Ilezi 90:1-17
Olẹ Mosis, ohwo Ọghẹnẹ uzẹme na.+
90 O Jihova, whẹ họ oria nọ ma be rria*+ evaọ ige na kpobi.
2 Taure igbehru na e tẹ te ze,Hayo taure whọ tẹ te ma akpọ na avọ otọ na,*+No ebẹdẹ bẹdẹ rite ebẹdẹ bẹdẹ,* whẹ họ Ọghẹnẹ.+
3 Who ru ohwo-akpọ zihe kpohọ ẹkpẹ;*Whọ ta nọ: “Wha zihe, whai emọ ahwo.”+
4 Keme evaọ aro ra ikpe odu (1,000) e wọhọ odẹnukpo, nọ o tẹ vrẹ no,+Jẹ wọhọ amabọ jọ aso* na.
5 Who hwere i rai kufiẹ;+ a wọhọ owezẹ gheghe;Evaọ ohiohiẹ, a rẹ wọhọ ẹbe nọ ọ dhẹ ze.+
6 Evaọ ohiohiẹ, o rẹ jọ bọbọbọ jẹ wariẹ kpokpọ,Rekọ evaọ owọwọ u ve lo no jẹ ya fia.+
7 Keme ofu ra o kpe omai re no+Yọ ofu ọgaga ra ọ wha iguegue họ omai oma no.
8 Who fi iruthọ mai họ aro ra;*+Elo ovao ra ọ fere eware nọ ma ru dhere via no.+
9 Edẹ mai e be rọ ẹmẹrera re no* fiki ofu ra;Ikpe mai i bi kuhọ no wọhọ oviọlọ.*
10 Ikpe uzuazọ mai udhosa-gbikpe,Hayo udhone,+ otẹrọnọ oma ohwo na o rrọ gaga ziezi.*
Rekọ e vọ avọ ebẹbẹ gbe akọ-ọriọ;E rẹ nyavrẹ ovovẹrẹ, ma gbẹ jariẹ hẹ.+
11 Ono ọ rẹ sai wo otoriẹ ẹgba ofu ra?
Epanọ ofu ra ọ ga te, ere ozodhẹ nọ u fo nọ a re wo kẹ owhẹ o rẹ rro te.+
12 Wuhrẹ omai epanọ ma re kele edẹ mai+Re ma ruẹsi wo areghẹ evaọ udu mai.
13 Zihe ze, O Jihova!+ Ẹvẹ onana u ti kri te?+
Re ohrọ idibo ra.+
14 Dhesẹ uyoyou ra nọ o rẹ hiẹ hẹ+ kẹ omai ziezi evaọ ohiohiẹ,Re ma ruẹsi bo ubo oghọghọ je wo evawere+ evaọ edẹ uzuazọ mai kpobi.
15 Ru re edẹ oghọghọ mai i bu te edẹ nọ who ro gboja kẹ omai,+Re i bu te unu ikpe nọ ma rọ ruẹ uye no.+
16 Jọ idibo ra a ruẹ iruẹru ra,Jọ emọ rai a ruẹ orro ra.+
17 Jọ Jihova o dhesẹ aruoriwo riẹ kẹ omai;Jọ ọ ghale iruo abọ mai.*
Ẹhẹ, ghale iruo abọ mai.*+
Eme-Obotọ
^ Hayo o sae jọ nọ, “oria adhẹzọ mai.”
^ Hayo “Taure whọ tẹ te rehọ akpọ na avọ otọ na ze avọ iruo egaga wọhọ epaọ eva-eyẹ.”
^ Hayo “No ebẹdẹ rite ebẹdẹ.”
^ Hayo “ovu.”
^ Hayo “abọjọ irou aso.” Onana o sae jọ enwenọ euwa ene.
^ Hayo “Whọ riẹ iruthọ mai.”
^ Hayo “Uzuazọ mai o be rọ ẹmẹrera no omai oma no.”
^ Hayo “ẹwẹ-okuo.”
^ Hayo “ohwo o wo ogaga oghẹrẹsa.”
^ Hayo “Jọ ọ rehọ iruo abọ mai dikihẹ kothi.”
^ Hayo “rehọ iruo abọ mai dikihẹ kothi.”
