imiseb. 7:58–8:3; 9:​1-9, 17-20) USawuli owacina esesaziwa ngokuthi ngumphostoli uPhawuli wathi esebe ngumKhristu wayibonga kanengi iNkosi ukuthi yayibe lesihawu kuye. (1 Thim. 1:​12-15) UPhawuli wenzani ngesikhathi esizwa ukuthi ebandleni leKhorinte kwasekulomuntu oxhwalileyo kodwa olokhu engenziwa lutho? Akwenzayo kutshengisa indlela uNkulunkulu wethu olothando asilaya ngayo. Kuphinda kusitshengise ukuthi kuqakathekile ukuba lesihawu. w24.08 13 ¶15-16

Njengoba iminyaka yayiqhubeka ihamba, kancane kancane uJehova wayekwenza kucace okungenziwa ngabantu ukuze babe ngabangane bakhe. Indodana yesibili ka-Adamu lo-Eva okwakuthiwa ngu-Abela yiyo eyaba ngeyokuqala ukutshengisa ukuthi yayilokholo kuJehova ngemva kokuhlamuka e-Edeni. U-Abela wayemthanda uJehova futhi efuna ukumthokozisa lokusondela kuye, yikho wenza umhlatshelo. Njengoba wayengumelusi wathatha amanye amazinyane ezimvu zakhe wawahlaba wasewanikela kuJehova. UJehova wathini ngokwenziwa ngu-Abela? “Wamamukela u-Abela, wemukela lomnikelo wakhe.” (Gen. 4:4) Labanye abantu ababemthanda uJehova futhi bemthemba benza imihlatshelo futhi uJehova wayamukela. Omunye wabo kwakunguNowa. (Gen. 8:​20, 21) Nxa uJehova wayeyamukela imihlatshelo yabo wayetshengisa ukuthi abantu abalesono bangasondela kuye futhi abamukele. w24.08 3 ¶5-6

Nxa singaphathwa kubi siyezwa ubuhlungu futhi sikhathazeke kakhulu. (Umtshu. 7:7) Lezinye izinceku zikaJehova njengoJobe loHabakhukhi zazike ziphathwe kubi futhi lokho kwakuzizwisa ubuhlungu kakhulu. (Jobe. 6:​2, 3; Hab. 1:​1-3) Nxa uphathwa kubi, woba leqiniso lokuthi awenzi into ongacina usuzisola ngayo njalo wengezelele inhlupho phezu kwezinye inhlupho. Nxa umuntu engasiphambanisa besesibona izinto ziqhubeka zimhambela kuhle, singazibuza ukuthi kuyanceda yini ukwenza okulungileyo. Eyinye inceku kaJehova yayibona angathi abantu abenza okubi bayazikholisela, kodwa abenza okulungileyo bathwele nzima. Yathi: “Banjalo abantu abenza okubi, abahlala bethola izinto lula.” (Hubo. 73:12) Kwakuyikhathaza kakhulu okwakusenziwa ngabantu ababi yaze yacina izibuza ukuthi kunceda ngani ukukhonza uJehova. Yathi: “Ngathi ngizama ukukuzwisisa konke lokhu, kwangihlupha kakhulu.”—Hubo. 73:​14, 16. w24.11 3 ¶5-7

Siyamkhazimulisa uJehova ngoba siyamhlonipha kakhulu. Kunengi okwenza simhloniphe. UnguSomandla, angenza loba yini ayifunayo njalo kadinwa. (Hubo. 96:​4-7) Inhlakanipho yakhe emangalisayo iyakhanya ezintweni azenzileyo. Nguye owasidalayo futhi usinika konke esikudingayo ukuze siqhubeke siphila. (Isam. 4:11) Uqotho. (Isam. 15:4) Kehlulwa lutho futhi konke akuthembisayo uyakwenza. (Josh. 23:14) Yikho umphrofethi uJeremiya wababaza ngoJehova wathi: “Phakathi kwabo bonke abahlakaniphileyo ezizweni lasemibusweni yonke, kakho loyedwa onjengawe.” (Jer. 10:​6, 7) Siyabona sibili ukuthi kunengi okwenza simhloniphe uBaba wethu osezulwini. UJehova kasimhloniphi nje kuphela, siyamthanda futhi yikho simkhazimulisa. w25.01 3 ¶5-6

