Ilezi 103:1-22
Orọ Devidi.
103 Jọ me* jiri Jihova;Jọ oware kpobi nọ o rrọ ugboma mẹ u jiri odẹ ọrẹri riẹ.
2 Jọ me* jiri Jihova;Jọ eware nọ o ru no kpobi e thọrọ omẹ ẹro vievie he.+
3 Ọ be rọ iruthọ ra kpobi rọvrẹ owhẹ+Je bi siwi eyao* ra kpobi;+
4 Ọ rehọ uzuazọ ra no ọgọdọ* ze+Jẹ rọ etu uyoyou nọ o rẹ hiẹ hẹ gbe ohrọ-oriọ ro tu owhẹ.+
5 Ọ be kẹ owhẹ eware iwoma+ buobu evaọ edẹ uzuazọ ra kpobi,Re who gbe wo ẹgba uzoge wọhọ ugo.+
6 Jihova o bi dhesẹ ẹrẹreokie+ gbe uvioziẹ viaRọkẹ enọ a bi kienyẹ kpobi.+
7 O dhesẹ idhere riẹ via kẹ Mosis,+Je dhesẹ iruẹru riẹ via kẹ emezae Izrẹl.+
8 Jihova o wo ohrọ-oriọ gbe ọdawẹ,*+Ọ rẹ kaki mu ofu hu yọ ọ vọ avọ uyoyou nọ o rẹ hiẹ hẹ.*+
9 Ọ rẹ gwọlọ iruthọ ribri hi,+Yọ o re mu ofu bẹdẹ bẹdẹ hẹ.+
10 Ọ kẹ omai uye wọhọ epaọ izieraha mai hi,+Yọ ọ hwosa kẹ omai wọhọ epaọ iruthọ mai hi.+
11 Keme wọhọ epanọ idhiwu na i kpehru vi otọakpọ na,Ere uyoyou riẹ nọ o rẹ hiẹ hẹ nọ o bi dhesẹ kẹ enọ e be dhozọ riẹ o rro te.+
12 Wọhọ epanọ ovatha-ọre u thabọ no ukiediwo-ọre na,Ere o fi izieraha mai họ thabọ no omai te re.+
13 Wọhọ epanọ ọsẹ ọ rẹ re ohrọ emọ* riẹ na,Ere Jihova ọ be re ohrọ enọ e be dhozọ riẹ.+
14 Keme ọ riẹ vevẹ oghẹrẹ nọ a rọ ma omai,+Be kareghẹhọ nọ mai yọ ovu.*+
15 Keme edẹ uzuazọ ohwo-akpọ e wọhọ erọ ẹbe;+Ọ rẹ jọ bọbọbọ wọhọ ododo obọ ẹwọ.+
16 Rekọ nọ ofou o te fou, o re fou rie no,*Wọhọ ẹsenọ o jọ etẹe ẹdẹvo ho.*
17 Rekọ uyoyou Jihova nọ o rẹ hiẹ hẹ o rẹ jọ bẹdẹ bẹdẹ*Rọkẹ enọ e be dhozọ riẹ,+Yọ o re dhesẹ ẹrẹreokie riẹ kẹ emọ emọ rai,+
18 Rọkẹ enọ i bi koko ọvọ riẹ+Gbe enọ e be romatotọ koko ijaje riẹ.
19 Jihova ọ rehọ agbara-uvie riẹ vi obọ idhiwu no kothi;+Yọ uvie riẹ u bi su eware kpobi.+
20 Wha jiri Jihova, whai ikọ-odhiwu riẹ kpobi+ nọ i wo ẹgba gaga na,Enọ i bi ru lele ẹme riẹ,+ nọ i bi yoẹme kẹ urru riẹ.*
21 Wha jiri Jihova, whai egbaẹmo riẹ kpobi,+Idibo* riẹ nọ i bi ru oreva riẹ.+
22 Wha jiri Jihova, whai eware kpobi nọ o ru,Evaọ oria kpobi nọ o bi su.*
Jọ oma mẹ na kpobi u* jiri Jihova.
Eme-Obotọ
^ Hayo “Je bi siwi owhẹ no iye.”
^ Hayo “uki.”
^ Hayo “aruoriwo.”
^ Hayo “uyoyou-ẹwo.”
^ Evaọ Hibru, “emezae.”
^ Hayo “ẹkpẹ.”
^ Hayo “o ve whu no.”
^ Hayo “Yọ oria riẹ o rẹ gbẹ riẹe he.”
^ Hayo “no ebẹdẹ rite ebẹdẹ.”
^ Evaọ Hibru, “nọ i bi yo urru (edo) ẹme riẹ.”
^ Hayo “Egbodibo.”
^ Hayo “Oria kpobi nọ udu-esuo riẹ nọ o mai kpehru na u bi su.”
