IZaga 6:1-35
6 Ndodana yami, nxa unike umakhelwane wakho isibambiso+ azathatha ngaso isikwelede,Nxa uxhawule umuntu ongamaziyo+ wavumelana laye,
2 Nxa usuzithiye ngesithembiso sakho,Wabanjwa ngamazwi omlomo wakho,+
3 Ndodana yami, nxa usuwele esandleni sikamakhelwane wakho,Nanku okumele ukwenze ukuze uzikhulule:
Hamba uyezithoba kuye, umncenge masinyane umakhelwane wakho.+
4 Ungavumeli ukuthi amehlo akho alale,Njalo ungavumeli ukuthi amehlo akho awozele.
5 Zikhulule njengempala esandleni somzingeli,Lanjengenyoni esandleni somthiyi.
6 Vilandini,+ hamba uyekhangela ubunyonyo,Nanzelela izindlela zabo uhlakaniphe.
7 Lanxa bungelamkhokheli loba ufolomane loba umbusi,
8 Bulungisa ukudla kwabo ngesikhathi sehlobo,+Bubuthelele ukudla ngesikhathi sokuvuna.
9 We vilavoxo, kuzaze kube nini ulokhu uqethukile khonapho?
Uzavuka nini ebuthongweni bakho?
10 Nxa ungalala kancane, uwozele kancane nje,Ugoqe izandla okwesikhatshana nje ukuze uphumule,+
11 Ubuyanga buzakufikela njengesela,Lokudubeka kufike kuwe njengendoda ehlomileyo.+
12 Umuntu owenza okubi futhi ongancedi ngalutho uhamba ekhuluma amanga;+
13 Ufica ilihlo lakhe,+ adlalidlalise unyawo lwakhe njalo akhombele ngeminwe yakhe.
14 Ngokuxhwala okusenhliziyweni yakhe,Uhlala ebumba amacebo amabi+ njalo exabanisa+ abanye.
15 Ingozi izamjuma,Ngesikhatshana nje uzakwephulwa, angaphindi asile.+
16 Kulezinto eziyisithupha uJehova azizondayo;Ziyisikhombisa izinto azenyanyayo:
17 Amehlo atshengisa ukuziphakamisa,+ lolimi oluqamba amanga,+ lezandla ezichitha igazi labantu abangelacala,+
18 Inhliziyo ebumba amacebo amabi,+ lenyawo ezigijimela kokubi,
19 Ufakazi wamanga ohlala ehutshuza amanga,+Lomuntu obangela ukuthi abazalwane baxabane.+
20 Ndodana yami, landela imilayo kayihlo,Ungakulahli okufundiswa ngunyoko.*+
21 Bophela izinto lezi enhliziyweni yakho kokuphela,Uzibophele lasentanyeni yakho.
22 Nxa uhamba zizakukhokhela,Nxa ulala zizakulinda
Nxa usuvuka zizakhuluma lawe.*
23 Ngoba umlayo uyisibane,+Lomthetho uyikukhanya,+Njalo ukukhuzwa lokulaywa kuyindlela eya ekuphileni.+
24 Kuzakuvikela kowesifazana ongalunganga,+Laselimini oluhugayo lowesifazana ongaziphathanga.*+
25 Ungahawukeli ubuhle bakhe enhliziyweni yakho,+Ungavumi ukuthi akuthumbe ngamehlo akhe ahugayo,
26 Phela iwule lenza indoda isale isingumyanga,*+Kodwa umfazi wenye indoda yena uzingela impilo yomuntu uqobo.
27 Kambe umuntu angafaka* amalahle esifubeni sakhe izigqoko zakhe zisale zingatshanga+ yini?
28 Umuntu angahamba phezu kwamalahle atshisayo inyawo zakhe zingatshi yini?
29 Kunjalo langomuntu olala lomfazi kamakhelwane wakhe;Kakho othinta lowomfazi ongasoze ajeziswe.+
30 Abantu kabaleyisi iselaNxa litshontsha ngenxa yokuthi lilambile.
31 Kodwa nxa lingabanjwa lizabhadala okuphindwe kasikhombisa;Likhiphe konke elilakho endlini yalo.+
32 Loba ngubani olala lomfazi womuntu kalangqondo,Umuntu okwenzayo lokhu uzithezela olulenkume.+
33 Azakuthola ngamanxeba lokuyangeka+ kuphela,Ihlazo lakhe alisoze lisuswe.+
34 Ubukhwele benza indoda izonde idle amalahle;Ayisoze ibe lozwelo nxa isiphindisela.+
35 Ayisoze ivume ukuhlawulwaAyisoze ixole lanxa isipho singaze sibe sikhulu kangakanani.
Amabala angaphansi
^ Kumbe, “Ungawulahli umthetho kanyoko.”
^ Kumbe, “zizakufundisa.”
^ NgesiHebheru, “isale ilesinkwa esisodwa nje.”
^ Kumbe, “angokhela.”