Izitha zikaNkulunkulu zizama ngamandla ukuthi izinto ezinhle ezenziwa yinhlanganiso zikhanye angathi zimbi. Ngokwesibonelo, iBhayibhili lisifundisa ukuthi uJehova ukhangelele ukuthi labo abamkhonzayo bahlanzeke, baziphathe kuhle futhi bamkhonze ngendlela ayifunayo. Lithi loba ngubani oqhubeka esenza izinto ezimbi futhi engaphenduki kumele asuswe ebandleni. (1 Khor. 5:​11, 12; 6:​9, 10) Izitha zethu zithi asibathandi abantu nxa silalela umlayo lo ovela eBhayibhilini. Zithi sibahlulela kubi futhi sifuna baphile ngendlela thina esiyifunayo. Kumele sizwisise ukuthi ngubani sibili ohlasela inhlanganiso. USathane uDeveli nguye omemethekisa izindaba ezingamanga ngenhlanganiso. IBhayibhili lithi ‘unguyise wamanga.’ (Joh. 8:44; Gen. 3:​1-5) Ngakho asimangali nxa esebenzisa izitha zethu ukuthi amemethekise amanga ngenhlanganiso kaJehova. w24.04 10-11 ¶13-14

Ngesikhathi ukuhlupheka okukhulu sekuqalisa kungenzakala ukuthi kube labanye abazathi bebona ukubhujiswa ‘kweBhabhiloni Enkulu’ bakhumbule ukuthi oFakazi bakaJehova babeke bakhuluma ngokuthi lokho kwakuzakwenzakala. Kungenzakala yini ukuthi abanye babo batshintshe besebekholwa kuJehova? (Isam. 17:5) Nxa lokho kungenzakala, kuyabe kuhambelana lalokho okwenzakala eGibhithe ngesikhathi sikaMosi. Khumbula ukuthi ‘ixuku labantu abatshiyeneyo’ lahamba labako-Israyeli ngesikhathi bephuma eGibhithe. Kungenzakala ukuthi abanye babo baqalisa ukukholwa kuJehova ngesikhathi bebona okwakukhulunywe nguMosi mayelana lenhlupho ezilitshumi kugcwaliseka. (Eks. 12:38) Nxa kungenzakala into enjengaleyo ngemva kokubhujiswa kweBhabhiloni Enkulu kungasidanisa yini ukuthi abanye abantu babambana lathi i-Amagedoni isizaqalisa nje? Ngeke kusidanise. Sifuna ukulingisela uBaba wethu osezulwini, “uNkulunkulu olozwelo lesihawu, ophuza ukuthukuthela, ogcwele uthando oluqotho kanye leqiniso.”—Eks. 34:6. w24.05 11 ¶12-13

Kungenzakalani nxa singayekela ukubambelela “esisekelweni samazwi aqondileyo”? Ake sixoxe ngokwake kwenzakala ngesikhathi sabaphostoli. Amanye amaKhristu ayememethekisa ihungahunga lokuthi usuku lukaJehova lwaselufikile. Kungenzakala ukuthi kwakulencwadi okwakuthiwa yayibhalwe ngumphostoli uPhawuli eyayibatshela ngendaba leyo. Amanye amaKhristu ebandla leThesalonika akukholwa lokho engazange azinike isikhathi sokuhlolisisa ukuthi kwakuliqiniso yini futhi lawo ahle aqalisa ukukumemethekisa. Aluba ayezikhumbula izinto uPhawuli ayewafundise zona eseselawo ayengasoze athatheke ngamanga lawo. (2 Thes. 2:​1-5) UPhawuli wawatshela ukuthi kwakungamelanga akholwe loba yini ayizwayo. Yikho ukuze awancede angadukiswa esikhathini esizayo umphostoli uPhawuli waphetha incwadi yesibili ayibhalela amaKhristu eThesalonika ngamazwi athi: “Mina Phawuli ngiyalibingelela ngibhala ngesami isandla. Lokhu kuluphawu encwadini zami zonke njalo le yiyo indlela engibhala ngayo.”—2 Thes. 3:17. w24.07 12 ¶13-14

