Ilezi 18:1-50
Ro se ọnọ o wuzou ile na. Devidi odibo Jihova ọye ọ ta eme ole nana kẹ Jihova evaọ ẹdẹ nọ Jihova o ro siwi ei no obọ ewegrẹ riẹ kpobi, je no obọ Sọl. Ọ ta nọ:+
18 Me you owhẹ, O Jihova, ẹgba mẹ.+
2 Jihova họ ugbehru-utho mẹ gbe oria omofọwẹ mẹ gbe Ọnọ o bi siwi omẹ.+
Ọghẹnẹ mẹ họ utho mẹ,+ ọnọ mẹ rẹ dhẹ ruọ otọ riẹ,Ojese mẹ gbe uzei* esiwo mẹ,* oria adhẹzọ* mẹ nọ o foma.+
3 Me re bo se Jihova, ọnọ o te ọnọ a re jiri,Yọ o ti siwi omẹ no obọ ewegrẹ mẹ.+
4 Ifi uwhu e wariẹ omẹ họ;+Ahwo nọ a fioka ha nọ a wọhọ ame nọ o bi kporo ẹkẹre a bi ru ozọ mu omẹ gaga.+
5 Ifi Uki* e wariẹ omẹ họ;Egbefẹ uwhu e rẹriẹ ovao ku omẹ.+
6 Me bo se Jihova evaọ oke idhọvẹ mẹ,Ọghẹnẹ mẹ me je bo se re o fiobọhọ kẹ omẹ.
Ọ jọ obọ etẹmpol riẹ yo urru mẹ,+Yọ ezọ riẹ i yo ubo nọ me bo sei rọkẹ obufihọ.+
7 Kẹsena otọakpọ na o te muhọ enuhu gaga;+Etọhotọ igbehru na i te je nuhu zighi zighiI je nuhu kpemu kparo keme a ru rie eva dha no.+
8 Iwiri i kuye no ighogho-inwe riẹ kpehru,Erae egaga i no unu riẹ ze;+Iwowo-erae i no oma riẹ ze.
9 Ọ vẹ idhiwu na ziọ otọ okenọ o je nwrotọ,+Yọ ebi ọlala ọ jọ otọ awọ riẹ.+
10 Ọ dhẹ chẹrub, ọ tẹ rra ze.+
Ọ rehọ ibekpe omama ẹzi* rra ziọ otọ ẹsiẹvo.+
11 Ọ tẹ rehọ ebi ruru omariẹ,+Ọ rehọ e riẹ wariẹ oma riẹ kpobi họ wọhọ uwou,Ame obiebi gbe ẹgho ọlala.+
12 Elo nọ ọ rrọ aro riẹU ru nọ oso-itho gbe iwowo-erae i ro no ẹgho na ze.
13 Kẹsena Jihova o te ru nọ egbrara e rọ va evaọ obọ idhiwu;+Ọnọ Ọ Mai Kpehru na o te ru nọ a ro yo urru riẹ+Avọ oso-itho gbe iwowo-erae.
14 Ọ sa ese riẹ, a tẹ vahabọ;+O vi elo egbrara riẹ bru rai o te ru ai reghe no.+
15 A te mu otọ iko-ame* na họ ẹruẹ;+Etọhotọ ẹkwotọ na e tẹ bẹre lahwe fiki ọwhọkuo ra, O Jihova,Fiki edo ẹwẹ nọ o no ighogho-inwe ra ze.+
