Ilezi 109:1-31
Ro se ọnọ o wuzou ile na. Orọ Devidi. Ole.
109 O Ọghẹnẹ nọ me bi jiri,+ who du fibo ọvo ho.
2 Keme irumuomu na avọ ahwo eviẹhọ a rovie enu rai be ta eme iyoma kpahe omẹ.
A be rọ unu rai ta ọrue kpahe omẹ;*+
3 A wariẹ omẹ họ avọ eme omukpahọ nọ a be ta,Yọ a be họre omẹ gheghe gheghe.+
4 A be wọso omẹ evaọ uyoyou nọ me bi dhesẹ;+Rekọ mẹ ruabọhọ olẹ.
5 A be rọ eyoma hwosa ewoma kẹ omẹ+Jẹ be rọ omukpahọ hwosa uyoyou nọ me bi dhesẹ.+
6 Rehọ ohwo omuomu mu osu kẹe;Jọ ohwo ọwọsuọ* o dikihẹ obọze riẹ.
7 Okenọ a te rehọ iẹe guẹdhọ, jọ a brukpei;*Jọ a rri olẹ riẹ dede wọhọ uzioraha.+
8 Jọ edẹ uzuazọ riẹ e jọ kpẹkpẹe;+Jọ omọfa ọ rehọ iruo ọsẹro riẹ.+
9 Jọ emọ* riẹ i zihe ruọ enọ i wo ọsẹ hẹ,Re aye riẹ o zihe ruọ aye-uku.
10 Jọ emọ* riẹ e jọ eyareware nọ i re ghoro kpenẹ avọ enẹ,Nọ e be nya no iwou rai nọ i kporo kuotọ be gwọlọ emu.
11 Jọ ohwo nọ o momo ugho* kẹe o gboro* oware kpobi nọ o wo,Jọ erara e kwa eware riẹ rehọ.
12 Jọ ohwo ọvo o ru oware uwoma* kẹe he,Jọ ohwo ọvo o dhesẹ aruoriwo kẹ emọ riẹ hẹ, enọ i wo ọsẹ hẹ.
13 Jọ a kpe ahwo uyẹ* riẹ muotọ;+Jọ a voro edẹ rai no, bẹsenọ oge ọfa ọ rẹ tha.
14 Jọ Jihova ọ kareghẹhọ iruthọ esẹ-esẹ riẹ,+Jọ a voro uzioraha oni riẹ no ho.
15 Jọ oware nọ a ru na o jọ Jihova iroro ẹsikpobi;Jọ o voro odẹ* rai no otọakpọ na no.+
16 Keme ọ kareghẹhọ ru oware uwoma kẹ amọfa ha,*+Rekọ ọ ruabọhọ je le ọnọ a bi kienyẹ,+ oyogbe, gbe ọnọ ọ rrọ ọkoraRe o kpe ai no.+
17 Ọ rẹ gwọlọ bọwo ahwo ehao gaga, fikiere a tẹ bọwo iẹe ehao;O rẹ were iẹe he re ọ lẹ ẹro eghale, fikiere oghale ovuovo u te rie obọ họ.
18 A ku ehao ebọwo họ iẹe oma wọhọ ewu.
A ku rai họ iẹe oma wọhọ ame,A ku rai họ igbenwa riẹ wọhọ ewhri.
19 Jọ ehao nọ a bọwo e riẹ i ruru iei oma wọhọ ewu nọ o fihọ oma+Jẹ wọhọ umueku nọ o re ro mu eku ẹsikpobi.
20 Onana họ osohwa nọ u re no obọ Jihova ze te ọnọ ọ be wọso omẹ+Gbe enọ e be ta eme iyoma kpahe omẹ.*
21 Rekọ whẹ Jihova Olori nọ Ọ Mai Kpehru na,Kioja kẹ omẹ fiki odẹ ra.+
Siwi omẹ keme uyoyou ra nọ o rẹ hiẹ hẹ na o rrọ wowoma.+
22 Keme mẹ yọ oruori gbe oyogbe,+Yọ a duwu udu mẹ no evaọ obeva.+
23 Mẹ be nyavrẹ no wọhọ uwoho nọ o be hiẹ no;A jojo omẹ kufiẹ no wọhọ abaka-ẹkpẹ.
24 Ighilawọ e lọhọ omẹ no fiki emuọriọ-ọseba;Mẹ dọ fihọ, yọ me whu re no.*
25 Me zihe ruọ ọnọ a be poviẹ no.+
Nọ a tẹ ruẹ omẹ, a ve nuhu uzou.+
26 Fiobọhọ kẹ omẹ, O Jihova, Ọghẹnẹ mẹ;Siwi omẹ fiki uyoyou ra nọ o rẹ hiẹ hẹ.
27 Jọ a riẹ nọ obọ ra onana u no ze;Inọ whẹ họ ọnọ o ru rie, O Jihova.
28 Kẹ ae uvẹ re a bọwo ehao, rekọ whọ vẹ ghale omẹ.
Nọ a tẹ kpama re a họre omẹ, jọ who ru oma vuọ ae,Rekọ jọ odibo ra ọ ghọghọ.
29 Jọ a kpomovuọ họ enọ e be wọso omẹ oma;Jọ omovuọ rai u ruru ai oma wọhọ ewu othethei.*+
30 Unu mẹ u ti jiri Jihova gaga;Me ti jiri ei evaọ iraro ahwo buobu.+
31 Keme o ti dikihẹ obọze oyogbe naRe o siwi ei no obọ ahwo nọ a brukpei.*
Eme-Obotọ
^ Hayo “A be rọ ẹrọo ọrue rai ta ẹme kpahe omẹ.”
^ Hayo “ọnọ o re gu eware iyoma kpahe ohwo.”
^ Hayo “jọ a ruẹ nọ ohwo omuomu ọ rrọ.”
^ Evaọ Hibru, “emezae.”
^ Evaọ Hibru, “emezae.”
^ Hayo “eware.”
^ Hayo “Jọ imomo-igho a kpahe eta kẹ.”
^ Hayo “Jọ ohwo ọvo o dhesẹ uyoyou nọ o rẹ hiẹ hẹ.”
^ Hayo “emọ-emọ.”
^ Hayo “ekareghẹhọ.”
^ Hayo “dhesẹ uyoyou nọ o rẹ hiẹ hẹ hẹ.”
^ Evaọ Hibru, “Uwo-oma mẹ o dọ fihọ, ababọ iwhri (ewhri).”
^ Hayo “ukotu nọ u wo abọ họ.”