AmaKhristu angamaHebheru kwakumele afunde ukuqinisela ukuze aqhubeke ekhonza uJehova ngenxa yokuthi ayesazohlupheka. Amanye ayeseke ahlukuluzwa kakhulu kodwa amanengi amukela iqiniso ngesikhathi kulokuthula. Umphostoli uPhawuli wathi lanxa amaKhristu la ayeqinisele ebunzimeni obutshiyeneyo, ayengakahlupheki kwaze kwaba sekufeni njengalokho okwenzakala kuJesu. (Heb. 12:4) AmaJuda azonda abila ngesikhathi amaJuda amanengi esiba ngamaKhristu futhi aqalisa ukuwahlukuluza. Eminyakeni emilutshwana eyayisanda kwedlula, amaJuda adlula 40 “enza isifungo sokuthi nxa angadla loba anathe engakambulali uPhawuli ayabe eqalekisiwe.” (Imiseb. 22:22; 23:​12-14) Lanxa amaKhristu la ayezondwa futhi ehlukuluzwa, kwakumele aqhubeke ehlangana ndawonye, etshumayela indaba ezinhle futhi eqinisa ukholo lwawo. w24.09 12 ¶15

UJesu Khristu wayemthanda kakhulu umphostoli wakhe uJohane. (Mat. 10:2) UJohane wayejayele ukuhamba loJesu nxa wayetshumayela. Wabona lezimangaliso zakhe njalo kazange amtshiye ngezikhathi ezinzima. Wayekhona ngesikhathi uJesu ebulawa futhi wambona esevusiwe. Kanti njalo wabona indlela ibandla lamaKhristu elakhula ngayo. Wabona izindaba ezinhle ‘zitshunyayelwa kukho konke okudaliweyo okungaphansi kwezulu.’ (Kol. 1:23) UJohane wathi esezakufa, wathola isibusiso sokubhala amanye amabhuku aba seLizwini likaNkulunkulu eliphefumulelweyo. Wabhala “isambulo esethulwa nguJesu Khristu” esivusa usinga. (Isam. 1:1) Wabhala leVangeli elibizwa ngebizo lakhe, lezinye izincwadi ezintathu. Incwadi yakhe yesithathu wayibhalela omunye umKhristu owayethembekile okwakuthiwa nguGayu ayemthatha njengomntanakhe. (3 Joh. 1) Lokho okwabhalwa yindoda le eyayisigugile kodwa ithembekile kwabakhuthaza kakhulu abalandeli bakaJesu futhi lathi kuyasinceda lamuhla. w24.11 12 ¶15-16

Indoda emthandayo umkayo iyamqakathekisa kakhulu. Imbona eyisipho esiligugu esivela kuJehova. (Zaga. 18:22; 31:10) Ngakho imphatha kuhle futhi iyamhlonipha. Lokhu kugoqela langesikhathi besiya emacansini. Indoda enjalo kayimbambi ngamandla umkayo ukuthi baye emacansini ngendlela ezamtshiya engakhululekanga, eyangekile kumbe umzwangedwa wakhe ungasahlanzekanga. Layo indoda kumele yenze konke okusemandleni ayo ukuthi ihlale ilomzwangedwa ohlanzekileyo phambi kukaJehova. (Imiseb. 24:16) Madoda, uJehova uyathokoza kakhulu nxa elibona liphatha omkenu kuhle futhi libahlonipha. Ngakho zimisele ukungenzi loba yini engazwisa umkakho ubuhlungu kodwa woba lomusa, umhloniphe futhi umthande. Ungenza njalo umkakho uzabona ukuthi uyamthanda njalo uyamqakathekisa. Nxa ungamqakathekisa umkakho awusoze uphambanise ubungane bakho loJehova, uzahlala ungumngane wakhe omkhulu.—Hubo. 25:14. w25.01 13 ¶17-18

Abantu bakaJehova bakukhuthalele ukutshumayeza abanye. Lokhu kwenza batshiyane kakhulu labanye abazithi bangamaKhristu. Kuyini okungasinceda ukuthi sihlale sikutshisekela ukutshumayela? Okunye okungasinceda ukuthi sikukhuthalele ukutshumayela yikulingisela uJesu. Kazange akuvilaphele ukutshumayela kodwa wayelokhu engezelela indlela ayetshiseka ngayo. UJesu wayefanana lomuntu owayelesihlahla somkhiwa ensimini yakhe yamagilebisi owasihlakulela wasihlakulela okweminyaka emithathu kodwa kwehlula ukuthi sizale. UJesu laye watshumayeza amaJuda okweminyaka engaba mithathu kodwa abanengi abazange bamlalele. Njengoba umuntu owayelesihlahla somkhiwa engazange asikhalale masinya isihlahla leso, uJesu laye kazange abakhalale abantu kumbe aqalise ukudonda ukutshumayela. (Luk. 13:​6-9) Okuzasinceda ukuthi lathi sitshiseke yikukhangela lokho akwenzayo lokudinga izifundo kulokho ayekufundisa. w25.03 14-15 ¶1-4

