Ilezi 60:1-12
Ro se ọnọ o wuzou ile na; onọ a ruẹrẹ ekporo riẹ họ lele “Ododo Ekareghẹhọ Na.” Miktam.* Orọ Devidi. Rọkẹ ewuhrẹ. Okenọ o lele Eram-nahareyẹm avọ Eram-Zoba họre, nọ Joab o ro zihe, o je kpe ahwo Edọm idu ikpegbivẹ (12,000) evaọ Ukiekpotọ Uwhei na.+
60 O Ọghẹnẹ, whọ siọ omai no; whọ bẹre ruọ eva bru omai ze.+
Who je mu ofu kẹ omai; rekọ obọnana, rehọ omai zihe!
2 Who ru nọ otọakpọ na u ro nuhu; whọ bẹre riẹ rovie.
Ruẹrẹ eria riẹ nọ e va na, keme u bi kie.
3 Who ru akpọ bẹ ahwo ra.
Who ru omai da udi* nọ u bi ru omai kpo geli geli.+
4 Kẹ* ahwo nọ a be dhozọ ra okaNọ a sae rọ dhẹ jẹ kẹnoma kẹ uze na. (Silah)
5 Re ahwo nọ who you a sai no uye,*Yo kẹ omai, re whọ rọ obọze ra siwi omai.+
6 Ọghẹnẹ ọrẹri na ọ ta no,* inọ:
“Mẹ te ghọghọ, me ti siobọno Shẹkẹm re a rehọ iẹe reuku,+Yọ mẹ te ma Ukiekpotọ* Sọkọt fihọ akotọ.+
7 Giliad ọmẹ, wọhọ epanọ me wo Manasẹ na,+Yọ Ifremu họ etu-ọgaga* rọkẹ uzou mẹ;Juda họ ọkpọ osu mẹ.+
8 Moab họ odhe nọ mẹ rẹ rọ wozẹ abọ.+
Edọm me ti gbolo eviẹ mẹ fihọ.+
Me ti bo ubo oghọghọ fikinọ mẹ kparobọ vi Filistia no.”+
9 Ono ọ te rehọ omẹ kpohọ okpẹwho nọ a ko họ* na?
Ono o ti su omẹ te obọ Edọm?+
10 Ogbẹrọnọ owhẹ, O Ọghẹnẹ, ọnọ ọ siọ omai no na,Ọghẹnẹ mai, ọnọ o gbe bi lele egbaẹmo mai kpohọ ẹmo ho na?+
11 Fiobọhọ kẹ omai evaọ uye mai,Keme esiwo nọ o re no obọ ohwo-akpọ ze o re fioka ha.+
12 Ọghẹnẹ ọ te kẹ omai ogaga,+Yọ o ti thihi ewegrẹ mai nyaotọ.+
Eme-Obotọ
^ Hayo “enwaene.”
^ Hayo o sae jọ nọ, “Whọ kẹ.”
^ Hayo “Re a sai siwi enọ who you.”
^ Hayo “Ukiekpotọ Opraprara.”
^ Hayo o sae jọ nọ, “Ọghẹnẹ ọ ta no evaọ oria ọrẹri riẹ.”
^ Evaọ Hibru, “oria omofọwẹ.”
^ Hayo o sae jọ nọ, “di ogba wariẹ họ.”
