Ilezi 30:1-12
-
Uweri u zihe ruọ oghọghọ
-
Ọjẹrehọ Ọghẹnẹ ọ rẹ jọ evaọ edẹ uzuazọ kpobi (5)
-
Olezi. Ole eromudhe uwou na. Orọ Devidi.
30 Me re jiri owhẹ, O Jihova, keme whọ kpare* omẹ kpehru no;Whọ kuvẹ re ewegrẹ mẹ a ghọghọ fiki mẹ hẹ.+
2 O Jihova Ọghẹnẹ mẹ, me bo se owhẹ kẹ obufihọ, who te siwi ẹyao mẹ.+
3 O Jihova, whọ wọ omẹ* no eva Uki* ze.+
Whọ sẹro uzuazọ mẹ; who ru nọ me gbe ro zue ruọ ọgọdọ họ.*+
4 Wha so ile jiri* Jihova, whai ahwo riẹ nọ e talamu ei,+Wha jiri odẹ* ọrẹri riẹ;+
5 Keme ofu riẹ nọ ohwo ọ rẹ rẹriẹ ovao ku o rẹ jọ omoke kakao ọvo,+Rekọ ọjẹrehọ riẹ nọ ohwo o re wo* o rẹ jọ evaọ edẹ uzuazọ ohwo na kpobi.+
Ohwo ọ sae viẹ evaọ owọwọ, rekọ evaọ ohiohiẹ, o ve bo ubo oghọghọ.+
6 Okenọ me wo ukpokpoma ha, mẹ ta nọ:
“Oware ovo u ti nuhu omẹ vievie he.”*
7 O Jihova, okenọ me wo ọjẹrehọ ra,* who ru omẹ fihọ gaga wọhọ ugbehru.+
Rekọ nọ whọ kuọ ovao ra dhere, iguegue e tẹ ruọ omẹ oma.+
8 O Jihova, whẹ me bi bo se ẹsikpobi;+Yọ Jihova mẹ be lẹ ẹsikpobi re o rri omẹ aro.
9 Didi erere o re no uwhu* mẹ ze, nọ me te kpobọ ọgọdọ?*+
Kọ ẹkpẹ* o re jiri owhẹ?+ Kọ o sae ta ẹme kpahe ọtẹruo ra?+
10 Gaviezọ, O Jihova, re who dhesẹ aruoriwo kẹ omẹ.+
O Jihova, jọ ọnọ o re fiobọhọ kẹ omẹ.+
11 Who zihe uweri mẹ ruọ ile-igbe no;Who si ehọ-ekpa* mẹ no, whọ tẹ rọ oghọghọ gọ omẹ ẹgọ,
12 Re mẹ ruẹse* so ile jiri owhẹ, re mẹ siọ unu ba ẹfare.
O Jihova Ọghẹnẹ mẹ, me ti jiri owhẹ bẹdẹ bẹdẹ.
Eme-Obotọ
^ Hayo “who si.”
^ Hayo “uki hi.”
^ Hayo “kporo ile kẹ.”
^ Evaọ Hibru, “ekareghẹhọ.”
^ Hayo “emamọ eva nọ o re wo kpahe ohwo.”
^ Hayo “Me ti zoruẹ vievie he.”
^ Hayo “okenọ who wo emamọ eva kpahe omẹ.”
^ Hayo “ovu.”
^ Hayo “uki.”
^ Evaọ Hibru, “azẹ.”
^ Hayo “ehọ-ẹkporo.”
^ Hayo “Re oruaro mẹ o ruẹse.”