Kumele wenzeni nxa ungabona umuntu ocabanga ukuthi lingafanelana? Kumele uhle uzibike kuye yini? IBhayibhili lithi umuntu ohlakaniphileyo uqala adinge ulwazi engakenzi isinqumo. Nxa ungazinika isikhathi sokuhlola umuntu ungakamtsheli ukuthi uyamthanda uyabe utshengisa ukuthi uhlakaniphile. Ungamhlola njani umuntu ofuna ukuthandana laye? Emihlanganweni yebandla lakweminye nje imibuthano ungakhangela ukuthi umuntu ofisa ukuthandana laye umthanda kangakanani uJehova, uziphatha njani kanye lokuthi ungumuntu onjani. Dinga ukuthi ngobani abangane bakhe lokuthi kuyini athanda ukuxoxa ngakho. (Luk. 6:45) Afisa ukukwenza empilweni kuyahambelana yini lalokho wena ofuna ukukwenza? Okunye ongakwenza yikukhuluma labadala bebandla angena kulo kumbe lamanye amaKhristu aqinileyo ekukhonzeni amazi kuhle. (Zaga. 20:18) Ungabuza ukuthi ulobuntu obunjani lokuthi abanye bambona njani. (Ruthe. 2:11) Ngesikhathi umhlola qiniseka ukuthi awenzi loba yini engenza angahlaliseki. Lokhu kutsho ukuthi ungahlali usumlandelela njalo ungadingisisi yonke into emayelana laye. w24.05 22 ¶7-8

Abadala abagijimeli ukucabanga ukuthi umuntu owenze isono kasoze aphenduke. Abanye bangahle baphenduke behlangana lekhomithi yabadala okokuqala nje kodwa abanye kungabathatha isikhathi eside. Yikho abadala bangahlela ukuthi baxoxe lomuntu owonileyo izikhathi ezinengana. Mhlawumbe bangathi sebexoxe laye okokuqala asale ecabangisisa ngalokho abadala abamtshele khona. Angazithoba athandaze kuJehova ecela ukuthi amthethelele. (Hubo. 38:18) Lokhu kungenza ukuthi nxa abadala sebephinda ukuxoxa laye, abesetshintshile njalo esezwisisa. Nxa abadala bencedisa umuntu oyenze isono ukuthi aphenduke, bayazama ukumzwisisa futhi babe lomusa. Bayathandaza kuJehova becela ukuthi abusise lokho abazakwenza njalo babe lethemba lokuthi umuntu abamncedisayo uzacabangisisa ngalokho akwenzileyo aphenduke.—2 Thim. 2:​25,26. w24.08 22-23 ¶12-13

UJehova kafuni ukuthi loba ngubani abhujiswe. Ufuna izoni zibuyele kuye. (2 Khor. 5:20) Yikho kusukela kudala uJehova wayebancenga kanenginengi abantu bakhe ababephambuka ukuthi baphenduke njalo babuyele kuye. Abadala balesibusiso sokusebenza loJehova ukuthi bancedise abantu abenza izono ukuthi baphenduke. (Rom. 2:4; 1 Khor. 3:9) Ezulwini kuba lentokozo enkulu kakhulu nxa izoni ziphenduka. Sonke isikhathi nxa imvu ebilahlekile ingabuyela ebandleni, uBaba wethu osezulwini uJehova, uyathokoza kakhulu. Nxa singahlala sicabangisisa ngokuthi uJehova ulozwelo lesihawu lomusa omkhulu sizamthanda kakhulu.—Luk. 1:78. w24.08 31 ¶16-17