16 Ọ rriẹ obọ no obọ ehru ze;O te kru omẹ, o te si omẹ no obọ ame odidi ze.+
17 O siwi omẹ no obọ ọwegrẹ ọgaga mẹ,+No obọ enọ i mukpahe omẹ nọ e goma vi omẹ.+
18 A wọ bru omẹ ze evaọ ẹdẹ nọ okpẹtu o ro te omẹ,+Rekọ Jihova ọ tha omẹ uke.
19 Ọ rehọ omẹ ziọ oria omofọwẹ;*O siwi omẹ fikinọ eva mẹ e jẹ were iẹe.+
20 Jihova ọ be hwosa kẹ omẹ fiki ẹrẹreokie mẹ;+Ọ be hwosa kẹ omẹ fikinọ abọ mẹ ọ fo.+
21 Keme mẹ be nya evaọ idhere Jihova,Yọ mẹ re rọ eva imuomu nyasiọ Ọghẹnẹ mẹ ba ha.
22 Iziẹibro riẹ kpobi e rrọ aro mẹ;Mẹ te jẹ izi riẹ fiẹ hẹ.
23 Mẹ te kare afuẹwẹ ẹsikpobi evaọ aro riẹ,+Yọ mẹ te kẹnoma kẹ oruthọ.+
24 Jọ Jihova ọ hwosa kẹ omẹ fiki ẹrẹreokie mẹ;+Fiki abọ mẹ nọ ọ fo evaọ aro riẹ.+
25 Whọ rẹ talamu ohwo nọ ọ talamu owhẹ;+Who re lele ohwo nọ ọ kare afuẹwẹ yeri ababọ afuẹwẹ;+
26 Whọ rẹ rọ eva efuafo lele ohwo nọ o wo eva efuafo yeri,+Rekọ whọ rẹ rọ areghẹ lele ohwo nọ o re ru ẹghẹ yeri.*+
27 Keme who re siwi iruori*+Rekọ who re hrẹ ahwo omorro* kpotọ.+
28 Keme whẹ họ ọnọ ọ rehọ ukpẹ mẹ tu, O Jihova,Ọghẹnẹ mẹ nọ o zihe ebi mẹ ruọ elo.+
29 Avọ obufihọ ra, mẹ rẹ sae wọ nyae họre egbaẹmo nọ e wọ ze te kwa eware;+Mẹ rẹ sae gadiẹ ugbẹhẹ vrẹ avọ ogaga Ọghẹnẹ.+
30 Edhere Ọghẹnẹ uzẹme na ọ rrọ gbagba;+Ẹme Jihova ọ rrọ fuafo.*+
Ojese ọ rrọ rọkẹ ahwo kpobi nọ a be dhẹ ruọ otọ riẹ.+
31 Ono họ Ọghẹnẹ, u te no Jihova no?+
Kọ ono họ utho, u te no Ọghẹnẹ mai no?+
32 Ọghẹnẹ uzẹme na họ ọnọ o fi ogaga họ omẹ oma wọhọ ewu,+Yọ o ti ru edhere mẹ jọ liọliọ.+
33 O re ru awọ mẹ jọ wọhọ awọ orua;O re ru omẹ dikihẹ eria ikpekpehru.+
34 O bi wuhrẹ abọ mẹ kẹ ẹmo-ofio;Abọ mẹ ọ rẹ sae vẹ uze ekọpa.
35 Whọ kẹ omẹ ojese esiwo ra,+Obọze ra o be thọ* omẹ,Yọ omaurokpotọ ra u bi ru omẹ fihọ ohwo ologbo.+
36 Who ru edhere na kẹre kẹ ithihi awọ mẹ;Otọ o te whra awọ* mẹ hẹ.+
37 Me ti le ewegrẹ mẹ je le ai mu;Me ti zihe ze he bẹsenọ me re kpe ai muotọ.
38 Mẹ te pẹhẹ ai no, re a gbẹ sae kparoma ha;+A ti kie fihọ otọ evawọ mẹ.
39 Whọ te kẹ omẹ ẹgba nọ me ti ro fi ẹmo na;Who ti ru ewegrẹ mẹ kie kẹ omẹ.+
40 Who ti ru ewegrẹ mẹ dhẹ kẹ omẹ,*Yọ me ti kpe ahwo nọ a mukpahe omẹ no.*+
41 A bi bo kẹ obufihọ, rekọ ohwo ọvo ọ riẹ nọ o re siwi ai hi;A bi tube bo se Jihova, rekọ ọ be kẹ ai uyo ho.
42 Me ti duwu ai wuru wuru wọhọ ovu nọ ofou o re fou kufiẹ;Me ti gbolo ai kufiẹ wọhọ ọloho nọ ọ rrọ iyẹrẹ.
43 Who ti siwi omẹ no obọ ahwo mẹ nọ a be jọ obọ mẹ gwọlọ oruthọ.+
Whọ te rọ omẹ mu ọnọ o wuzou erẹwho.+
Ahwo nọ mẹ riẹ ẹdẹvo ho a te gbodibo kẹ omẹ.+
44 A ti yoẹme kẹ omẹ fiki usi gheghe nọ a yo;Ahwo erẹwho efa a te nyaze ti guzou kpotọ avọ iguegue evaọ aro mẹ.+
45 Udu u ti no ahwo erẹwho efa awọ;*A ti no eria omofọwẹ rai ze yọ a bi nuhu.
46 Jihova ọ rrọ uzuazọ! Jọ ujiro u te Utho mẹ!+
Jọ a kpare Ọghẹnẹ esiwo mẹ kpehru.+
47 Ọghẹnẹ uzẹme na ọ be kioja kẹ omẹ;+O bi hrẹ ahwo na kpotọ re a jọ otọ mẹ.
48 O bi siwi omẹ no obọ ewegrẹ mẹ nọ eva e be dha;Whọ kpare omẹ kpobọ ehru siọ ahwo nọ a be họre omẹ ba;+Who siwi omẹ no obọ ohwo nọ o re ru ozighi.
49 Oyejabọ nọ me ti ro jiri owhẹ evaọ udevie erẹwho na, O Jihova,+Yọ mẹ te so ile jiri* odẹ ra.+
50 O bi ru eware ilogbo ro siwi ovie riẹ;*+O bi dhesẹ uyoyou nọ o rẹ hiẹ hẹ kẹ ọriẹ nọ o wholo,+Rọkẹ Devidi gbe emọ* riẹ bẹdẹ bẹdẹ.+
Eme-Obotọ
^ Hayo “osiwi ọgaga mẹ.”
^ Hayo “oria ukpehru.”
^ Hayo “ofou.”
^ Hayo “ito.”
^ Hayo “oria nọ u whrowhro oma.”
^ Hayo “whọ rẹ yọroma kpahe ohwo omuomu.”
^ Hayo “enọ e be reoja.”
^ Evaọ Hibru, “enọ i wo ibiaro omorro.”
^ Hayo “yọ oware nọ a rọ erae ru fo no.”
^ Hayo “u bi fiobọhọ kẹ.”
^ Hayo “ubiowọ.”
^ Hayo “ru omẹ ruẹ uke ewegrẹ mẹ.”
^ Evaọ Hibru, “Me ti ru enọ i mukpahe omẹ fibo.”
^ Hayo “Ahwo erẹwho efa a ti lo no.”
^ Hayo “me ti kporo ile kẹ.”
^ Hayo “O bi ru ovie riẹ wo obokparọ ulogbo ẹsibuobu.”
^ Evaọ Hibru, “ubi.”
