Ilezi 35:1-28
Orọ Devidi.
35 O Jihova, dikihẹ kẹ omẹ evaọ ẹdhọ mẹ avọ enọ e wọso omẹ na;+Họre enọ e be họre omẹ.+
2 Rehọ ojese osese* gbe ojese ologbo ra,+Re whọ nyaze te thothọ mẹ.+
3 Kpare ozuẹ ra gbe emewhe ẹmo* ra kpehru ro le enọ i bi le omẹ.+
Ta kẹ omẹ* nọ: “Mẹ họ esiwo ra.”+
4 Ru oma vuọ enọ e be gwọlọ omẹ kpe, re who je hrẹ rai kpotọ.+
Jọ enọ e be gba ẹgwae epanọ a re ro kpe omẹ no* a kuomarẹriẹ avọ omovuọ.
5 Jọ a jọ wọhọ ehọrọ nọ ofou o bi fou;Jọ ukọ-odhiwu Jihova o le ai vrẹ.+
6 Jọ edhere rai o muebi re o jẹ whraNọ ukọ-odhiwu Jihova o bi le ai na.
7 Keme a rehọ ẹriri kpahe ẹta si no kẹ omẹ gheghe gheghe;A tọ ọgọdọ fihọ kẹ omẹ* gheghe gheghe.
8 Jọ okpẹtu o kie bru ei ze idudhe;Jọ ẹriri nọ ọ rọ kpahe ẹta si no na o mu ei;Jọ o kie ruọ ẹe re o whu.+
9 Rekọ mẹ* te ghọghọ fiki Jihova;Mẹ te ghọghọ fiki iruẹru esiwo riẹ.
10 Igbenwa mẹ kpobi e te ta nọ:
“O Jihova, ono ọ wọhọ owhẹ?
Who bi siwi iruori na no obọ enọ e ga vi ai,+Who bi siwi iruori na avọ iyogbe na no obọ enọ i bi kpe ai mi eware.”+
11 Isisẹri imuomu a nyaze,+Be nọ omẹ eware nọ mẹ riẹ oware ovo kpahe he.
12 A be rọ eyoma hwosa ewoma kẹ omẹ,+Bi ru omẹ* jọ wọhọ ohwo nọ ohwo o whu ku.
13 Rekọ okenọ a jẹ mọ, me ku iwu ehọ-ekpa* họ oma;Mẹ siọ emuọriọ ba ro gboja kẹ omamẹ,*Yọ otẹrọnọ Ọghẹnẹ o yo olẹ mẹ hẹ,*
14 Mẹ rẹ nya uwuweri wọhọ ẹsenọ a rrọ egbẹnyusu hayo inievo mẹ;Me gbuzou hotọ wọhọ ohwo nọ o bi weri oni riẹ.
15 Rekọ nọ me zoruẹ, a tẹ ghọghọ je kokohọ;A kokohọ re a fa omẹ fihọ otọ evaọ oria nọ a dhere;A rọ unu rai sawo omẹ ekekẹ, a fare unu rai hi.
16 Ahwo nọ a be gọ Ọghẹnẹ hẹ a be rọ omẹ zaharo,*A be reakọ avọ ofu fiki mẹ.+
17 O Jihova, ẹvẹ who re rri ọvo kri te?+
Siwi omẹ* no ohọre nọ a be họre omẹ,+Siwi uzuazọ oghaghae mẹ* no obọ ikpohrokpo egaga* na.+
18 Me ve ti jiri owhẹ evaọ ukoko ulogbo* na;+Me ti jiri owhẹ evaọ udevie ogbotu ahwo nọ a kokohọ na.
19 Ivie, whọ kuvẹ hẹ re enọ e rrọ ewegrẹ mẹ gheghe gheghe a ghọghọ fiki mẹ;Whọ kuvẹ re enọ i mukpahe omẹ gheghe gheghe+ a fare ubiẹro avọ evega fiki mẹ hẹ.+
20 Keme a be ta ẹme udhedhẹ hẹ,Rekọ a be gba ẹgwae eviẹhọ kpahe ahwo nọ a rrọ dhedhẹ evaọ otọ na.+
21 A rovie unu rai fihọ kẹkẹe be bọwo omẹ ota,Be ta nọ: Aha! Aha! Ibiaro mai e ruẹ e riẹ.”
22 Whọ ruẹ onana no, O Jihova. Who fibo ho.+
O Jihova, who thabọ no omẹ hẹ.+
23 Kparoma re whọ nyaze te thothọ mẹ,Jihova, Ọghẹnẹ mẹ, dikihẹ kẹ omẹ evaọ ẹdhọ mẹ na.
24 Rehọ ẹrẹreokie ra bruoziẹ mẹ,+ O Jihova, Ọghẹnẹ mẹ;Whọ kuvẹ re a ghọghọ fiki mẹ hẹ.
25 Whọ kuvẹ vievie he re a ta kẹ omarai nọ: “Ẹhẹẹ! Oware nọ ma gwọlọ u te omai obọ no.”*
Jọ a ta vievie he inọ: “Ma lọ riẹ no.”+
26 Ru re oma o vuọ aikpobi gholo gholo,Enọ e be ghọghọ fiki uye nọ u te omẹ oma.
Rehọ omovuọ zuo enọ e be ghọghọ fiki mẹ re who hrẹ rai kpotọ.
27 Rekọ jọ enọ ẹrẹreokie mẹ ọ be were kpobi a do edo oghọghọ;Jọ a ta kẹse kẹse nọ:
“Wha kẹ Jihova orro ulogbo, ọnọ ọ gwọlọ nọ odibo riẹ o wo udhedhẹ na.”+
28 Kẹsena ẹrọo mẹ o ve ti gbiku ẹrẹreokie ra*+Je jiri owhẹ ẹsikpobi.*+
Eme-Obotọ
^ Ojese osese nọ enọ e rẹ sa ose a rẹ mae wha.
^ Hayo “ewhe akọava.”
^ Hayo “rehọ uzuazọ mẹ.”
^ Hayo “otẹrọnọ olẹ mẹ u zihe ziọ igbama mẹ.”
^ Hayo “ehọ-ẹkporo.”
^ Hayo o sae jọ nọ, “Ahwo nọ a be gọ Ọghẹnẹ hẹ a bi jijehwẹ fiki ikeki.”
^ Evaọ Hibru, “ọvo mẹ na,” uzuazọ riẹ ọ be ta kpahe na.
^ Hayo “ikpohrokpo nọ e rrọ whẹvu.”
^ Hayo “evaọ udevie ogbotu obuobu.”
^ Hayo “Aha! Eva e were omai no.”
^ Hayo “ọ vẹ te ta kpahe ẹrẹreokie ra ẹmẹrera yọ me bi roro didi kpahe iẹe.”
^ Hayo “evaọ okpẹdoke na soso.”