Aluba uJesu wavuma ukuthi abantu bamenze inkosi, wayezabe esengena kwezombusazwe zamaJuda ayengaphansi kombuso wamaRoma. Yikho ‘wasuka waya entabeni eyedwa.’ Lanxa abantu babefuna ukumbamba ngamandla ukuthi angene kwezombusazwe kazange avume. Lesi yisifundo esiqakathekileyo kithi. Izikhathi ezinengi abantu ngeke basicele ukuthi senze isimangaliso esinjengalesi esenziwa nguJesu kumbe ukuthi sisilise abagulayo ngendlela eyisimanga, loba ukuthi sibe ngamakhosi. Kodwa bangafuna ukuthi singene kwezombusazwe ngokuvota kumbe ukusekela omunye umuntu ababona angani angaletha utshintsho. UJesu wakwenza kwacaca ukuthi kafuni ukungena kwezombusazwe. Ngokuhamba kwesikhathi wathi: “UMbuso wami awusiwo walumhlaba.” (Joh. 17:14; 18:36) Lathi lamuhla kumele silingisele lokho okwakusenziwa nguJesu njalo sicabange ngendlela ayecabanga ngayo. Sisekela uMbuso kaNkulunkulu, sitshele abanye ngawo njalo siyawuthandazela.—Mat. 6:10. w24.12 4 ¶5-6

Nxa ubala zama ukukhangela ukuthi ungakusebenzisa njani lokho okufundayo. Ngokwesibonelo nxa ungafunda ngokuthi uJehova wahlulela kuhle, zama ukumlingisela ngokuphatha kuhle bonke abantu. Nxa ungafunda ngendlela uJesu ayethanda ngayo uYise kanye labantu ungamlingisela ngokuzimisela ukulwela ibizo likaJehova lanxa kunzima. Okunye ongakwenza yikuzama ngazo zonke indlela ukuthi uncedise abafowenu labodadewenu. Kanti njalo lingisela uJesu ngokutshumayeza abanye ukuze labo bafunde ngenhlawulo, isipho esihle kulazo zonke esisiphiwe nguJehova. Nxa singaqhubeka sifunda okunengi ngenhlawulo sizamthanda kakhulu uJehova leNdodana yakhe. Kanti njalo labo bazaqhubeka besithanda. (Jak. 4:8) Ngakho kasiqhubekeni sikusebenzisa konke uJehova asinika khona okusinceda ukuthi sifunde ngenhlawulo. w25.01 25 ¶16-17

Amazwi asembhalweni walamuhla angahunyutshwa langokuthi: “Izono zami zonke usuzisusile phambi kwakho.” Umzekeliso lo utshengisa ukuthi uJehova uthatha izono zabantu abaphendukayo aziphosele khatshana lapho angasoze aphinde azibuyelele khona. Umutsho lo ungahunyutshwa langokuthi: “Wenze angathi kangizange ngike [ngone].” IBhayibhili liyawugcizelela umcijo lo komunye umzekeliso obhalwe kuMikha 7:​18, 19. Amavesi la athi uJehova uphosela izono zethu enzikini yolwandle. Kudala kwakungelandlela yokuthi into ephoselwe enzikini yolwandle iphinde itholakale. Imizekeliso le isifundisa ukuthi nxa uJehova angasithethelela akusamelanga sitshone sizithonisisa ngoba uyabe esezisusile izono zethu. Aliqiniso sibili amazwi kaDavida athi: “Bayathokoza abaxolelwe izenzo zabo zokwephula umthetho kanye lalabo abazono zabo zithethelelwe.” (Rom. 4:7) Lokhu yikho ukuthethelela sibili! w25.02 9 ¶7-8

Lamuhla emhlabeni kulepharadayisi elilabantu abanengi abenza okuhle. Abantu abakulo bahlalisane ngokuthula futhi bazimisele ukungaphumi kulo. Bafisa lokuthi abantu abanengi labo babuye bazongena epharadayisi leli. Kuyamangalisa ukuthi uJehova wenze kwaba labantu abalokuthula futhi abamanyeneyo emhlabeni lo obuswa nguSathane oyingozi futhi ogcwele abantu abazondanayo labenza okubi. (1 Joh. 5:19; Isam. 12:12) UNkulunkulu wethu olothando uyabona ukuthi umhlaba lo uyingozi kangakanani yikho esenza ukuthi abantu bakhe bavikeleke ukuze baqhubeke bemkhonza bethokoza. ILizwi likaNkulunkulu lithi ipharadayisi esikulo “liyindawo yokuphephela” futhi ‘linjengengadi ethelelwa kuhle.’ (Isaya. 4:6; 58:11) Labo abasepharadayisi leli bayathokoza futhi bavikelekile ensukwini lezi zokucina ngoba uJehova uyababusisa.—Isaya. 54:14; 2 Thim. 3:1. w24.04 20 ¶1-2

