Ilezi 89:1-52
Maskil.* Orọ Itan+ ohwo uyẹ Ẹzra.
89 Mẹ te so ole bẹdẹ bẹdẹ kpahe oghẹrẹ nọ Jihova o bi ro dhesẹ uyoyou nọ o rẹ hiẹ hẹ.
Mẹ te rọ unu mẹ vuẹ ige kpobi kpahe ọtẹruo ra.
2 Keme mẹ ta nọ: “Uyoyou nọ o rẹ hiẹ hẹ u ti dikihẹ* bẹdẹ bẹdẹ,+Whọ rehọ ọtẹruo ra dikihẹ kothi no evaọ obọ idhiwu na.”
3 “Mẹ re ọvọ kugbe ọnọ mẹ salọ;+Me duwu iyei kẹ Devidi odibo mẹ,+ inọ:
4 ‘Mẹ te rehọ ọmọ* ra dikihẹ kothi+ bẹdẹ bẹdẹ,Yọ me ti ru agbara-uvie ra jọ evaọ ige kpobi.’”+ (Silah)
5 Idhiwu na i bi jiri iruo igbunu ra, O Jihova,Ẹhẹ, i bi jiri ọtẹruo ra evaọ ukoko erẹri na.
6 Kọ ono evaọ obọ ehru na a sae rọ wawo Jihova?+
Ono evaọ usu emọ* Ọghẹnẹ+ ọ wọhọ Jihova?
7 A bi rri Ọghẹnẹ avọ ọwhewhe evaọ ukoko* erẹri na;+Ọ rrọ ruaro gaga, yọ ọ vọ avọ ọwhewhe rọkẹ enọ e wariẹ e riẹ họ kpobi.+
8 O Jihova Ọghẹnẹ olori egbaẹmo,Ono o wo ogaga wọhọ owhẹ, O Jah?+
Ọtẹruo ra ọ wariẹ owhẹ họ.+
9 Whọ be kpọ ẹvohẹ abade na;+Nọ ẹkporo riẹ o te muhọ, who re ru ei fọ rirẹ.+
10 Whọ guọghọ Rehab+ no wọhọ ohwo nọ a kpe fihọ otọ.+
Whọ rehọ ugbobọ ogaga ra vaha ewegrẹ ra no.+
11 Idhiwu na era, yọ otọakpọ na ọra re;+Otọ na gbe eware nọ e vọ riẹ eva kpobi,+ whẹ họ ọnọ o ru rai.
12 Whẹ họ ọnọ ọ ma ẹkpẹlobọ ovatha-ọre gbe obọze ovatha-ọre na;Tebọ+ avọ Hẹmọn+ a be rọ oghọghọ jiri odẹ ra.
13 Ugbobọ ra u wo ẹgba;+Obọ ra o rrọ gaga;+A kpare obọze ra kpehru.+
14 Ẹrẹreokie avọ uvioziẹ họ otọhotọ agbara-uvie ra;+Uyoyou nọ o rẹ hiẹ hẹ avọ ọtẹruo e rrọ aro ra.+
15 Jọ eva e were ahwo nọ a bi bo* ubo oghọghọ.+
O Jihova, elo ovao ra a be rọ nya.
16 A be ghọghọ fiki odẹ ra ẹsikpobi,*Yọ eva e be were ae fiki ẹrẹreokie ra.
17 Keme whẹ họ oruaro gbe ẹgba rai,+Yọ ọjẹrehọ ra o ru ẹgba mai dhesẹ oma via no.*+
18 Keme Jihova họ ọnọ o wo ojese mai,Ọrẹri Izrẹl na họ ọnọ o wo ovie mai.+
19 Evaọ oke yena whọ jọ eruẹaruẹ ta ẹme kẹ enọ i bi yoẹme kẹ owhẹ, inọ:
“Mẹ kẹ ọgba ogaga;+Mẹ kpare ọnọ mẹ salọ na kpehru evaọ udevie ahwo na.+
20 Mẹ ruẹ Devidi odibo mẹ no;+Mẹ rehọ ewhri ọrẹri mẹ wholo iei no.+
21 Mẹ te rọ obọ mẹ thae uke,+Mẹ te rọ ugbobọ mẹ ru ei ga.
22 Ọwegrẹ ọvo ọ te gbae mi azọhọ họ,Yọ ohwo nọ o kiẹrẹe he ọvuọvo o ti kienyẹe he.+