Nxa ukufisa ukutshada, akuthandabuzwa ukuthi usuke wathandaza ngendaba le. UJehova kathembisi ukukunika umuntu ongatshada laye, kodwa ulendaba lalokho okufunayo kanye lendlela ozizwa ngayo. Angakuncedisa ngesikhathi usadinga umuntu ongatshada laye. Ngakho qhubeka umtshela indlela ozizwa ngayo lalokho okufisayo. (Hubo. 62:8) Thandaza ucele uJehova ukuthi akuncedise ube lokuhlakanipha futhi ubekezele. (Jak. 1:5) Lanxa kungathatha isikhathi eside ukuthi uthole umuntu ongatshada laye, uJehova uthembisa ukuthi uzaqhubeka ekunakekela, ekuthanda futhi ekuncedisa ukuthi uhlale uthokoza. (Hubo. 55:22) Nanzelela ukuthi ukudinga umuntu wokutshada laye awukwenzi kube yinto oyiqakathekisa kakhulu empilweni yakho. (Flp. 1:10) Ukuba ngumngane kaJehova yikho okuzakwenza uthokoze hatshi ukuthi utshadile kumbe kawutshadanga. (Mat. 5:3) Kanti njalo nxa ungatshadanga kungaba lula ukuthi wenzele uJehova okunengi. (1 Khor. 7:​32, 33) Ngakho sisebenzise kuhle isikhathi lesi. w24.05 21 ¶4; 22 ¶6

Abantu kumele bathandane okwesikhathi esingakanani? Ukwenza izinqumo ujahile kungaba lempumela ebuhlungu. (Zaga. 21:5) Okunganceda yikuthi abantu bathandane okwesikhathi eseneleyo baze bazane kuhle. Kodwa akumelanga liqhubeke lithandana okwesikhathi eside kungelasidingo. IBhayibhili lithi: “Nxa okukhangelelwe ngumuntu kuphuza, inhliziyo iyagula.” (Zaga. 13:12) Kuyini esingakwenza nxa kulabantu abathandanayo esibaziyo? Singabanxusa ukuthi bazokudla lathi, sibanxuse lasekukhonzeni kwethu kwemuli kumbe ukuthi siyezilibazisa labo. (Rom. 12:13) Kungaba kuhle ukuthi sibancedise nxa befuna umuntu ongabaphelekezela, kumbe befuna ukuhanjiswa endaweni ethile loba befuna indawo abangahlala kuyo baxoxe. (Gal. 6:10) Nxa abantu abathandanayo bangakucela ukuthi ubaphelekezele, kubone njengendlela yokubasekela. Lanxa kungamelanga ubatshiye bebodwa, nanzelela lapho abadinga khona isikhathi sokuthi bakhulume ungekho eduze. w24.05 30 ¶13-14

Abadala bayazama ukudingisisa ukuthi kuyini okwenze umuntu wenza isono. Bangazibuza imibuzo elandelayo: Ulalapho akade esesilela khona yini ekukhonzeni, mhlawumbe engasataditshi loba engasatshumayeli? Ubelokhu esathandaza kuJehova zikhathi zonke yini njalo ethandaza ngenhliziyo yonke? Ubezama yini ukulwisana lezifiso ezimbi kumbe ubesezivumela? Ubezilibazisa ngani futhi abangane bakhe ngabantu abanjani? Lokhu abekwenza kuyitshintshe njani indlela abecabanga ngayo? Uyakunanzelela yini ukuthi akwenzileyo kumzwisa ubuhlungu uBaba wakhe osezulwini, uJehova? Abadala kumele babuze umuntu oyenze isono imibuzo ezamenza akhiphe okusenhliziyweni yakhe njalo acabangisise ngalokho akwenzileyo. Nxa besenza lokho kumele bananzelele bangabuzi izinto ezingelani labo. (Zaga. 20:5) Bangasebenzisa lemizekeliso ukuze bancede umuntu oyenze isono acabangisise ngalokho akwenzileyo. Mhlawumbe umuntu lo angazisola ngalokho ayabe ekwenzile, ahle aphenduke ngesikhathi abadala bexoxa laye okokuqala. w24.08 22 ¶9-11

UJesu wayekutshisekela ukutshumayela “izindaba ezinhle zoMbuso” ngoba wayekwazi ukuthi uNkulunkulu wayefuna enze umsebenzi lo. Wayeqakathekisa ukutshumayela ukwedlula loba yini. Langesikhathi esezaqeda inkonzo yakhe wayehamba “idolobho ngedolobho lesigaba ngesigaba” efundisa abantu. (Luk. 13:22) Kanti njalo wafundisa abafundi bakhe abanengi ukuthi labo benelise ukwenza umsebenzi wokutshumayela. (Luk. 10:1) Lalamuhla uJehova loJesu bafuna siwuqakathekise kakhulu umsebenzi wokutshumayela izindaba ezinhle. (Mat. 24:14; 28:​19, 20) Okunye okungasinceda ukuthi sikhuthale ekutshumayeleni yikubona abantu ngendlela uJehova ababona ngayo. Ufuna abantu abanengi bazizwe izindaba ezinhle futhi baqalise ukumkhonza. (1 Thim. 2:​3, 4) Lokhu yikho okwenza asifundise ukuthi siwenze njani umsebenzi lo onganceda abantu ukuthi bathole ukuphila. Lanxa abanye bengasoze basilalele khathesi, kungenzakala basilalele ukuhlupheka okukhulu kungakapheli. w25.03 15-16 ¶5-7

UmKhristu ngamunye usengazikhethela ukuthi angambingelela yini kumbe amamukele emhlanganweni webandla umuntu osusiweyo esebenzisa umzwangedwa wakhe oqeqetshwe liBhayibhili. Kodwa akumelanga sinabise ingxoxo lomuntu lowo kumbe sikwejise laye. Abanye bangabe bezibuza ukuthi, ‘Kanti iBhayibhili kalitsho yini ukuthi umKhristu obingelela umuntu onjalo uhlanganyela laye emisebenzini yakhe emibi?’ (2 Joh 9-11) Kodwa nxa sibala isahluko sonke lesi siyabona ukuthi lapha kukhulunywa ngabahlamuki kanye lalabo abayenga abanye ukuthi benze izinto ezimbi. (Isam. 2:20) Ngakho nxa umuntu ememethekisa imfundiso zabahlamuki kumbe eyenga abanye ukuthi benze okubi, abadala bayabe bengasoze bamvakatshele. Lanxa kunjalo siyabe silokhu sithemba ukuthi umuntu lowo angaphenduka. Kodwa nxa engakaphenduki asisoze simbingelele njalo ngeke simnxuse ukuthi abuye emhlanganweni webandla. w24.08 30-31 ¶14-15

UJesu wathi esenike abantu ukudla, wathi abaphostoli bakhe basuke lapho babuyele eKhaphenawume ngesikepe. Yena wasuka waya entabeni ebalekela abantu abasebefuna ukumenza inkosi. (Joh. 6:​16-20) Abaphostoli bathi besaphakathi kokugwedla, kwaqubuka isiphepho esasilolaka siphosa amagagasi esabekayo. Bathi besakhangelane lamagagasi, babona uJesu esiza kubo ehamba phezu kwamanzi, wasesithi umphostoli uPhetro ehle esikepeni abuye kuye ehamba phezu kwamanzi. (Mat. 14:​22-31) UJesu wathi esengene esikepeni isiphepho saphela. Abafundi basala bengelankani basebesithi kuye: “Wena uyiNdodana kaNkulunkulu sibili.” (Mat. 14:33) Kuyamangalisa ukuthi abafundi babengakuzwisisi ukuthi isimangaliso lesi uJesu ayesanda kusenza sihambelana njani lesokunika abantu ukudla. UMakho wathi: “[Abaphostoli] bamangala kakhulu, ngoba babengakazwisisi ukuthi isimangaliso sezinkwa sasibafundisani.” (Mak. 6:​50-52) Abazange bakuzwisise ukuthi uJehova wayenike uJesu amandla okwenza izimangaliso ezinengi, hatshi esokupha abantu ukudla kuphela. w24.12 5 ¶7