23 Mẹ te whọlọ ewegrẹ riẹ ehehẹhẹ no abotọ riẹ+Je kpe enọ i mukpahe iẹe no.+
24 Me ti dhesẹ ọtẹruo mẹ avọ uyoyou mẹ nọ o rẹ hiẹ hẹ kẹe,+Yọ fiki odẹ mẹ, o ti dhe ẹgẹga.*
25 Me ti fi obọ riẹ họ ehru* abade naJe fi obọze riẹ họ ehru ithẹ na.+
26 O ti se omẹ nọ: ‘Whẹ họ Ọsẹ mẹ,Ọghẹnẹ mẹ gbe Utho esiwo mẹ.’+
27 Mẹ te rehọ iẹe fihọ ọmọ ọsosuọ,+Ọnọ ọ mai kpehru evaọ usu ivie otọakpọ na.+
28 Me ti dhesẹ uyoyou mẹ nọ o rẹ hiẹ hẹ kẹe bẹdẹ bẹdẹ,+Yọ ọvọ nọ mẹ re kugbei ọ te raha vievie he.+
29 Mẹ te rọ ọmọ* riẹ dikihẹ bẹdẹ bẹdẹJe ru agbara-uvie riẹ jọ ribri wọhọ idhiwu na.+
30 Otẹrọnọ emezae riẹ a kiukeku uzi mẹNọ a gbe ru lele oware nọ mẹ ta ha,*
31 A tẹ raha izi mẹNọ a gbe koko ijaje mẹ hẹ,
32 Mẹ vẹ te rọ ọkpọ gboja kẹ ae fiki aghẹmeeyo* rai+Jẹ fa ae fiki iruthọ rai.
33 Rekọ mẹ te siọ uyoyou mẹ nọ o rẹ hiẹ hẹ ba edhesẹ kẹe he+Yọ mẹ te siọ eyaa mẹ ba erugba ha.*
34 Mẹ te raha ọvọ mẹ hẹ+Yọ me ti nwene oware nọ mẹ rọ igbenu mẹ ta no ho.+
35 Mẹ rehọ ọrẹri nọ mẹ rrọ ro duwu iyei no;Mẹ te ta erue kẹ Devidi hi.+
36 Ọmọ* riẹ ọ te jọ bẹdẹ bẹdẹ;+Agbara-uvie riẹ ọ te jọ ribri wọhọ ọre na evaọ aro mẹ.+
37 U ti dikihẹ kothi bẹdẹ bẹdẹ wọhọ ọvẹre naWọhọ osẹri nọ a rẹ sai fievahọ evaọ ihru na.” (Silah)
38 Rekọ who gbolo i rie kufiẹ jẹ se iẹe;+Whọ dha eva gaga kẹ ọnọ who wholo.
39 Whọ kpairoro vrẹ ọvọ nọ whọ re kugbe odibo ra;Who zue etu-uvie* riẹ keme who gbolo i rie fihọ otọ.
40 Who kporo igbẹhẹ itho riẹ* kpobi kuotọ;Who kporo eria riẹ nọ a di ogba wariẹ họ* kuotọ no.
41 Ahwo nọ a be nya etẹe vrẹ kpobi a be kwa eware riẹ rehọ;Ahwo okegbe riẹ a be poviẹ ẹe.+
42 Who ru enọ e be wọso ẹe kparobọ no;*+Who ru nọ ewegrẹ riẹ kpobi a be rọ ghọghọ.
43 Who le rie avọ ọgbọdọ riẹ zihe,Who ru nọ ọ gbẹ rọ kparobọ họ evaọ ẹmo,
44 Who ru nọ orro riẹ u ro te obaJẹ rehọ agbara-uvie riẹ fi otọ.
45 Who bru edẹ uzoge riẹ kpẹre;Who ku omovuọ họ iẹe oma wọhọ ewu. (Silah)
46 Ẹvẹ whọ rẹ kuọ omara dhere kri te, O Jihova? Bẹdẹ bẹdẹ?+
Kọ ofu ra ọ te to ribri wọhọ erae?
47 Kareghẹhọ epanọ uzuazọ mẹ o kpẹre te!+
Kọ gheghe* whọ rọ ma ahwo-akpọ kpobi?
48 Ohwo-akpọ vẹ ọ rẹ rria uzuazọ nọ o re whu vievie he?+
Kọ ọ rẹ sai siwi omobọ* riẹ no ogaga Uki?* (Silah)
49 Kọ uyoyou ra nọ o rẹ hiẹ hẹ nọ who je dhesẹ evaọ oke nọ u kpemu na o rrọ, O Jihova,Onọ who duwu iyei kpahe rọkẹ Devidi fiki ọtẹruo ra?+
50 O Jihova, kareghẹhọ ẹpoviẹ nọ a be poviẹ idibo ra;Epanọ me bi thihakọ* ẹpoviẹ ahwo na kpobi;
51 Oghẹrẹ nọ ewegrẹ ra a bi ku eka họ iẹe oma, O Jihova;Oghẹrẹ nọ a be la ọnọ who wholo na eka evaọ owọ kpobi nọ ọ jẹ.
52 Jọ a jiri Jihova bẹdẹ bẹdẹ. Ami, Ami.+
Eme-Obotọ
^ Hayo “o te jọ.”
^ Evaọ Hibru, “ubi.”
^ Evaọ Hibru, “emezae.”
^ Hayo “ogbotu.”
^ Hayo “ahwo nọ a riẹ.”
^ Hayo “evaọ okpẹdoke na soso.”
^ Evaọ Hibru, “ọ kpare uzei mai kpehru.”
^ Evaọ Hibru, “uzei riẹ o te kpare kpehru.”
^ Hayo “Mẹ te kẹe udu-esuo.”
^ Evaọ Hibru, “ubi.”
^ Hayo “iziẹibro mẹ hẹ.”
^ Hayo “ọwọsuọ.”
^ Evaọ Hibru, “Yọ me ti ru uzẹme mẹ fihọ ọrue he.”
^ Evaọ Hibru, “Ubi.”
^ Hayo “etu-ọkwa.”
^ Hayo “iwou riẹ nọ a rehọ itho bọ.”
^ Hayo “nọ e rẹ bẹ ẹvẹruọ.”
^ Evaọ Hibru, “Whọ kpare obọze enọ e be wọso ẹe kpehru no.”
^ Hayo “Kọ who wo uvumọ ẹjiroro nọ.”
^ Evaọ Hibru, “Epanọ mẹ be rọ igbama mẹ wọ.”