Indlela esingatshengisa ngayo ukuthi siyambonga uJehova ngothando lwakhe yikusebenzisa isikhathi lesi seSikhumbuzo ukuze utshengise ukuthi siyambonga ngesipho senhlawulo. Zimisele ukuba khona eSikhumbuzweni uphinde unxuse labanye. Bachasisele ozabanxusa ukuthi kuyabe kusenzakalani eSikhumbuzweni. Ungabatshengisa amavidiyo aku-jw.org njengale ethi Kungani UJesu Wafa? lethi Khumbula Ukufa KukaJesu. Abadala akumelanga bakhohlwe ukunxusa labo abangasafezi inkonzo. Cabanga ngentokozo eba khona ezulwini lasemhlabeni nxa ezinye izimvu zikaJehova ebezilahlekile ziphenduka emhlambini wakhe! (Luk. 15:​4-7) Ngelanga leSikhumbuzo akumelanga sikhohlwe ukubingelela labo abafika okokuqala lalabo asebelesikhathi bengabuyi emihlanganweni. Sifuna babone ukuthi sibamukela ngazo zombili.—Rom. 12:13. w25.01 29 ¶15

Inhlawulo itshengisa ukuthi uJehova uhlala esahlulela kuhle. Kodwa akupheleli khonapho, iphinda isincedise sizwisise ukuthi uJehova uyasithanda kakhulu. (Joh. 3:16; 1 Joh. 4:​9, 10) Inhlawulo itshengisa ukuthi uJehova ufuna sithole ukuphila okungapheliyo futhi siphinde sibe ngamalunga emuli yakhe. Cabanga ngalokhu: Ngemva kokona kuka-Adamu, uJehova wamsusa emulini yezikhonzi zakhe. Lokhu kwenza lathi sazalwa singekho emulini kaNkulunkulu. Lanxa kunjalo, uJehova uyasithethelela izono zethu ngenxa yokuthi uJesu wasifela njalo bonke abatshengisa ukuthi balokholo labamlalelayo bazakuba ngamalunga emuli yakhe esikhathini esizayo. Kodwa kulesisikhathi uJehova uyasithethelela izono zethu futhi lokhu kwenza sibe ngabangane bakhe labangane babafowethu labodadewethu. Kuyazicacela sibili ukuthi uJehova kasithontisi!—Rom. 5:​10, 11. w25.01 21 ¶6

Akulambuzo ukuthi inhlawulo iyisipho esiligugu kulazo zonke esasiphiwa nguNkulunkulu. (2 Khor. 9:15) Phela siyenelisa ukuba ngabangane bakaJehova uNkulunkulu ngenxa yokuthi uJesu wanikela ngokuphila kwakhe. Kanti njalo siyenelisa ukuphila kuze kube nini lanini ngenxa yenhlawulo. Kumele simbonge sibili uJehova ngoba uthando lwakhe yilo olwenza wasinika inhlawulo. (Rom. 5:8) UJesu wasungula iSikhumbuzo sokufa kwakhe esisenza minyaka yonke ukuze asincede sihlale sikhumbula ukuthi inhlawulo iqakathekile lokuthi sitshengise ukuthi siyabonga. (Luk. 22:​19, 20) Lonyaka iSikhumbuzo sizaba khona ngoLwesine mhlaka 2 April. Akuthandabuzwa ukuthi sonke sizenza okusemandleni ethu ukuthi sibe khona. Kuzasinceda kakhulu ukuthi nxa sekusele amaviki ukuthi iSikhumbuzo sifike lalapho sesidlulile, sizinike isikhathi sokucabangisisa ngalokho uJehova loJesu abasenzele khona. w25.01 20 ¶1-2

Nxa ungaqhubeka ucabangisisa ngothando lukaJehova uNkulunkulu loKhristu uJesu, ungafunda izinto ezinengi. Mhlawumbe ngesikhathi ulungiselela iSikhumbuzo salonyaka ungabala amaVangeli uzinika isikhathi sokuchwayisisa ngawo. Ungabaleli ukuqeda, kodwa wathathe kancane kancane udinge izinto ezinengi ezisitshengisa ukuthi uJehova loJesu bayasithanda. Nxa usuleminyaka eminengi ukhonza uJehova ungazibuza ukuthi kukhona yini okutsha ongakufunda ngokwahlulela okuhle kukaNkulunkulu, ngothando lwakhe langenhlawulo. Iqiniso yikuthi ukufunda akupheli, kunengi ongakufunda ngezinto lezi. Yikho hlala ubala izinto ezinengi ezisekelwe eBhayibhilini esizifunda emabhukwini ethu. w25.01 24-25 ¶13-15